មនុស្សយ៉ាងហោចណាស់ចំនួន ១៣នាក់បានស្លាប់ នៅពេលដែលទូកនេសាទមួយគ្រឿង បានបុកគ្នាជាមួយនឹងនាវាដឹកប្រេងទំងន់ ៣៣៦តោន បណ្តាលឲ្យទូកនេសាទក្រឡាប់ និងលិចនៅសមុទ្រភាគខាងលិច ប្រទេសកូរ៉េខាងត្បូង។ នេះបើតាមការចេញផ្សាយរបស់សារព៌តមាន BBC កាលពីថ្ងៃអាទិត្យម្សិលមិញនេះ។
បើតាមឆ្មាំសមុទ្រកូរ៉េខាងត្បូង បានឲ្យដឹងថា មនុស្ស ២នាក់ក៏កំពុងបាត់ខ្លួននៅក្នុងហេតុការណ៏នោះផងដែរ ខណៈដែលការជួយសង្គ្រោះ និងរុករកកំពុងតែបន្ត។
ទូកនេសាទឈ្មោះ Seonchang-1 បានដឹកមនុស្សចំនួន ២០នាក់ និងនាវិកចំនួន ២នាក់មុនពេលមានហេតុការណ៏បុកគ្នា។
យន្តហោះ និងកប៉ាល់ជាច្រើនគ្រឿងបានចូលរួមក្នុងប្រតិបត្តិការស្វែងរកជនរងគ្រោះ ក្បែរដែនកោះ Yeongheung។
បើតាមសេចក្តីរាយការណ៏របស់ភ្នាក់ងារសារព៌តមាន AFP បានឲ្យដឹងថា មនុស្សចំនួន ៧នាក់បានរងរបួស និងត្រូវបានគេបញ្ជូនទៅកាន់មន្ទីរពេទ្យ។ ចំនែកប្រធាន (captain) របស់ទូកនេសាទដែលមានទំងន់ ១០តោនស្ថិនក្នុងចំណោមអ្នកដែលបានបាត់ខ្លួន។
ពុំមានសេចក្តីរាយការណ៏ណាថា មានអ្នករងរបួសនៅលើនាវាដឹកប្រេងនោះឡើយ។
ចំនែកសារព៌តមានកូរ៉េខាងត្បូង Yonhap បានឲ្យដឹងថា ការបុកគ្នាកើតឡើងតែ ៩នាទីប៉ុណ្ណោះក្រោយពេលទូកនេសាទបានចាកចេញ៕ សុភ័ក្ត្រ