មន្ត្រីកូរ៉េខាងត្បូងបានឲ្យដឹងថា ប្រទេសកូរ៉េខាងត្បូង និងអាមេរិចនៅថ្ងៃច័ន្ទនេះ បានចាប់ផ្តើមធ្វើសមយុទ្ធដែនអាកាស ទ្រង់ទ្រាយធំបំផុត។ សមយុទ្ធរួមគ្នារវាងសម្ព័ន្ធមិត្តទាំងពីរ កើតឡើង១សប្តាហ៏ ក្រោយពេលប្រទេសកូរ៉េខាងជើងបានអះអាងថា ខ្លួនបានធ្វើការបាញ់សាកល្បងមីស៊ីលឆ្លងទ្វីបបានដោយជោគជ័យ ដែលមានសមត្ថភាពវាយប្រហារទូទាំងអាមេរិច។
សមយុទ្ធប្រចាំឆ្នាំដែលមានឈ្មោះថា Vigilant Ace នឹងបន្តរហូតដល់ថ្ងៃសុក្រ ដោយមានការចូលរួមពីយន្តហោះបំបាំងកាយអាមេរិចប្រភេទ F-22 ជាច្រើនគ្រឿង ក្នុងចំណោម។ ការចូលរួមពីយន្តហោះចំបាំងជាង ២៣០គ្រឿង។ ប្រភេទយន្តហោះប្រតិកម្មអាមេរិចដ៏មានអនុភាព ប្រភេទ F-35 ក៏នឹងចូលរួមផងដែរ។
កងទ័ពអាមេរិចំនួន ១២.០០០នាក់ ក៏នឹងចូលរួមធ្វើសមយុទ្ធជាមួយនឹងកងទ័ពកូរ៉េខាងត្បូងផងដែរ។ ចំនែកយន្តហោះចំបាំងដែលចូលរួមក្នុងសមយុទ្ធរួមនោះ នឹងធ្វើដំណើរហោះចេញពីមូលដ្ឋានអាមេរិច និងកូរ៉េខាងត្បូងចំនួន ៨កន្លែង។
បើតាមប្រព័ន្ធផ្សព្វផ្សាយរបស់កូរ៉េខាងត្បូង បានឲ្យដឹងថា យន្តហោះទំលាក់គ្រាប់បែកអាមេរិចប្រភេទ B-1B អាចនឹងចូលរួមក្នុងសមយុទ្ធនៅក្នុងសប្តាហ៏នេះ។
ការធ្វើសមយុទ្ធរួមរវាងអាមេរិច និងកូរ៉េខាងត្បូងនេះ គឺដើម្បីត្រៀមខ្លួនឲ្យរួចរាល់ និងបង្កើនសមត្ថភាពប្រតិបត្តិការ ដើម្បីរក្សាសន្តិភាព និងសន្តិសុខនៅឧបទ្វីកូរ៉េ។ នេះបើតាមការបញ្ជាក់របស់យោធាអាមេរិច មុនពេលសមយុទ្ធចាប់ផ្តើម។
ជុំវិញសមយុទ្ធនេះដែរ ទីក្រុងព្យុងយ៉ាងបានស្តីបន្ទោសដល់ប្រធានាធិបតី ដូណាល់ ត្រាំ ថាជាអ្នកធ្វើឲ្យមានភាពតានតឹងកើនឡើង និងបានព្រមាននៅចុងសប្តាហ៏កន្លងទៅថា សមយុទ្ធនោះកំពុងជំរុញឲ្យមានភាពតានតឹងបន្ថែមទៀតនៅឧបទ្វីបកូរ៉េ៕ សុភ័ក្ត្រ
