នៅថ្ងៃទី៥តុលា នាយករដ្ឋមន្ត្រីចិន លី គីគាង បានពោលទៅកាន់សមភាគីជប៉ុន Shinzo Abe ដែលកំពុងទស្សនកិច្ចប្រទេសនេះថា ក្រុងប៉េកាំងស្វាគមន៍ក្រុងតូក្យូដែលបាន ចូលរួមក្នុងការកែទម្រង់និងបើកទ្វារខឿនសេដ្ឋកិច្ចចិន។
ស្ថានីយវិទ្យុជាតិចិន បានដកស្រង់សម្តីលោកលី គីគាងដែលសម្តែងក្តីសង្ឃឹមថា ចិននិងជប៉ុនអាចសហប្រតិបត្តិការ សំដៅធានាយន្តការពហុភាគីនិងពាណិជ្ជកម្មសេរី។ លោកក៏ស្វាគមន៍ជប៉ុនដែលសកម្មចូលរួមក្នុងគំនិតច្នៃប្រឌិត ហេដ្ឋារចនាសម្ព័ន្ធ(ខ្សែក្រវាត់មួយនិងផ្លូវមួយ) របស់ចិន។
ប្រភពព័ត៌មានពីជប៉ុនវិញឱ្យដឹងថា ក្នុងស្ថានភាពតានតឹងពាណិជ្ជកម្មរវាងចិននិងអាមេរិកកើនឡើង លោកនាយករដ្ឋមន្ត្រីចិន អាចយល់ព្រមជំរុញការតភ្ជាប់រវាងបណ្តាខឿនសេដ្ឋកិច្ចក្នុងតំបន់។
នាយករដ្ឋមន្ត្រីទាំងពីរក៏នឹងអនុម័តការពន្យារពេលប្តូររូបិយប័ណ្ណប្រទេសទាំងពីរដែលមានតម្លៃប្រមាណ៣០០០ពាន់លានយ៉េន(ប្រមាណ២៦,៦ពាន់លានដុល្លារ) សំដៅប្រឈមនឹងហានិភ័យវិបត្តិហិរញ្ញវត្ថុ។
នាយករដ្ឋមន្ត្រីជប៉ុនក៏នឹងប្រកាសប្រាប់នាយករដ្ឋមន្ត្រីចិន អំពីការដែលជប៉ុននឹងផ្អាកបណ្តាគម្រោងជំនួយអភិវឌ្ឍន៍ ផ្លូវការ(ODA) ឱ្យចិនដែលធ្លាប់ត្រូវបានអនុវត្តន៍ក្នុងអំឡុងពេល៤០ឆ្នាំកន្លងមក ហើយជំនួសវិញដោយគំនិតផ្តួចផ្តើមយន្តការចរចាថ្មីរវាងប្រទេសទាំងពីរសំដៅពិភាក្សាអំពីកិច្ចសហការគាំទ្រការកសាងហេដ្ឋារចនាសម្ព័ន្ធនៅបណ្តាប្រទេសកំពុងរីកចម្រើន។
តាមផែនការ នៅថ្ងៃទី២៦ខែតុលា ក្រោយជំនួបដោយឡែកជាមួយនាយករដ្ឋមន្ត្រីចិន លីគីគាង លោកShinzo Abe ក៏នឹងជួបជាមួយប្រធានរដ្ឋចិន Xi Jinping ហើយក៏នឹងចូលរួមក្នុងពិធីលាងសាយភោជនរៀបចំឡើងដោយប្រធានរដ្ឋចិននិងលោកជំទាវ។
ក្នុងអំឡុងទស្សនកិច្ចនេះ នាយករដ្ឋមន្ត្រីប្រទេសទាំងពីរក៏នឹងចូលរួមបុណ្យខួបអនុស្សាវរីយ៍៤០ឆ្នាំ ថ្ងៃចុះហត្ថលេខាលើសន្ធិសញ្ញាសន្តិភាពនិងមិត្តភាពរវាងប្រទេសទាំងពីរ៕សូយន
