មុននេះមានព័ត៌មានពីកាសែតអាមេរិកជាច្រើន លើកឡើងថា ចារកម្មចិននិងរុស្ស៊ីតែងលួចស្តាប់ការសន្ទនាទូរស័ព្ទរបស់ប្រធានាធិបតី Donald Trump អ្នកនាំពាក្យក្រសួងការបរទេសចិន បានផ្តើមសំណើឱ្យម្ចាស់សេតវិមានប្តូរទៅប្រើ Huawei វិញ។
តាមកាសែត The New York Times បណ្តាមន្ត្រីអាមេរិកទើបបង្ហើបប្រាប់ថា ចារកម្មចិនតែងលួចស្តាប់ការសន្ទនា របស់ប្រធានាធិបតី Donald Trump នៅពេលដែលលោកប្រើទូរស័ព្ទ iPhone ពេលលោកប្រើប្រាស់វាដើមជជែកជាមួយមិត្តភក្ដិ។
ក្នុងប្រតិកម្មពុំនឹកស្មានដល់មួយ អ្នកនាំពាក្យក្រសួងការបរទេសចិន លើកឡើងថា ប្រសិនបើប្រធានាធិបតីTrump បារម្ភអំពីសុវត្ថិភាពការពារសន្តិសុខរបស់ iPhone លោកអាចងាកមកប្រើប្រាស់ទូស័ព្ទ Huawei វិញ ឬមួយលោកមិនគួរទាក់ទងជាមួយអ្នកណាទាំងអស់តាមទូរស័ព្ទ។
បើតាម Reuters វិញនៅថ្ងៃទី២៥ ខែតុលា ក្នុងសន្និសីទកាសែតជាអចិន្ត្រៃយ៍របស់ក្រសួងការបរទេសចិន នោះ អ្នកនាំពាក្យក្រសួងនេះបានហៅអត្ថបទដែលចុះផ្សាយលើកាសែត The New York Times ថាជា«ភស្តុតាងនៃព័ត៌មានក្លែងក្លាយ»។
បច្ចុប្បន្ន អាមេរិកបានហាមឃាត់ Huawei មិនឱ្យផ្តល់បរិក្ខារអេឡិចត្រូនិកដល់បណ្តាស្ថាប័នរបស់ខ្លួន ព្រោះបារម្ភលើផ្នែកសន្តិសុខ។អាមេរិកចាត់ទុកថា Huawei មានទំនាក់ទំនងជាមួយរដ្ឋាភិបាលចិន ទោះបីជាក្រុមបច្ចេកវិជ្ជានេះតែងបដិសេធក្តី៕លីសា