ភ្នំពេញ ៖ អាជ្ញាធររាជធានីភ្នំពេញ និងស្នងការដ្ឋាននគរបាលរាជធានី បានកោះប្រជុំជាមួយម្ចាស់ក្លឹបកម្សាន្ត ខារ៉ាអូខេ ផ្ទះសំណាក់ បារបារាំង សណ្ឋាគារលំដាប់ផ្កាយក្នុងរាជធានីភ្នំពេញ មកប្រជុំជាមួយសមត្ថកិច្ចពាក់ព័ន្ធ ការបញ្ជ្រាប ការយល់ដឹង និងទប់ស្កាត់បទល្មើសគ្រឿងញៀន រួមទាំងការចុះកិច្ចសន្យាលើកិច្ចសហការ និងធានាអះអាងចូលរួមប្រយុទ្ធប្រឆាំងបទល្មើសគ្រឿងញៀន មិនឲ្យកើតមានលើទីតាំងរបស់ខ្លួន។
លោកមាន ចាន់យ៉ាដា អភិបាលរងរាជធានីភ្នំពេញ បានមានប្រសាសន៍លើកឡើង ក្នុងកិច្ចប្រជុំកាលពីព្រឹកថ្ងៃទី២៥ តុលា នៅសាលារាជធានីភ្នំពេញ ថា ការទប់ស្កាត់បទល្មើសគ្រឿងញៀន ជាចាំបាច់ត្រូវតែមានការចូលរួម សហការ ពីម្ចាស់អាជីវកម្មដ្ឋាន ក្លឹបកម្សាន្ត សណ្ឋាគារ ផ្ទះសំណាក់ ខារ៉ាអូខេ ទាំង១.៣៨៣ទីតាំង ក្នុងរាជធានីភ្នំពេញ និងត្រូវមានការយល់ដឹងពីច្បាប់ ស្ដីពីគ្រឿងញៀន។
លោកមាន ចាន់យ៉ាដា បានថ្លែងថា “ទីតាំងរបស់អស់លោក លោកស្រី គឺផុយស្រួយណាស់ ងាយរអិលចូលទៅក្នុងបទល្មើសគ្រឿងញៀន បើយើងមិនបានយកចិត្តទុកដាក់ ទប់ស្កាត់ទេនោះ ។ នេះជាវិធានការថ្មីមួយទៀត ចំពោះម្ចាស់អាជីវកម្មដ្ឋាន ក្លឹបកម្សាន្ត សណ្ឋាគារ ផ្ទះសំណាក់ ក្នុងការចុះកិច្ចសន្យាចូលរួមទប់ស្កាត់ បទល្មើសគ្រឿងញៀន មានការចែកចាយ ប្រើប្រាស់ ជួញដូរ ជាដើម ដែលចាំបាច់ត្រូវ មានការចូលរួមសហការ ពីម្ចាស់ទីតាំងអាជីវកម្ម។ ដោយឡែកបើម្ចាស់ អាជីវកម្ម មានអាជ្ញាប័ណ្ណហើយក្តី តែអនុវត្តន៍ប្រព្រឹត្តផ្ទុយ ពីច្បាប់ គឺត្រូវប្រឈមមុខច្បាប់ ដូចគ្នា។
អាជ្ញាធរបានកត់សម្គាល់ឃើញថា កន្លងមកនេះ មានម្ចាស់សណ្ឋាគារ ផ្ទះសំណាក់ ក្លឹបកម្សាន្ត និងម្ចាស់ទីតាំងខារ៉ាអូខេមួយចំនួន មានការធ្វេសប្រហែស មិនបានត្រួតពិនិត្យ ឲ្យបានម៉ត់ចត់ទៅលើភ្ញៀវ ដែលចូលស្នាក់នៅក្នុងទីតាំងរបស់ខ្លួន ដូចករណីខ្លះ មានក្មេងស្ទាវមិនគ្រប់អាយុ ជាក្រុម ពពាក់ពពូនចូលដេកផ្ទះសំណាក់ ជាដើម ដែលជាមុខសញ្ញា ត្រូវយកចិត្តទុកដាក់ខ្ពស់។ ជាមួយគ្នានេះ ម្ចាស់ទីតាំងក្លឹបកម្សាន្ត ផ្ទះសំណាក់ សណ្ឋាគារ ក៏ត្រូវត្រួតពិនិត្យបុគ្គលិករបស់ ខ្លួនដែលបម្រើការក្នុងទីតាំងអាជីវកម្មរបស់ខ្លួន ដូចជា ការពិនិត្យទឹកនោម រកសារធាតុជាញៀន ជាដើម៕ ដោយ៖កូឡាប