ភ្នំពេញ ៖ ក្រុមហ៊ុន Shandong បានស្នើដល់រដ្ឋមន្ត្រីក្រសួងបរិស្ថាន ដើម្បីសុំវិនិយោគលើការ កែច្នៃសំរាមទៅជាថាមពលអគ្គិសនីលើ២ខេត្ត គឺខេត្តព្រះសីហនុ និងខេត្តសៀមរាប ដែលការបំប្លែង ថាមពលអគ្គិសនីទាំង២ខេត្តខាងលើនេះ ក្រុមហ៊ុនគ្រោងចំណាយទុនវិនិយោគចំនួន ៨៦លានដុល្លារ ។
នារសៀលថ្ងៃព្រហស្បតិ៍ទី២៥ ខែតុលា ឆ្នាំ២០១៨ លោកសាយ សំអាល់ រដ្ឋមន្ត្រីក្រសួងបរិស្ថាន បានអនុញ្ញាតឱ្យក្រុម Shandong Wangeng Energy Technology Co.,LTD ចូលជួបសំដែងការគួរសម និងពិភាក្សាការងារអំពីការ វិនិយោគលើការកែច្នៃសំរាមទៅជាថាមពលអគ្គីសនី នៅទីស្តីការក្រសួងបរិស្ថាន។
នៅក្នុងឱកាសជួបពិភាក្សានេះ តំណាងក្រុមហ៊ុន បានគោរពជូនលោកដ្ឋមន្ត្រី អំពីគោលដៅ និង លទ្ធភាពរបស់ក្រុមហ៊ុន ដែលអាចបង្កើតថាមពលអគ្គិសនីដើរដោយថាមពលនុយគ្លេអ៊ែរ និងការបង្កើតថាមពលអគ្គិសនីដោយការច្នៃសំណល់ ថាមពលអគ្គិសនីដោយកង្ហារខ្យល់ ថាមពលអគ្គិសនីដោយ ជីវឧស្ម័ន ថាមពលអគ្គិសនីដោយជីវម៉ាស់ ក៏ដូចជាការកសាងបណ្តាញអគ្គិសនី។ ទន្ទឹមនឹងនេះភាគី ក្រុមហ៊ុន ក៏បានលើកឡើងអំពីការដុតសំរាម ដោយប្រើបច្ចេកវិទ្យាក្នុងការកែច្នៃធនធាន ដែលមាន ការគិតគូពីបរិស្ថាន និងអាចមានលទ្ធភាពបន្ថយឈាន ដល់ចំណុចសូន្យចំពោះផលប៉ះពាល់ឧស្ម័ន បញ្ចេញចោលទៅបរិយាកាស។ ក្នុងឱកាសជួបពិភាក្សានេះដែរ គឺក្រុមហ៊ុនបានស្នើសុំវិនិយោគលើការ កែច្នៃសំរាមទៅជាថាមពលអគ្គិសនីលើ២ខេត្ត គឺខេត្តព្រះសីហនុ និងខេត្តសៀមរាប ដែលការបំប្លែង ថាមពលអគ្គិសនីទាំង២ខេត្តខាងលើនេះ ក្រុមហ៊ុនគ្រោងចំណាយទុនវិនិយោគចំនួន ៨៦លានដុល្លារ អាមេរិក និងគ្រោងមានតម្លៃលក់ទៅអគ្គិសនីកម្ពុជា។
លោករដ្ឋមន្ត្រី បានគាំទ្រ និងបានលើកឡើងថា ការគិតគូពីការងារគ្រប់គ្រងសំរាម និងកាកសំណល់ និងការកែច្នៃ គឺជាគោលដៅសំខាន់ដែកក្រសួងត្រូវជំរុញឱ្យមានការអនុវត្ត ស្របតាម បច្ចេកវិទ្យាទំនើបដែលជាលទ្ធភាពយើងអាចធ្វើបាន។ ជាក់ស្តែង នៅក្នុងជំនួបពិភាក្សាលើការកែច្នៃ សំរាមទៅជាថាមពលអគ្គិសនី លោករដ្ឋមន្ត្រី ក៏បានបញ្ជាក់ផងដែរ ដោយស្នើឱ្យមានការគិតគូអំពីតម្លៃ នៃការលក់ថាមពលដែលបម្លែងពីសំរាម និងអគ្គិសនីដែលផលិតបានមកត្រូវលក់នៅកន្លែងណា ព្រោះ ជាផ្នែកមួយ ដើម្បីចូលរួមក្នុងវិស័យបរិស្ថាន។ ជាការឆ្លើយតប ក្រសួងបរិស្ថាន ក៏បាននិងកំពុងយក ចិត្តទុកដាក់កម្រិតគោលនយោបាយក្នុងការរៀបចំកែលម្អប្រព័ន្ធគ្រប់គ្រងសំណល់រឹង សំរាម ការរៀបចំក្រុង ការរៀបចំទីលានចាក់សំរាម ជំរុញការកែច្នៃនិងការប្រើប្រាស់ឡើងវិញ តាមរយៈការសហការជាមួយ ក្រុមហ៊ុនទទួលទិញអេតចាយ ក្រុមហ៊ុនវិនិយោគ និងដៃគូអភិវឌ្ឍន៍នានា ដើម្បីធ្វើយ៉ាងណាឱ្យ សុខភាព សោភណ្ឌភាព នៃការអនុវត្តប្រកបដោយប្រសិទ្ធភាព និងការរស់នៅរបស់ប្រជាជនកាន់តែ ប្រសើរឡើង៕ ដោយ ៖ បញ្ញាស័ក្តិ
