រាជធានីភ្នំពេញ ៖ មន្ទីរពេទ្យព្រះកុសមៈ ឬហៅពេទ្យលោកសង្ឃ ដែលបច្ចុប្បន្នបានប្ដូរឈ្មោះទៅជាមន្ទីរពេទ្យមិត្តភាពកម្ពុជា-ចិន ព្រះកុសមៈ មានប្រភពព័ត៌មានមួយចំនួនអះអាងថា សព្វថ្ងៃនេះ កំពុងកើតមានអំពើពុករលួយកិបកេងថវិកាជាតិជាច្រើន នៅក្រោមការដឹកនាំដោយ លោក តាន់ សុគុន្ធ ជានាយកមន្ទីរពេទ្យ ដែលអាចនាំឱ្យបាត់បងថវិកា ឬចំណាយថវិកាជាតិខ្ជះខ្ជាយរាប់ពាន់លានរៀលក្នុង១ឆ្នាំៗ។
ប្រភពបានឱ្យដឹងបន្តថា គ្រាន់តែការងារជួសជុល និងលាប់ថ្មាំតិចតួច ផ្នែកខ្លះនៅអាគារជាន់ទី២ និងទី៣ នៃអាគារធំ របស់មន្ទីរពេទ្យមួួយនេះ គឺបានចំណាយថវិកាជាតិ ក្នុងឆ្នាំ២០១៧ អស់ថវិកា រហូតដល់ចំនួន៣១២០លានរៀល ឬស្មើជាង ៧៧ម៉ឺនដុល្លារអាមេរិក។
ដោយឡែកសម្រាប់ឆ្នាំ២០១៨នេះ ប្រភពព័ត៌មានបានអះអាងថា អ្នកគ្រប់គ្រងមន្ទីរពេទ្យលោកសង្ឃ ក៏បានចំណាយថវិកាខ្ទង់ ៣ ៣៨០លានរៀល ដើម្បីជួសជុលអាគារធំ នៅជាន់ផ្ទាល់ដី និងជាន់ទី១ រួមព្រមទាំងធ្វើដំបូលទែរាស់ ហើយ បានជ្រើសរើសក្រុមហ៊ុន ភី អេស ឌី អិន ខម មើស ដដែលជាអ្នកទទួលការងារជួសជុលនេះ។
ប្រភពព័ត៌មានដដែល បានបញ្ជាក់ថា ការជួសជុលអាគារធំលើកនេះ គឺបានធ្វើឡើងតាមរយៈការដេញថ្លៃ ខុសពីលើកមុន ដោយលើកនេះ មន្ទីរពេទ្យនេះបានប្រគល់កិច្ចសន្យាឱ្យ ក្រុមហ៊ុន ភី អេស ឌី អិន ខម មើស ជាអ្នកទទួលការ តាមរយៈចចារថ្លៃ ប៉ុន្តែការដេញថ្លៃ ឬការចចារថ្លៃ ដែល លោក តាន់ សុគន្ធ នាយកមន្ទីរពេទ្យព្រះកុសុមៈ ហៅពេទ្យលោកសង្ឃ បានធ្វើជាមួយក្រុមហ៊ុន ភី អេស ឌី អិន ខម មើស គឺសុទ្ធតែជាសកម្មភាពឃុបឃិតគ្នា ដើម្បីកេងប្រវ័ញ្ចថវិកាជាតិចែកគ្នា ដោយធ្វើគម្រោងបំប៉ោងតម្លៃខុសពីតម្លៃទីផ្សារទ្វេគុណរាប់ដង។ ចំណែកក្រុមហ៊ុនផ្សេងៗ ទោះដាក់តម្លៃដេញថ្លៃទាបយ៉ាងណា ក៏ លោកនាយកមន្ទីរពេទ្យ តាន់ សុគន្ធ មិនទទួលយកដែរ ព្រោះការចំណាយនេះជាថវិការដ្ឋ ហើយទំនងជាអាចឲ្យ លោក តាន់ សុគន្ធ បានចំណេញថវិកាខ្លះៗ ពីការងារជួសជុសអាគារ គឺវាទាល់តែក្រុមហ៊ុននោះ ជាបក្ខពួក របស់ពួកគាត់ ទើបមានប្រយោជន៍ដល់រូបគាត់។
បញ្ហានេះត្រូវគេសង្ស័យថា លោក តាន់ សុគន្ធ នាយកមន្ទីរពេទ្យព្រះកុសុមៈ ហៅពេទ្យលោកសង្ឃ និងបក្ខពួក អាចប្រើល្បិចសហការគ្នាលេបត្របាក់ថវិកាជាតិ តាមរយៈធ្វើការជួសជុល និងលាបថ្នាំអាគារជាន់ទី២ និងជាន់ទី៣ នៃអាគារធំ របស់មន្ទីរពេទ្យកាលពីឆ្នាំ២០១៧។ ហើយថា នៅឆ្នាំ២០១៨នេះ លោកនាយកមន្ទីរពេទ្យព្រះកុសុមៈ ហៅពេទ្យលោកសង្ឃ នៅបន្តប្រើក្បាច់ចាស់ដដែល ដោយគ្រាន់តែប្ដូររូបភាពពីចចារថ្លៃ មកដេញថ្លៃបែបចងមុង ឬលេងល្បិចឆ្ពឹនភ្នែក ជាមួយក្រសួងពាក់ព័ន្ធ និងក្រុមអធិការកិច្ច ឬ សវនកម្មតែប៉ុណ្ណោះ។
ប្រភពព័ត៌មានឲ្យដឹងបន្តថា សកម្មភាពខាងលើនេះ អាចជាការឃុបឃិតជាលក្ខណៈប្រព័ន្ធ ដើម្បីបានប្រយោជន៍ចែកគ្នាដាក់ហោប៉ៅ ដោយថ្លៃចំណាយ ទៅលើការងារជួសជុលអាគារមន្ទីរពេទ្យលោកសង្ឃនេះ មានតម្លៃលើសទីផ្សាររាប់សិបដង។ ព្រោះថា ការជួសជុលអាគារមន្ទីរពេទ្យ កាលពីឆ្នាំ២០១៧ ពុំមានការដាក់ដេញថ្លៃនោះទេ គឺជាការចរចាថ្លៃ ដោយគេចាប់យកក្រុមហ៊ុន ភី អេស ឌី អិន ខម មើស ដែលជាបក្ខពួកមកជួសជុលតែម្ដង។ អញ្ចឹងហើយបានជាមានការជួសជុលបន្តិចបន្តួច គឺត្រឹមអាគារតែ២ជាន់សោះ ត្រូវចំណាយលុយរដ្ឋអស់ដល់ ៣១២០លានរៀល ឬស្មើជាង ៧៧ម៉ឺនដុល្លារ បូករួមនិងការជួសជុលអាគារ ដដែលនៅជាន់ផ្ទាល់ដី និងជាន់ទី១ រួមព្រមទាំងធ្វើដំបូលទែរាស់ ឆ្នាំ២០១៨ ត្រូវចំណាយថវិកាជាតិបន្ថែមចំនួនខ្ទង់ ៣៣៨០លានរៀលទៀត។ ដូច្នេះអាគារធំ របស់មន្ទីរពេទ្យព្រះកុសុមៈ ហៅពេទ្យលោកសង្ឈ ដែលមានស្រាប់គ្រាន់ តែចំណាយជួសជុល ២ឆ្នាំជាប់គ្នា អស់ថវិកាជាតិសរុបរហូតដល់ ៦៥០០ លានរៀល ឬស្មើ ១៦០ ០០០០ដុល្លារ (មួយលានប្រាំមួយសែនដុល្លារ) ទៅហើយ ។
ផ្តើមពីបញ្ហានេះ ប្រភពព័ត៌មាន សង្កត់ធ្ងន់ថា គួរតែថ្នាក់ដឹកនាំក្រសួងសុខាភិបាល- ក្រសួងសេដ្ឋ និងហិរញវត្ថុ ជាពិសេសអង្គភាពប្រឆាំងអំពើពុករលួយ ជួយបញ្ជូនមន្ត្រីជំនាញចុះអង្កេតពិនិត្យស្រាវជ្រាវបញ្ហាមិនប្រក្រតីខាងលើនេះជាបន្ទាន់។ ព្រោះការចំណាយថ្លៃជួសជុលអាគារនៅមន្ទីរពេទ្យលោកសង្ឃនេះ ទំនងជាអាចមានអំពើពុករលួយយ៉ាងសម្បើម។ ហើយអ្នកទទួលការ ក្នុងការងារជុសជុល មន្ទីរពេទ្យលោកសង្ឃឆ្នាំនេះ ក៏មានមុខដដែលៗ ចំណែកគណៈកម្មាធិការលទ្ធកម្ម ក៏មុខដដែលៗ ដែលជារឿងគួរឲ្យសង្ស័យបំផុត។
ប្រភពព័ត៌មានបញ្ជាក់បន្ថែមថា ចំពោះការចរចារថ្លៃ ជួសជុល និងលាបថ្នាំអាគារមន្ទីរពេទ្យលោកសង្ឃ ឬមន្ទីរពេទ្យកម្ពុជា-ចិន ធ្វើឡើងនៅថ្ងៃទី២១ ខែសីហា ឆ្នាំ២០១៧ រវាង លោក តាន់ សុគន្ធ នាយកមន្ទីរពេទ្យព្រះកុសុមៈ ហៅពេទ្យលោកសង្ឃ ជាមួយក្រុមហ៊ុន ភី អេស ឌី អិន ខម មើស ដោយតម្លៃជួសជុលអាគារធំជំហ៊ានទី១ នៅជាន់ទី២ និងទី៣ មានតម្លៃ៣ ១២០ បីប៊ីលាន (មួួយរយម្ភៃលានរៀល)គត់ ឬស្មើជាង៧៧ម៉ឺនដុល្លារអាមេរិក។
បញ្ហានេះ ត្រូវបានក្រុមអ្នកបច្ចេកទេស ខាងសំណង់ អះអាងថា បើត្រឹមតែការងារជួសជុលអាគារពីជាន់ផ្ទាល់ដី ដល់ជាន់ទី៣ ដោយគ្រាន់តែឈូសទីកន្លែងខ្លះ និងបូកស៊ីម៉ងត៍ថ្មី រួចលាប់ថ្នាំ អាចត្រូវចំណាយថវិកាជាតិទាំង២លើក អស់ប្រមាណត្រឹម ២០ម៉ឺនដុល្លារអាមេរិកតែប៉ុណ្ណោះ។ ប៉ុន្តែមិនគួរណាត្រូវចំណាយថវិកាអស់ដល់ទៅជាង ១៦០ម៉ឺនដុល្លារអស់មេរិកនោះទេ។ ហើយបើចំណាយខ្ទង់ត្រឹមមួយលានដុល្លារ អាចធ្វើអាគារធំទំហំដូចគ្នា និងអាគារធំ ដែលជុសជុលបានទាំងមូល និងសល់លុយខ្លះទៀត។
ប្រភពឱ្យដឹងបន្តទៀតថា ការជួសជុលនោះ គឺមានការដោះដូរការ៉ូ បូកជញ្ជាំង លាបថ្នាំទាំងក្នុង ទាំងក្រៅ ដូរបង្អួច ទ្វារ ប៉ុន្តែគេមិនបំពាក់គ្រឿងបរិក្ខាពេទ្យ ឬសង្ហារឹមឡើយ។ ដូច្នេះតួលេខពីលើកអស់ថវិកាដល់ទៅជាង ១៦០ ម៉ឺនដុល្លារនោះ ជាតំលៃខ្ពស់កប់ពពក ហើយតម្លៃនេះ អាចស្ថិតក្នុងភាពអាថ៌កំបាំង ដែលស្ថាប័នអង្គភាពប្រឆាំងអំពើពុករលួយ មិនត្រូវមើលរំលងនោះទេ។
ទាក់ទិនបញ្ហានេះ កាលពីថ្ងៃព្រហស្បតិ៍ ទី២៥ ខែតុលា ឆ្នាំ២០១៨ អ្នកយកព័ត៌មានយើងមិនអាចសុំការបំភ្លឺពី លោក តាន់ សុគន្ធ នាយកមន្ទីរពេទ្យព្រះកុសុមៈ ហៅពេទ្យលោកសង្ឃ បានទេ ដោយទូរស័ព្ទចូល ហើយលើកនិយាយដោយដឹងថាជាអ្នកកាសែត លោក តាន់ សុគន្ធ គាត់និយាយថាជាប់រវល់ជួបលោករដ្ឋមន្ត្រី រួចក៏ចុចបិទទូរស័ព្ទ ហើយក្រោយមក ក៏លែងលើកទូរស័ព្ទតែម្ដង៕ ដោយ ៖ ដែនសីមា
