នៅលើបណ្តាញសង្គមពេលនេះ កំពុងនាំគ្នាភ្ញាក់ផ្អើលករណីមានជនជាតិជនបរទេសមួយក្រុមស្លៀកពាក់លក្ខណៈជាជនជាតិអារ៉ាប់ ឬ ឥណ្ឌា បានប្រើល្បិចជ្រុះបាត់កាបូបលុយ…. ហើយធ្វើជាសុំអាហារហូបបណ្តោះអាសន្ន និងសុំលុយខ្លះបន្តដំណើរ ប៉ុន្តែ នៅពេលប្រជាពលរដ្ឋ រាយការណ៍ករណីនេះទៅអាជ្ញាធរ ស្រាប់តែពួកគេដឹង ក៏ដាក់មេប្រូចដោយពុំលាសូម្បីមួយម៉ាត់ ។
យោងតាមគណនីហ្វេសប៊ុក Duch BunChhai បានចែករំលែករឿងរ៉ាវដ៏គួរឲ្យភ្ញាក់ផ្អើលនេះ ក្នុងបំណងឲ្យបងប្អូនប្រជាពលរដ្ឋទាំងអស់បានដឹង និងប្រុងប្រយ័ត្នចាប់ពីពេលនេះទៅថា៖
«នាថ្ងៃពុធ ទី24 ខែតុលា ឆ្នាំ2018នេះ នៅវេលាម៉ោងជាង11ថ្ងៃត្រង់ មានករណីគួរឲ្យសង្ស័យមួយបានកើតឡើងនៅផ្ទះអ៊ំរបស់ខ្ញុំ ស្ថិតនៅភូមិលៀប ឃុំកណ្ដៀងរាយ ស្រុកស្វាយទាប ខេត្តស្វាយរៀង ដោយមានរថយន្តLexusRX300 មួយគ្រឿង ដែលមានស្លាកលេខភ្នំពេញ 2AO-4521 បានបើកចូលមកដល់ក្នុងផ្ទះដែលមានគ្នាបីបួននាក់(ប្រុស&ស្រី) ដែលស្លៀកពាក់របៀបពពួកអារ៉ាប់ ឫឥណ្ឌា រួចហើយបានសួរប្អូនស្រីថា ចេះនិយាយភាសាអង់គ្លេសឫអត់ ដោយប្រាប់ថាពួកគេជាជនជាតិអារ៉ាប់ ហើយបានធ្វើដំណើរមកពីក្រុងបាវិត ហើយបានជ្រុះបាត់កាបូប(ATM,Passport,Smartphone,លុយ,…) ថែមទាំងឥឡូវនេះឡានក៏ជិតអស់សាំងទៀត ហើយបានបន្តប្រាប់ទៀតថាពួកគេមានមិត្តភ័ក្រនៅខេត្តកំពង់ចាម ភ្នំពេញ… ប៉ុន្តែគ្មានអ្វីទាក់ទងទៅពួកគេ ទើបសុំខ្ចីទូរស័ព្ទcall សុំអាហារហូប និងសុំលុយខ្លះដើម្បីចាក់សាំងឡាន ដែលនេះអាចជាឱកាស ឫល្បិចរបស់ពួកគេដើម្បីដាក់ថ្នាំ ឫក៏ធ្វើអ្វីផ្សេងទៀតដែលអាចនឹងបង្ករគ្រោះថ្នាក់ដល់យើងក៏ថាបាន។ ភ្លាមៗនោះ ប្អូនស្រីក៏បានទាក់ទងហៅបងប្អូន ទើបធ្វើឲ្យស្ថានការណ៍ដូចជាមិនអំណោយផលដល់ពួកគេ រំពេចនោះពួកគេក៏បានឡើងឡានចេញទៅវិញយ៉ាងលឿន។
យើងក៏បានរាយការណ៍ទៅខាងសមត្ថកិច្ចរួចរាល់ហើយដែរ។ ហើយសូមបញ្ជាក់ផងដែរថា ហេតុការរបៀបនេះ ធ្លាប់កើតមានឡើងជាច្រើនកន្លែងរួចមកហើយដូចជានៅភ្នំពេញ និងតាមបណ្ដាខេត្តដទៃផ្សេងទៀត ហេតុនេះហើយ សូមមេត្តាបងប្អូនទាំងអស់ប្រុងប្រយ័ត្ន ប្រសិនបើជួបមានករណីបែបនេះកើតឡើង សូមរួសរាន់ប្រញាប់រាយការណ៍ទៅដែនសមត្ថកិច្ច ដើម្បីចុះអន្តរាគម និងអាចឃាត់ខ្លួនជនទាំងនោះផងដែរ។ សូមអរគុណ…!» ។
ទន្ទឹមនេះផងដែរ ក៏មានអ្នកលេងហ្វេសប៊ុកជាច្រើន បានចូលខមិនថា ពួកគេក៏បានស្គាល់ក្រុមនេះ ដែលបានធ្វើ «ស្ទៃល៍» ស្រដៀងៗគ្នានេះរួចមកហើយ ៕ ដោយ៖ ឧត្តម
