ខេត្តស្វាយរៀង ៖ លោក ឆាន់ សាផាន រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ តំណាងឯកឧត្ដម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់និងលោក រស់ ផារិទ្ធ អភិបាលរង ខេត្តស្វាយរៀង តំណាងលោកអភិបាលខេត្តនៅថ្ងៃទី២៥ ខែតុលា ឆ្នាំ២០១៨នេះ បានអញ្ជើញជាអធិបតីីីនៅក្នុងពិធីបើកសិក្ខាសាលាផ្សព្វផ្សាយស្តីពី «គោលនយោបាយលើកទឹកចិត្ត និងឯកសារបច្ចេកទេសដែលគាំទ្រការងារគ្រប់គ្រងលំនៅឋានដែលមានតំលៃសមរម្យ» ដែលពិធីនេះបានប្រព្រឹត្តទៅនាសាលប្រជុំសណ្ឋាគារវ៉ៃគោ ក្រុងស្វាយរៀង ខេត្តស្វាយរៀង។
សិក្ខាសាលានេះក៏ មានការអញ្ជើញចូលរួមផងដែរពីសំណាក់អស់ លោក លោកស្រីជាមន្ត្រីជំនាញនៃក្រសួងរៀបចំដែនដី នគរូបនីយកម្ម និងសំណង់ ប្រធាន អនុប្រធាន និងមន្ត្រីពាក់ព័ន្ធ នៃមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត លោក លោកស្រីប្រធានមន្ទីរ-អង្គភាព លោកអភិបាលរងក្រុង ស្រុក លោកចៅសង្កាត់ មេភូមិ និងតំណាងក្រុមហ៊ុនសាងសង់ក្នុងខេត្ត ជាច្រើនរូបទៀត។
មានប្រសាសន៍ស្វាគមន៍នៅក្នុងឱកាសនោះ លោក រស់ ផារិទ្ធ អភិបាលរង ខេត្ត ស្វាយរៀងក៏បានជម្រាបជូនអំពីស្ថានភាពទូទៅ ការអភិវឌ្ឍរីកចម្រើនរបស់ខេត្ត ស្ថានភាពនៃមុខរបរ និងជីវភាពរស់នៅរបស់ប្រជាពលរដ្ឋក្នុងខេត្តដែលចេះតែមានការកើនឡើងជាលំដាប់ពីមួយថ្ងៃទៅមួយថ្ងៃនៅក្នុងបរិបទនៃប្រទេសជាតិកំពុងមានសុខសន្តិភាព និងការអភិវឌ្ឍរីកចម្រើនលើគ្រប់វិស័យក្រោមការដឹកនាំប្រកបដោយគតិបណ្ឌិតរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ។ ក្នុងនាមលោកអភិបាលខេត្ត លោកក៏បានថ្លែងអំណរគុណចំពោះក្រសួងរៀបចំដែនដី នគរូបនីយកម្ម និងសំណង់ ដែលបានសហការរៀបចំសិក្ខាសាលាដ៏មានសារៈសំខាន់នេះឡើង ព្រមទាំងបានបង្ហាញពីជំនឿជឿជាក់យ៉ាងមុតមាំថា គោលនយោបាយស្ដីការលើកទឹកចិត្ត និងការបង្កើតកម្មវិធីជាតិសម្រាប់ការអភិវឌ្ឍលំនៅឋានតម្លៃសមរម្យ និងឯកសារបច្ចេកទេសគាំទ្រ ដែលត្រូវលើកយកមកផ្សព្វផ្សាយនៅក្នុងអង្គសិក្ខាសាលានៅថ្ងៃនេះ នឹងរួមចំណែកយ៉ាងសំខាន់ ក្នុងកិច្ចលើកកម្ពស់សុខុមាលភាព និងសេចក្តីថ្លៃថ្នូររបស់ប្រជាជនកម្ពុជាជាទូទៅ និងជាពិសេសក្រុមគ្រួសារមានប្រាក់ចំណូលទាប និងមធ្យម ព្រមទាំងគ្រួសារងាយរងគ្រោះ នៅទូទាំងប្រទេសនិយាយជារួម និងនៅក្នុងខេត្តស្វាយរៀងនិយាយដោយឡែក នឹងមានកាលានុវត្តភាព និងលទ្ធភាពខ្ពស់ជាងមុន ក្នុងការទទួលបានលំនៅឋានសមរម្យ ជាមួយតម្លៃដែលអាចឆ្លើយតបលទ្ធភាពចំណូលរបស់ពួកគាត់ ។
មានប្រសាសន៍ក្នុងឱកាសនោះផងដែរ លោករដ្ឋលេខាធិការ បានបញ្ជាក់ជូនអំពីគោលបំណងនៃការរៀបចំសិក្ខាសាលានៅថ្ងៃនេះ គឺដើម្បីផ្សព្វផ្សាយអំពីឯកសារគតិយុត្តិមួយចំនួន ដែលនាយកដ្ឋានមូលនិធិ និងឥណទានលំនៅឋាន នៃអគ្គនាយដ្ឋានលំនៅឋាន បានរៀបចំឡើងដែលមានលក្ខណៈសម្បត្តិអតិថិជនគោលដៅដែលអាចទទួលបានសិទ្ធិ ក្នុងការទិញលំនៅឋានតម្លៃសមរម្យ លក្ខខណ្ឌកំណត់ក្រោយការទិញលំនៅឋានតម្លៃសមរម្យ និងនិតិវិធី នៃការដាក់ពាក្យស្នើសុំទិញ ឬជួលលំនៅឋានតម្លៃសមរម្យ ។ ជាមួយនេះ លោកក៏បានបញ្ជាក់បន្ថែមថា អាស្រ័យដោយកំណើនតម្រូវការលំនៅឋាន និងការតាំងទីលំនៅថ្មី មានការកើនឡើងយ៉ាងឆាប់រហ័ស ដែលបានជះឥទ្ធិពលដល់សណ្តាប់ធ្នាប់របៀបរៀបរយ សន្តិសុខ សុវត្ថិភាព និងសោភ័ណ្ឌភាពទីក្រុង ជាពិសេសដោយមើលឃើញថាលទ្ធភាពទទួលបានលំនៅឋានសមរម្យ មានសភាពកាន់តែទាបទៅៗ ទើបរាជរដ្ឋាភិបាលក្រោមការដឹកនាំរបស់សម្ដេចតេជោនាយករដ្ឋមន្ត្រី បានដាក់ចេញនូវគោលនយោបាយស្ដីការលើកទឹកចិត្ត និងការបង្កើតកម្មវិធីជាតិសម្រាប់ការអភិវឌ្ឍលំនៅឋានតម្លៃសមរម្យ និងឯកសារបច្ចេកទេសគាំទ្រមួយចំនួន ដើម្បីធានាសិទ្ធទទួលបានលំនៅឋានសមរម្យ ជូនប្រជាជនផង និងសម្រាប់គាំទ្រដល់ការរៀបចំអភិវឌ្ឍន៍នគរូបនីយកម្មមួយប្រកបដោយប្រសិទ្ធភាព ដែលអាចទ្រទ្រង់សុខមាលភាព និងវិបុលភាព សេដ្ឋកិច្ច និងសង្គមផង ៕ វ៉ៃគោ
