ខេត្តក្រចេះ ៖ ប្រជាពលរដ្ឋនៅក្នុងស្រុកស្នួល ក៏ដូចជាពលរដ្ឋ នៅក្នុងខេត្តក្រចេះ បាននិយាយកោតសរសើរ ចំពោះទង្វើ របស់លោកឧកញ៉ា គង់ ក្រឹង និងលោកស្រី ម៉ាន សារ៉ស់ ដែលតែងតែបរិច្ចាគឧបត្ថមថវិកាផ្ទាល់ខ្លួន ជួយដល់ការកសាង និងអភិវឌ្ឃន៍គ្រប់ហេដ្ឋារចនាសម្ព័ន្ធ ដូចជា ថ្នល់ ស្ពាន សាលារៀន មន្ទីរពេទ្យវត្តអារាម ជាដើម ។
ប៉ុន្តែប្រជាពលរដ្ឋនៅក្នុងស្រុកស្នួលបានសម្តែងនូវការងឿងឆ្ងល់ថា តើទ្រព្យសម្បត្តិបស់លោកឧកញ៉ា គង់ ក្រឹង និងលោកស្រី ម៉ាន សារ៉ស់ បានមកពីណា ហេតុអ្វីបានជាលុយទាំងនោះ ចាយនិងបរិច្ចាគមិនចេះអស់ តើពួកគាត់រកស៊ីអ្វីទៅបានជាមានទ្រព្យសម្បត្តិហូហៀដូចគេចាក់គរអ៊ីចឹង។ ពលរដ្ឋ បានលើកឡើងជាចម្ងន់ថា តើលោកឧកញ៉ាមានមុខរបរអ្វី ឲ្យពិតប្រាកដនោះដែរ បានជាមានថវិការបើកឲ្យអាជ្ញាធរមានសមត្ថកិច្ច និងអ្នកកាសែត ដល់ទៅរាប់រយស្ថាប័ន ដោយខ្លះគិតជាមួយអាទិត្យ និងខ្លះទៀតគិតជាខែទៀតផងនោះ? ចំណែកប្រជាពលរដ្ឋមួយចំនួនទៀត បានលើកឡើងថា លោកឧកញ៉ា គង់ ក្រឹង និងលោកស្រី ម៉ាន សារ៉ស់ មិនមានមុខពិតប្រាកដនោះទេ គឺគ្រាប់តែដឹកឈើលេងៗតែប៉ុណ្ណឹង គ្មានរកស៊ីអ្វីធំដុំនោះទេ។
តែចំណុចដែលពលរដ្ឋ លើកឡើងថា មិនសរសើមិនបាន ចំពោះលោកឧកញ៉ា គង់ ក្រឹង នោះគឺ លោកអាចយកផ្លូវសាធារណៈរបស់រដ្ឋ ចាប់ពីគីឡូម៉ែត្រលេខ៨៨ រហូតដល់ព្រំដែនវៀតណាម ដើម្បីកាងឲ្យឈ្មួញដឹកឈើគ្រប់ប្រភេទឆ្លងដែនយ៉ាងមានក្ដីសុខបំផុតនោះ ហើយលោកគ្រាន់តែជាអ្នកចាំដកតុងតែប៉ុណ្ណោះ ។
ជុំវិញបញ្ហានៃការកាងឲ្យក្រុមឈ្មួញដឹកឈើឆ្លងដែនទាំងនោះ មានគម្លាតសងខាងច្រកទ្វារអន្តរជាតិត្រពាំងស្រែ វ៉ាលឺ គឺចំងាយ៥០០ម៉ែត្រ ការដឹកជញ្ជូនឈើនោះ គឺមិនមានសមត្ថកិច្ចឬជំនាញណា មកពាក់ព័ន្ធឬប៉ះពាល់បានឡើយ មូលហេតុក្រុមឈ្មួញទាំងនោះ បានអះអាងថា ការដឹកជញ្ជូនឈើនេះ បានបង់ពន្ធជូនលោកឧកញ៉ារួចហើយ ។
ការធ្វើចរាចរឈើរបស់ពួកគេសព្វថ្ងៃនេះ បើគ្មានលោកឧកញ៉ាកាងឲ្យទេ គឺពុំអាចទៅរួចនោះឡើយ។ ជាពិសេសការធ្វើចរាចរឈើឆ្លងដែននៅលើទឹកដីនៃខេត្តក្រចេះ ឆ្លងដែនទៅប្រទេសវៀតណាម ជារៀងរាល់ថ្ងៃនេះ គឺតាមច្រករបៀង ចំណុចដេ១ ដេ២ និងដេ៣ យ៉ាងពិតប្រាកដណាស់។ ការធ្វើចរាចរឈើឆ្លងដែនរបស់ក្រុមឈ្មួញទាំងនេះ តើអាជ្ញាធរ សមត្ថកិច្ច និងជំនាញដែលពាក់ព័ន្ធ ទាំងថ្នាក់ខេត្តនិងថ្នាក់ជាតិ មានបានជ្រាបដែរឬទេ? ជុំវិញរឿងកាចោទប្រកាន់នេះ ពុំអាចទំនាក់ទំនងសុំការបកស្រាយពីលោកឧកញ៉ាបានទេ ៕ ដោយ៖រចនា
