ស្ថាប័នស៊ើបអង្កេតអាមេរិក បានចាប់ឃាត់ខ្លួនជនសង្ស័យម្នាក់ទាក់ទងដល់ករណីគំរាមវាយប្រហារដោយគ្រាប់បែក «សំបុត្រ» ទៅលើអតីតប្រធានាធិបតី និងមន្ត្រីជាន់ខ្ពស់អាមេរិក។
មន្ត្រីសន្តិសុខអាមេរិក បានបង្ហើបប្រាប់ Reuters ថា «យើងខ្ញុំបានចាប់ឃាត់ខ្លួនមនុស្សម្នាក់ ហើយកំពុងស្រាវរកមុខសញ្ញាមួយចំនួនទៀត។
បើតាម CNN វិញឱ្យដឹងថា ជនល្មើសដំបូងដែលត្រូវបានចាប់ឃាត់ខ្លួនមានឈ្មោះ Cesar Sayoc អាយុ៥៦ឆ្នាំ។ បុរសនេះត្រូវបានចាប់ខ្លួននៅក្រុង Plantation រដ្ឋ Florida អាមេរិក ដោយផ្អែកលើលទ្ធផលត្រួតពិនិត្យ DNA ដែលប្រមូលបានពីវត្ថុតាងទាំងឡាយ។
Cesar Sayoc ត្រូវបានគេដឹងថា ធ្លាប់មានអតីតទោស ។ ពិសេសរថយន្តដឹកជញ្ជូនរបស់បុរសនេះត្រូវបានពណ៌នាថា«បិទជិតទៅដោយសារគាំទ្រប្រធានាធិបតីអាមេរិក Donald Trump និងសារប្រឆាំងអ្នកស្រី Hillary Clinton ។
តាមខ្សែវីដេអូមួយពីកន្លែងកើតហេតុ បង្ហាញឱ្យឃើញរថយន្តរបស់ Sayoc ត្រូវបានសមត្ថកិច្ចរុំជិតមុនពេលសណ្តោងយកទៅ។
តាម RT, ការស្រាវជ្រាវត្រូវបានប្រមូលផ្តុំនៅរដ្ឋ Florida ព្រោះតែកញ្ចប់បញ្ញើប្រៃសណីយ៍ទាំងនោះសុទ្ធតែដាក់ អាសយដ្ឋាន ការិយាល័យស្ត្រីអ្នកតំណាងរាស្ត្រ Debbie Wasserman Schultz ។
គួររំលឹកថា កញ្ចប់ប្រៃសណីយ៍ជាច្រើនដែលមានផ្ទុករំសេវផ្ទុះនិងគ្រាប់បែកកែច្នៃត្រូវបានបញ្ជូនទៅកាន់អាសយដ្ឋាន របស់អតីតឥស្សរជនគណបក្សប្រជាធិបតេយ្យ ជាអាទិ៍លោក Barack Obama, Bill Clinton អតីតអគ្គមហាអយ្យការ Eric Holder ព្រមទាំងស្នាក់ការមួយចំនួនរបស់សារព័ត៌មាន CNN ៕សូយន