មានរឿងដ៏គួរឲ្យភ្ញាក់ផ្អើលមួយ បានកើតឡើងនៅទីក្រុង Ilagan ខេត្ត Isabela ប្រទេសហ្វីលីពីន កាលពីថ្ងៃទី ០១ ខែកញ្ញា ឆ្នាំ ២០១៧ នៅពេលដែលក្មេងស្រីម្នាក់ដែលត្រូវបានសន្មត់ថាស្លាប់ទៅហើយ ត្រូវបានឪពុកម្តាយរបស់នាងគាស់ផ្នូរ យកមកពិនិត្យមើលឡើងវិញ នៅពេលដែលគ្រូមន្តអាគមម្នាក់បានប្រាប់ថា នាងនៅតែមានជីវិតនៅឡើយ បន្ទាប់យកទៅកប់អស់រយៈពេល ៣ ថ្ងៃ ។ ហើយអ្វីដែលធ្វើឲ្យឪពុកម្តាយរបស់នាងកាន់តែភ្ញាក់ផ្អើលនោះ គឺខ្លួនប្រាណរបស់នាងនៅតែទន់ធម្មតា ។
យោងតាមរបាយការណ៍សារព័ត៌មាន 98.5 Mhz RMN បានឲ្យដឹងថា ក្មេងស្រីដែលត្រូវបានសន្មត់ស្លាប់ខាងលើនេះ មានឈ្មោះ Jenny Rose Jacinto អាយុ ៤ ឆ្នាំ បានចាប់ផ្តើមឈឺគ្រុនក្តៅធ្ងន់កាលពីថ្ងៃទី២៨ ខែសីហា ឆ្នាំ២០១៧ ។ ទោះយ៉ាងណា ឪពុករបស់នាងឈ្មោះ Jimmy Jacinto និយាយថា កូនស្រីរបស់គាត់ត្រូវបាននាំយកទៅកាន់មន្ទីរពេទ្យខេត្ត Isabela នៅពេលស្ថានភាពជំងឺរបស់នាងកាន់តែធ្ងន់ធ្ងរទៅៗ បន្ទាប់នាំយកទៅព្យាបាលជាមួយគ្រូបុរាណអស់ជាច្រើននាក់មក ។ លោកបន្តថា នៅថ្ងៃពុធ កូនស្រីរបស់គាត់ត្រូវបានប្រកាសថាស្លាប់ ហើយសពរបស់នាងក៏ត្រូវបានកំណត់យកទៅកប់នៅថ្ងៃទី១ ខែកញ្ញា ។
ទោះយ៉ាងណា សាច់ញាតិរបស់គាត់ម្នាក់ឈ្មោះ Gemma Jacinto De Villa បានអះអាងថា គ្រូមន្តអាគមម្នាក់បានប្រាប់ថា ឪពុកម្តាយរបស់ក្មេងស្រីនោះគួរតែគាស់យកនាងចេញពីផ្នូរទៅ ព្រោះនាងនៅតែមានជីវិតនៅឡើយ ។ នៅពេលគ្រួសារគាស់ផ្នូរទាញបើកមឈូសលើកនាងចេញ ពួកគេពិតជារន្ធត់ចិត្តយ៉ាងខ្លាំង នៅពេលរកឃើញថាខ្លួនប្រាណរបស់នាងនៅតែមានសភាពទន់ធម្មតា ហើយសូម្បីពុំមានលក្ខណៈប្រែប្រួលនៃរាងកាយរបស់នាងទៀតផង ។
ឥឡូវនេះ ឪពុកម្តាយរបស់នាងកំពុងតាមឃ្លាំមើលស្ថានភាពរបស់សពកូនស្រីរបស់ពួកគេ និងរង់ចាំមើលពីសញ្ញាថាតើអាចនឹងមានសង្ឃឹមនៅរស់ ឬ យ៉ាងណា ៕ ដោយ៖ ឧត្តម (ប្រភព៖ trendingnews.today)
