ខេត្តកោះកុង៖ សមត្ថកិច្ចនគរបាលខេត្តកោះកុង បានឲ្យដឹងថា កម្មករសំណង់ម្នាក់បានស្លាប់ក្រោយបរិភោគត្រីក្រពតសមុទ្រជា អាហារ ពេលល្ងាច។
ជនរងគ្រោះ បានពុលធ្ងន់ធ្ងរ នៅចន្លោះម៉ោង ២ និង៤៨ នាទីយប់រំលងអាធ្រាត្រ ឆ្លងចូលថ្ងៃទី២៧ ខែ តុលា ឆ្នាំ២០១៨ នៅចំណុចអគារ អនុវិទ្យាល័យប៉ាក់ខ្លង ដែលកំពុងសាងសង់ថ្មី ស្ថិតក្នុងភូមិ១ ឃុំប៉ាក់ខ្លង ស្រុកមណ្ឌលសីមា ខេត្តកោះកុង ។
ជនរងគ្រោះឈ្មោះ ខៀវ ទិត ភេទ ប្រុស អាយុ ៥៨ ឆ្នាំ មុខរបរ កម្មករសំណង់ សាងសង់សាលារៀនប៉ាក់ខ្លង។ ជនរងគ្រោះរូបនេះ មានស្រុកកំណើត នៅឃុំស្ទោង ស្រុកស្ទោង ខេត្តកំពង់ធំ។
ភរិយាជនរងគ្រោះ បានឲ្យដឹងថា ប្តីរបស់គាត់បានបរិភោគ ត្រីក្រពត នៅពេលទទួលទានអាហារពេលល្ងាច ក៏ស្រាប់តែពេលចូលសំរាន ប្តីរបស់គាត់មានអាការៈខុសប្លែកពីធម្មតា រួចបានស្លាប់មិនទាន់បានបញ្ជូនទៅមន្ទីរពេទ្យនៅឡើយ។បន្ទាប់ពីទទួលបានដំណឹងពីគ្រួសារជនរងគ្រោះ កម្លាំងជំនាញ នៃអធិការដ្ឋាននគរបាលស្រុកមណ្ឌលសីមា សហការជាមួយក្រុមគ្រូពេទ្យជំនាញ ចុះធ្វើកោសល្យវិច័យសព ដោយមានការចូលរួមពីអាជ្ញាធរមូលដ្ឋាន និងភរិយាសព បញ្ជាក់ថា ជាករណីពុលត្រីក្រពត។
ក្រោយធ្វើកោសល្យវិច្ច័យរួច សពជនរងគ្រោះបានប្រគល់ជូនភិរិយាសព រៀបចំធ្វើបុណ្យតាមប្រពៃណី៕ ដោយ៖ ដែន សីមា
