ឧត្ដរមានជ័យ ៖ ក្រុមពលករឈើក្រញូងដែលឆ្លងដែន ចូលទៅកាប់ឈើ នៅទឹកដីថៃ បានអះអាងថា ពួកគេត្រូវបានមន្ត្រី យោធាសឹករង ក្រុងសំរោង ខេត្តឧត្ដរមានជ័យ ជំរិតទារលុយមិនបាន ទើបបាញ់គំរាម១គ្រាប់ កាលពីវេលាម៉ោង៩ព្រឹក ថ្ងៃទី២៤ ខែតុលា ឆ្នាំ២០១៨ នៅចំណុចអូរទឹកចោល ផ្លូវឫស្សីតោង ភូមិត្រពាំងត្រាវ សង្កាត់អន្សាយរាក់ ក្រុងសំរោង ខេត្តឧត្ដរមានជ័យ។
ការផ្ទុះអាវុធនេះ បង្កឡើងដោយ កងអនុសេនាធំលេខ៨ នៃសឹករង ក្រុងសំរោង ចំនួនពីររូប ទីមួយឈ្មោះ ចាន់ និងឈ្មោះ ស៊ុន ដែលជាអ្នកបាញ់បោះ។ ពួកគាត់បានចូលទៅកាប់ឈើ នៅក្នុងទឹកដីថៃ នៅពេលបានឈើហើយ ក៏អូសចេញមកវិញ លុះដល់ចំណុចកើតហេតុ ស្រាប់តែលេចមុខ មន្ត្រីយោធាខាងលើ មកគំរាមទារលុយ។
ប៉ុន្តែពួកគាត់មិនឲ្យ ដោយព្យាយាមគេច ស្រាប់តែមន្រីទាំងនោះបាញ់គំរាមតែម្ដង ធ្វើឲ្យពួកគាត់ភ័យខ្លាចរត់ចោលឈើ។ កន្លងមក ក្រុមពលករខ្មែររាប់សិបនាក់ ដែលចូលទៅកាប់ឈើ នៅថៃ គឺបានបង់លុយឲ្យមន្ត្រីយោធា មិនដែលខាន គឺពលករ ស្ពាយឈើចេញពីថៃ មកកម្ពុជាវិញ ជាប់១ខ្នងមនុស្ស ត្រូវបង់អស់ចំនួន១០ម៉ឺនរៀលក្នុងម្នាក់។ ប៉ុន្តែបើកាប់បានឈើច្រើន អូសមកគឺបង់ទៅតាមចំនួនឈើ អាចដល់៤០ម៉ឺនរៀលក្នុងម្នាក់។ ខណៈមន្ត្រីយោធា ចាំស្ទាក់យកលុយស្រាប់ៗនៅតំបន់ខ្នងភ្នំតែម្ដង។
សកម្មភាពបែបនេះដូចចែកភាគហ៊ុន ជាមួយពលករអញ្ចឹង ក្នុងនោះពលករអ្នកចេញកម្លាំង ឯមន្ត្រីយោធាចាំយកលុយស្រាប់។
នៅពេលពួកគាត់គេចមិនបង់លុយ ឲ្យតាមការកំណត់ ស្រាប់តែទាហាន មកដេញចាប់និងបាញ់ ដូចពេលកើតហេតុនេះអញ្ចឹង។
ឆ្លើយតបនិងការលើកឡើងខាងលើ លោកឧត្ដមសេនីយ៍ទោ តុន ញាន មេបញ្ជាការសឹករងខេត្តឧត្ដរមសនជ័យ បានបដិសេធថា មិនមែនជាករណីបាញ់សម្លុតមនុស្សអីទេ នេះជាការសាកកាំភ្លើង ព្រោះថាកាំភ្លើង ចាប់តាំងពីបើកមកមិនដែលបាញ់សាកល្បង៕ ដោយ៖រចនា