ស្ត្រីម្នាក់នៅក្នុងប្រទេសថៃ បានដាក់ពាក្យបណ្តឹងទៅប៉ូលីស បន្ទាប់ពីការកូម្ម៉ង់ទិញកាបូបម៉ាកល្បីនៅលើអនឡាញ លទ្ធផល ស្រាប់តែទទួលបានដបទឹកសុទ្ធ២ គួរឲ្យហួសចិត្តបំផុត ។
នារីរងគ្រោះឈ្មោះ Panhathai Lertsin-udom បាននាំយកភស្តុតាងនៃការកូម្ម៉ង់ទិញរបស់នាង ក្នុងនោះរួមមានវិកយប័ត្រទូទាត់អនឡាញ, ការសន្ទនាជាមួយអ្នកលក់ និងវីដេអូមួយ ទៅកាន់ប៉ុស្តិ៍ប៉ូលីស Muang កាលពីថ្ងៃអាទិត្យ ដើម្បីប្តឹងប្រឆាំងអ្នកលក់ដែលមានគណនី Instagram មួយដែលអ្នកលក់មានឈ្មោះថា B.PROMOTE ។
នាងនិយាយថា នាងបានកូម្ម៉ង់កាបូបមួយតឹក Celine កាលពីថ្ងៃអង្គារ បន្ទាប់ពីបានឃើញរូបភាពប្រូម៉ូតសិនមួយត្រូវបានបង្ហោះឡើងនៅលើគណនី Instagram ឈ្មោះ brandnameby_Qa ដែលអ្នកលក់មានឈ្មោះ B.PROMOTE ។
នាងបន្តថា នាងបានចំណាយលុយ ៣៧,០០០ បាត (១១២១ ដុល្លារ) សម្រាប់ការកូម្ម៉ង់នេះ បន្ទាប់ពីមានការបញ្ចុះតម្លៃ ៣,០០០ បាត ហើយបានផ្ទេរលុយទៅកាន់លេខគណនីធនាគារមួយ ដែលត្រូវបានបញ្ជូនឲ្យនាងដោយឈ្មោះ B.PROMOTE នៅថ្ងៃដដែលនោះ ។
អ្នកទិញចាញ់បោកគេរូបនេះ បានប្រាប់ Bangkok Post ថា៖ «ខ្ញុំបានសម្រេចចិត្តផ្ទេរលុយយ៉ាងលឿន ដោយសារខ្ញុំបានដឹងថា មានអ្នកទិញជាច្រើនបានតម្រង់ជួរគ្នា ដើម្បីទិញផលិតផលម៉ាកល្បីៗ» ។
បន្ទាប់ពីបង់លុយរួច នាងត្រូវបានប្រាប់ថា កាបូបនោះនឹងត្រូវបាននាំយកទៅឲ្យនាង ហើយត្រូវបានផ្តល់នូវលេខកូដកញ្ចប់ទំនិញ ដោយក្រុមហ៊ុនដឹកជញ្ជូន Kerry Express Thailand ។
ទោះយ៉ាងណា Panhathai បានចាប់ផ្តើមមានការសង្ស័យ នៅពេលនាងពុំអាចទាក់ទងជាមួយអ្នកលក់ B.PROMOTE ដោយគណនីរបស់ឈ្មោះនេះត្រូវបានបិទ ។
នៅពេលនាងទៅឆែកជាមួយក្រុមហ៊ុនដឹកជញ្ជូនឥវ៉ាន់ នាងត្រូវបានគេប្រាប់ថា ទំនិញនោះកំពុងដឹកជញ្ជូនមកពីអ្នកបញ្ជូនមក នៅក្នុងខេត្ត Chiang Mai ។ នៅពេលបុរសអ្នកដឹកជញ្ជូនម្នាក់បានមកដល់ជាមួយឥវ៉ាន់នោះ នាងបានស្នើរឲ្យគេជួយថតវីដេអូ ខណៈនាងចាប់ផ្តើមបើកមើលវា ។ ជាលទ្ធផល នាងពិតជារន្ធត់និយាយលេងចេញតែម្តង នៅពេលរកឃើញក្នុងប្រអប់នោះ គឺជាដបទឹក Kung Fu Panda ២ដប បែបនេះ ។
នេះជាមេរៀនមួយ សម្រាប់អ្នកចូលចិត្តទិញទំនិញអនឡាញ បានជ្រាបជាព័ត៌មាន ៕ ដោយ៖ ចន្ទី (ប្រភព៖ bangkokpost)