ខេត្តកំពង់ឆ្នាំង៖មន្ត្រីមន្ទីរព័ត៌មានខេត្តកំពង់ឆ្នាំង បានឲ្យដឹងថា ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ កាលពីពេលថ្មីៗនេះ បានចុះទៅពិនិត្យទីតាំង ដើម្បីត្រៀមរៀបចំពិធីបុណ្យទន្លេជាលើកទី៥ នៅខេត្តកំពង់ឆ្នាំង។
ព្រមជាមួយគ្នានេះ ឯកឧត្តម ថោង ខុន ក៏បានបើកកិច្ចប្រជុំជាមួយអាជ្ញាធរខេត្តកំពង់ឆ្នាំង និងមន្ទីររាជការជុំវិញខេត្ត អាជ្ញាធរក្រុង ស្រុកដើម្បីពិភាក្សាអំពីផែនការបុណ្យទន្លេនៅក្នុងខេត្តកំពង់ឆ្នាំង។
នាឱកាសនោះ ឯកឧត្តម ថោង ខុន ក៏បានស្នើដល់មន្ត្រីពាក់ព័ន្ធទាំងអស់ ត្រូវយកចិត្តទុកដាក់អប់រំអាជីវករ និងប្រជាពលរដ្ឋ ឲ្យចេះធ្វើបដិសណ្ឋារកិច្ចចំពោះភ្ញៀវ អ្នកលក់ដូរក្នុងភោជនីយដ្ឋាន អាហារដ្ឋាន ត្រូវតែមានឯកសណ្ឋានត្រឹមត្រូវ និងមានសេវាកម្មល្អក្នុងការបម្រើភ្ញៀវ ដោយត្រូវមានអាហារឆ្ងាញ់ មានអនាម័យល្អ បរិស្ថានល្អ ដើម្បីទទួលភ្ញៀវដែលមកលេងកំសាន្តក្នុងពិធីបុណ្យទន្លេរយៈពេល ៣ថ្ងៃ នៅក្នុងខេត្តកំពង់ឆ្នាំង ដែលនឹងចាប់ផ្តើមនៅខែមីនា ឆ្នាំ២០១៩ ខាងមុខនេះ។
ឯកឧត្តមបណ្ឌិត មានប្រសាសន៍បន្តថា ជាបទពិសោធន៍ក្នុងការធ្វើបុណ្យទន្លេកន្លងមក តាមបណ្តាខេត្តមួយចំនួន នៅម៉ោង៩យប់ ភ្ញៀវមកលេងបុណ្យទន្លេរកបាយម្ហូប ដើម្បីទទួលអត់មាន។
ឯកឧត្តម ថោង ខុន ឱ្យដឹងដូច្នេះ រួចអំពាវនាវដល់ម្ចាស់ផ្ទះសំណាក់ និងសណ្ឋាគារជាដើម សូមកុំតម្លើងថ្លៃ ហួសហេតុពេក។ ជាងនេះទៀត នៅតាមផ្ទះប្រជាពលរដ្ឋ នៅក្នុងក្រុង សូមរៀបចំឱ្យបានស្អាតបាត ឱ្យមានរបៀបរៀបរយ មានភ្លើងអគ្គិសនី មានបន្ទប់ទឹកស្អាត មានអនាម័យល្អ ដើម្បីទទួលភ្ញៀវ ដែលមកស្នាក់នៅលេងកំសាន្ត នៅក្នុងពិធីបុណ្យទន្លេ ឱ្យបានច្រើនកុះករ និងសប្បាយរីករាយ។
ឯកឧត្តមបន្តថា ពិធីបុណ្យទន្លេ ប្រសិនបើផ្ទះសំណាក់ និងសណ្ឋាគារ ពេញអស់ហើយនោះ ភ្ញៀវវទេសចរ នឹងមករកជួលផ្ទះប្រជាពលរដ្ឋ របស់យើង ដើម្បីស្នាក់នៅ។ ចំណែកអ្នករត់ម៉ូតូឌុប នុងរ៉ឺម៉កម៉ូតូ ក៏ត្រូវមានអាវកាក់ និងមានការគ្រប់គ្រងឱ្យបានល្អដែរ។
ទាក់ទិនបញ្ហានេះ ឯកឧត្តម ឈួរ ច័ន្ទឌឿន អភិបាលខេត្តកំពង់ឆ្នាំង បានឱ្យដឹងដែរថា គម្រោងផែនការបុណ្យទន្លេលើកទី៥ ក្រោមប្រធានបទ «ទន្លេនៃជីវិត សុភមង្គល និងកំណើនទេសចរណ៍»។ ឯកឧត្តមបញ្ជាក់ថា ពិធីបុណ្យនេះ អាជ្ញាធរខេត្ត បានរៀបចំបង្កើតគណៈកម្មការ លេខាធិការដ្ឋាន និងអនុគណៈកម្មការសរុបចំនួន ១៧អនុគណៈកម្មការ ដើម្បីបែងចែកភារកិច្ចទទួលខុសរៀងៗខ្លួន ទៅតាមមុខជំនាញ បំរើឱ្យការធ្វើបុណ្យទន្លេទទួលបានជោគជ័យ។
ត្រង់ចំណុចនេះ ឯកឧត្តម ឈួរ ច័ន្ទឌឿន បញ្ជាក់ថា អាជ្ញាធរខេត្តបានត្រៀមរៀបចំតុបតែងខ្លោងទ្វាររូបភាពធំៗចំនួន១៧- ក្លោងទ្វាតូចៗចំនួន២២ នៅក្នុងទីក្រុងកំពង់ឆ្នាំង និងនៅតាមផ្លូវជាតិលេខ ៥ និងផ្លូវមួយចំនួនក្នុងខេត្ត ដើម្បីត្រៀមស្វាគមន៍ភ្ញៀវទេសចរ ដែលនឹងចូកមកកម្សាន្តបុណ្យទន្លេ នៅក្នុងខែមីនា ឆ្នាំ២០១៩ខាងមុខនេះ។
ឯកឧត្តមអភិបាលខេត្តកំពង់ឆ្នាំង បានបន្តថា នៅក្នុងកម្មវិធី៣ថ្ងៃនៃបុណ្យទន្លេនេះ ក៏មានកម្មវិធីនានាជាច្រើន សម្រាប់លេងកំសាន្តរួមមាន៖ ការរត់ប្រណាំងកំសាន្តចម្ងាយ ៣ទៅ ៥គីឡូម៉ែត្រ- ពិធីដាំដើមឈើអនុស្សាវរីយ៍- ការប្រណាំងទូក២២គូ- ការតាំងពិពណ៌សិប្បទេសចរណ៍ ផលិតផលខ្មែរ- ការប្រកួតកីឡាអុកចត្រង្គ ៗ- ប្រដាល់គុនខ្មែរ ថៃ – ចំបាប់បុរាណ និងក្បាច់គុនល្បុកតោ – កីឡាហែលទឹកឆ្លងទន្លេ៩០០
ម៉ែត្រ – ការប្រកួតកីឡាបាល់ទាត់ បាល់ទះ មិត្តភាព – ការប្រកួតកីឡាប្រណាំងកង់ ៥គីឡូម៉ែត្រ – ជិះកង់កំសាន្ត១២គីឡូម៉ែត្រ – កម្មវិធីសិល្បះ ប្រគុំតន្ត្រី – មហោស្រពម្ហូបអាហារ និងភេសជ្ជៈ មាន២៤០ស្តង់ និងកាបាញ់កាំជ្រូចអបអរសាទរកម្មវិធីបើកជាផ្លូវការ បុណ្យទន្លេលើកទី៥ ឆ្នាំ២០១៩ ៕ ដោយ ៖ ដែនសីមា