ប្រធានាធិបតីអាមេរិក Donald Trump នៅថ្ងៃទី២៨តុលាម្សិលមិញនេះ បានប្រកាសនៅក្នុងមិទ្ទីងមួយក្នុងរដ្ឋ Illinois ថា រុស្ស៊ីបានបង្ហាញបំណងចង់ទទួលយកការជួយរបស់អាមេរិកក្នុងកិច្ចអភិវឌ្ឍសេដ្ឋកិច្ច ក៏ដូចជាបាននិយាយដល់អំពីលទ្ធភាពជួបសន្ទនាជាមួយប្រធានាធិបតីVladimir Putin ។
Sputnik បានដកស្រង់សម្តីលោកTrump ថ្លែងទៅកាន់ហ្វូងមនុស្សគាំទ្រលោកនៅរដ្ឋ Illinois ថា ៖« ខ្ញុំបានមានជំនួបដ៏អស្ចារ្យមួយជាមួយប្រធានាធិបតី Putin កាលពីខែកក្កដា នៅHelsinki ។ ខ្ញុំបាននិយាយអំពីអ្វីគ្រប់យ៉ាង។ ហើយចូរកុំភ្លេចថារុស្ស៊ីចង់ឱ្យយើងជួយលើផ្នែកសេដ្ឋកិច្ច។ខ្ញុំបានធ្វើរឿងអស្ចារ្យ។អ្នកណាក៏សុទ្ធសឹងចង់ឱ្យយើងជួយ។
ក្រោយពេលចូលមកសេតវិមាន លោកTrump បានជួបលោក Putin ក្នុងព្រឹត្តិការណ៍អន្តរជាតិមួយចំនួន ហើយមេដឹកនាំទាំងពីរបានមានជំនួបផ្លូវការដំបូងនៅHelsinki រដ្ឋធានីហ្វាំងឡង់ កាលពីថ្ងៃទី១៦ ខែកក្កដាកន្លងមក។
តាមSputnik លទ្ធផលអង្កេតបង្ហាញថា បណ្តាក្រុមហ៊ុនអាមេរិកនៅតែរក្សាអាកប្បកិរិយាសកម្មចំពោះរុស្ស៊ី ទោះបីលោកខាងលិចបានដាក់ទណ្ឌកម្មលើប្រទេសនេះក្តី។មានក្រុមហ៊ុនប្រមាណ៧០ភាគរយចាប់ផ្តើមគ្រោងការណ៍ថ្មីនៅរុស្ស៊ីក្នុងឆ្នាំ២០១៩ខាងមុខ។
កាលពីពាក់កណ្តាលសប្តាហ៍មុន អនុរដ្ឋមន្ត្រីការបរទេសរុស្ស៊ី Sergey Ryabkov នូវបានសន្និដ្ឋានពីការអភិវឌ្ឍនៃកិច្ចសហប្រតិបតិ្តការរវាងរុស្ស៊ីនិងអាមេរិក គឺ«ល្អជាងរូបភាពសម្លឹងឃើញពីខាងក្រៅ»៕លីសា