តាមស៊ីនហួ ចុះផ្សាយថ្ងៃទី២៨តុលា ប្រមុខការទូត Saudi Arabia Adel Al Jubeir ឱ្យដឹងថា ជនដៃដល់១៨នាក់ដែលត្រូវបានចាប់ខ្លួនក្នុងករណីសម្លាប់អ្នកកាសែត Jamal Khashoggi នឹងត្រូវបានចោទប្រកាន់ទោសនៅអាណាចក្រនេះ។
ការលើកឡើងដូចពោលខាងលើ គឺមួយថ្ងៃក្រោយពេលដែលបណ្តាអយ្យការតួកគីស្នើសុំធ្វើបត្យាប័នជនដៃដល់ទាំង១៨រូបមកកាន់តួកគីដើម្បីកាត់ទោស។ លោកAdel Al Jubeir នៅបានសន្យាថា អ្នកដែលទទួលខុសត្រូវទាំងឡាយក៏នឹងរងទណ្ឌកម្មដែរ ហើយSaudi Arabia ក៏នឹងមានយន្តការថ្មីមួយដើម្បីធានាថា ហេតុការណ៍បែបនេះនឹងមិនកើតមានឡើងទៀតឡើយ។
តាមគម្រោង អគ្គអយ្យការ Saudi Arabia Saud al-Mojeb នឹងទៅកាន់តួកគីដើម្បីពិភាក្សាជាមួយបណ្តាអ្នកស៊ើបអង្កេតជុំវិញករណីសម្លាប់អ្នកកាសែត Khashoggi ។មុននោះ Saudi Arabia សារភាពថា អ្នកកាសែត Khashoggi បានស្លាប់នៅស្ថានកុងស៊ុលប្រទេសនេះ ក្នុងទីក្រុង Istanbul ប៉ុន្តែមិនបកស្រាយអំពីមូលហេតុបណ្តាលឱ្យអ្នកកាសែតរូបនេះស្លាប់ឡើយ៕សូយន