យន្តហោះដឹកអ្នកដំណើរមួយគ្រឿងរបស់ក្រុមហ៊ុនអាកាសចរណ៍ Indonesia Lion Air បានដាច់ទំនាក់ទំនងជាមួយស្ថានីយគ្រប់គ្រងចរាចរណ៍ដែនអាកាស រួចបានធ្លាក់ចុះសមុទ្រនៅព្រឹកមិញនេះ។បច្ចុប្បន្ននេះគេពុំទាន់ដឹងថាមានមនុស្សប៉ុន្មាននាក់នៅក្នុងយន្តហោះនេះ។
យន្តហោះដឹកអ្នកដំណើរដែលមានលេខសម្គាល់ JT610 របស់ Lion Air ដែលចេញដំណើរពីJakarta ទៅកាន់Pangkal Pinang បានធ្លាក់ចុះក្នុងសមុទ្រ -នេះបើតាមការឱ្យដឹងពីស្ថាប័នរុករកនិងសង្គ្រោះឥណ្ឌូណេស៊ី។
យន្តហោះបានចាកចេញពី Jakarta នៅវេលម៉ោង 6h10 ហើយតាមគម្រោងនឹងចុះចតនៅ Pangkal Pinang នៅ 7h20 តែវាបានដាច់ទំនាក់ទំនងជាមួយស្ថានីយគ្រប់គ្រងចរាចរណ៍ដែនអាកាសនៅវេលាម៉ោង 6h33 ព្រឹកមិញនេះ។
យន្តហោះជួបគ្រោះថ្នាក់ជាប្រភេទ Boeing 737 MAX 8 អាចដឹកអ្នកដំណើរបាន២០០នាក់។
JT610 បានដាច់ទំនាក់ទំនងនឹងស្ថានីយគ្រប់គ្រងចរាចរណ៍ដែនអាកាសតែប៉ុន្មាននាទីក្រោយពេលវាហោះហើរឡើង បន្ទាប់មកត្រូវបានសន្និដ្ឋានថាធ្លាក់ចុះសមុទ្រហើយ។
លោក Edward Sirait នាយកប្រតិបត្តិ Lion Air បានពោលថា យើងខ្ញុំកំពុងប្រឹងប្រែងប្រមូលផ្តុំព័ត៌មាននិងទិន្នន័យទាំងអស់៕សូយន