ភ្នំពេញ ៖ អ្នករាយការណ៍ពិសេស អង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា លោកស្រី រ៉ូណា ស្មីត បានមកដល់ប្រទេសកម្ពុជា នៅថ្ងៃទី២៨ ខែតុលា ឆ្នាំ២០១៨ ។
អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា លោកស្រីរ៉ូណា ស្មីត មកបំពេញទស្សនកិច្ចនៅប្រទេសកម្ពុជារយៈពេល១១ថ្ងៃចាប់ពីថ្ងៃទី២៩ ខែតុលាការ រហូតដល់ថ្ងៃទី៨ ខែវិច្ឆិកា។ នេះបើតាមសេចក្តីប្រកាសព័ត៌មានរបស់ការិយាល័យឧត្តមស្នងការសិទ្ធិមនុស្សអង្គការសហប្រជាជាតិប្រចាំនៅកម្ពុជា។
លោកស្រី រ៉ូណា ស្មីត បានមកដល់ប្រទេសកម្ពុជា១ថ្ងៃ មុនពេលកំណត់នៃការបំពេញទស្សនកិច្ច១១ថ្ងៃ ដែលធ្វើឡើងចាប់ពីថ្ងៃទី២៩ ខែតុលា ដល់ថ្ងៃទី៨ ខែវិច្ឆិកា ឆ្នាំ២០១៨ តាមការអញ្ជើញរបស់រាជរដ្ឋាភិបាលកម្ពុជា។ ក្នុងអំឡុងពេលទស្សនកិច្ចរយៈពេល១១ថ្ងៃនេះ អ្នកជំនាញរូបនេះគ្រោងជួបប្រជុំជាមួយមន្ត្រី ជាន់ខ្ពស់របស់រដ្ឋាភិបាល តំណាងសង្គមស៊ីវិល និងសមាជិកសហគមន៍ការទូតនានា។
អ្នករាយការណ៍ពិសេស អ.ស.ប បំពេញបេសកកម្មផ្លូវការជាទៀតទាត់មកកាន់ប្រទេសកម្ពុជា និងធ្វើរបាយការណ៍ប្រចាំឆ្នាំទៅក្រុមប្រឹក្សាសិទ្ធិមនុស្ស ដែលក្រុមប្រឹក្សានេះ បានតែងតាំងលោកស្រី នៅក្នុងខែមីនា ឆ្នាំ២០១៥។ លោកស្រីនឹងបង្ហាញរបាយការណ៍បន្ទាប់របស់លោកស្រី ទៅក្រុមប្រឹក្សាសិទ្ធិមនុស្សក្នុងខែកញ្ញា ឆ្នាំ២០១៩។
សេចក្តីប្រកាសបានឱ្យដឹងថា អ្នកជំនាញរូបនេះ នឹងបញ្ចប់ដំណើរទស្សនកិច្ចរបស់ខ្លួន ដោយមានសន្និសីទសារព័ត៌មានមួយ ដើម្បីពិភាក្សាអំពីរបកគំហើញបឋម នៃដំណើរទស្សនកិច្ចរបស់លោកស្រី ដែលសន្និសីទនេះ នឹងប្រព្រឹត្តទៅនៅថ្ងៃព្រហស្បតិ៍ ទី៨ ខែវិច្ឆិកា នៅវេលាម៉ោង ៣រសៀល នៅការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា ដែលមានអាសយដ្ឋាន អគារលេខ ៤ ផ្លូវ ២៧១ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ។
សម្រាប់ដំណើរទស្សនកិច្ចនៅកម្ពុជាលើកនេះ លោកស្រីរ៉ូណា ស្មីត នឹងធ្វើរបាយការណ៍មួយទៅកាន់ក្រុមប្រឹក្សាសិទ្ធិមនុស្សអង្គការសហប្រជាជាតិនៅក្នុងខែកញ្ញា ឆ្នាំ២០១៩ខាងមុខ។
សូមបញ្ជាក់ថា នៅមុនដំណើរទស្សនកិច្ចនៅកម្ពុជាលើកនេះ លោកស្រីរ៉ូណា ស្មីត បានសម្តែងនូវការព្រួយបារម្ភនានាទាក់ទងនឹងស្ថានភាពសិទ្ធិមនុស្ស បូករួមទាំងការបោះឆ្នោតជាតិកម្ពុជា។ កាលពីខែមុន លោកស្រីរ៉ូណា ស្មីត បានចោទសួរពី“ភាពជឿជាក់”នៃការបោះឆ្នោតនៅកម្ពុជាដែលបក្សកាន់អំណាចបានឈ្នះអាសនៈទាំងអស់ក្នុងរដ្ឋសភានៅចំពោះក្រុមប្រឹក្សាសិទ្ធិមនុស្សនៃអង្គការសហប្រជាជាតិ។ ជាមួយនឹងការចោទសួរនេះ លោកស្រីរ៉ូណា ស្មីត ក៏បានប្រាប់ទៅក្រុមប្រឹក្សាសិទ្ធិមនុស្សថា មានភាពមិនប្រក្រតីខ្លះនៅមុនការបោះឆ្នោតជាតិថ្ងៃទី២៩ ខែកក្កដា ៕ ដោយ ៖ រចនា
