យីហោទាន់សម័យមួយនៅកាណាដា បានបង្កឱ្យមានការជជែកយ៉ាងពុះកញ្ជ្រោលចំពោះផលិតផលស្បែកជើងថ្មីរបស់ខ្លួនដែលស្រដៀងនឹងការប្រើស្បែកមនុស្សយកមកកែច្នៃ។
តាម Daily Mail, ហាង Fecal Matter កំពុងលក់ស្បែកជើងកវែង ដែលមានម្រាមជើង មានខ្នែងបិសាច និងកែងស្បែកជើងដូចជាឆ្អឹង ហើយស្បែកដែលប្រើដូចនឹងស្បែកមនុស្សបេះបិទ។
ស្បែកជើងនេះបានធ្វើឱ្យជើងមនុស្សលោកក្លាយទៅជាជើងរបស់សភាវៈភពដទៃ។
ប៉ុន្តែវាមានតម្លៃមិនធម្មតាឡើយ គឺដល់ទៅ១០.០០០ដុល្លារក្នុងមួយគូឯណោះ។
ទោះបីមានតម្លៃថ្លៃយ៉ាងនេះក្តី តែវាត្រូវបានក្រុមអ្នករិះគន់និយាយថា វាអាចធ្វើឱ្យក្មេងៗលោះព្រលឹង និងបាត់សោភ័ណភាពរបស់អ្នកពាក់ពេលស្ថិតក្នុងហ្វូងមនុស្ស។ វាគួរតែត្រូវបានយកទៅពាក់ក្នុង…ព្រៃ។
ប៉ុន្តែមនុស្សមួយចំនួនបែរជាស្ងើចសរសើរ ថាវាជាស្នាដៃសិល្បៈដ៏កម្រមានទៅវិញ។
ដំបូង ស្បែកជើងនេះជាការច្នៃប្រឌិតតាមរយៈ Photoshop តែក្រោយមកវាត្រូវបានអ្នករចនាម៉ូត Hannah Rose Dalton និង Steven Raj Bhaskaran កែច្នៃវា។
ស្បែកជើងកវែងនេះត្រូវបានផលិតពី silicon ហើយត្រូវបាន«កាត់ ដេរផ្ទាល់» ទើបវាអាចសមល្មមនឹងសម្បុរអ្នកប្រើប្រាស់វា៕លីសា