បុរសធាត់ម្នាក់ បានញ៉ាំអាហារ និងនំយ៉ាងច្រើនដែលមានតម្លៃ ៨.០០០ដុល្លារ បន្ទាប់ពីគាត់បានជាប់នៅក្នុងផ្សារទំនើប Kroger អស់ពេលមួយយប់។
លោក Liam Norris អាយុ ៤៧ឆ្នាំ បានជាប់ក្នុងផ្សារទំនើបក្នុងទីក្រុង Oakland រដ្ឋកាលីហ្វញ៉ា អស់ពេញមួយយប់ ដោយសារតែគាត់ បានទៅចូលបន្ទប់ទឹក ចំពេលម៉ោងដែលផ្សារទំនើបនោះជិតបិទ ហើយនៅពេលដែលគាត់ចេញពីបន្ទប់ទឹកមកវិញ ស្រាប់តែបុគ្គលិកបំរើការនៅទីនោះ បានចាក់សោរ បិទភ្លើង និងចេញទៅផ្ទះអស់។
បុរសធាត់ខាងលើ បានអះអាងថា គាត់មានអារម្មណ៍ភ័យយ៉ាងខ្លាំងដោយសារតែគាត់បានទុកទូរស័ព្ទនៅក្នុងឡាន និងគ្រោងចូលបន្ទប់ទឹកមួយភ្លែត ប៉ុន្តែស្រាប់តែត្រូវជាប់ក្នុងនោះសោះ។ គាត់ភ័យខ្លាំងពេក មិនអាចធ្វើអ្វីបាន មានតែរកចំណីអាហារ និងនំនែកញ៉ាំ។
គាត់អះអាងថា “នៅពេលដែលខ្ញុំភ័យ ខ្ញុំតែងតែចង់ញ៉ាំ។ នៅពេលដែលខ្ញុំដឹងថា ខ្ញុំជាប់ក្នុងផ្សារ ខ្ញុំពិតជាមានអារម្មណ៍វិលវល់ រកធ្វើអ្វីមិនកើតសោះ ក្រៅតែពីញ៉ាំ”។
លោក Liam Norris បានចេញពីផ្សារទំនើបរួចវិញ នៅពេលព្រឹកប៉ុន្តែគាត់បានញ៉ាំរបស់របប នៅក្នុងហាងនោះអស់យ៉ាងច្រើនមិនគួរឲ្យជឿ។ ចំណី និងអាហារដែលគាត់ញ៉ាំ ពេលកំពុងជាប់មានដូចជា សាច់ក្លាស្សេ និងពពួកនំកញ្ចប់ និងសូកូឡាជាច្រើន។
លោកថា គាត់បានហូបអាហារអស់យ៉ាងច្រើន ដោយសារតែគាត់ភ័យប៉ុណ្ណោះ។
លោកអះអាងដូច្នេះថា “នៅពេលដែលខ្ញុំនៅកន្លែងងងឹត ខ្ញុំមានអារម្មណ៍ភ័យ។ ខ្ញុំចាប់ផ្តើមញ៉ាំ ដូច្នេះខ្ញុំនឹងមិនមានពេលគិតថា ទង្វើរបស់ខ្ញុំអាចឲ្យខ្ញុំជាប់គុកបាន ដូច្នេះខ្ញុំក៏ញ៉ាំរហូតដល់ព្រឹកឡើង”៕ សុភ័ក្ត្រ
ប្រភព៖ worldnewsdailyreport