នេះជាខណៈដ៏សាហាវមួយ ដែលគ្រប់គ្នាឃើញហើយស្ទើរតែពុំគួរឲ្យជឿ នៅពេលដែលចោរដៃឆៅ២នាក់ បានធ្វើសកម្មភាពវាយបំបែកកញ្ចក់រថយន្តគេកំពុងឈប់ក្នុងអំឡុងពេលស្ទះចរាចរណ៍ ដើម្បីឆក់យកកាបូបពីក្នុងរថយន្តនោះទាំងកណ្តាលថ្ងៃត្រង់ ដោយពុំខ្លាចញញើតសូម្បីបន្តិចឡើយ ។
យោងតាមអ្នកសារព័ត៌មាន បុរស២នាក់បានជិះម៉ូតូយឺតៗ នៅពីមុខ Axia (ម៉ាឡេស៊ី) មុនពេលជិះតាមឃ្លាំមើលរថយន្តជាច្រើន ដែលកំពុងបង្អង់ឈប់ខណៈពេលចរាចរកំពុងកកស្ទះ ។
ពួកវាបន្ទាប់មក បានធ្វើសកម្មភាពវាយបំបែកកញ្ចក់រថយន្ត១គ្រឿង ដែលកំពុងស្ថិតនៅមុខ Axia ដោយអុកនឹងកែងដៃរបស់ពួកគេ ហើយឆក់យកកាបូបម្ចាស់រថយន្តដែលរក្សាទុកនៅកន្លែងកៅអីខាងមុខ ។
យោងតាមរបាយការណ៍ព័ត៌មាន បានឲ្យដឹងថា ហេតុការណ៍ដ៏សាហាវនេះបានកើតឡើងនៅក្នុងតំបន់ Kepong ឬ Selayang ។ ហើយសកម្មភាពរបស់ចោរទាំងពីរនេះ ត្រូវបានកត់ត្រាដោយកាមេរ៉ាពីរថយន្ត១គ្រឿងទៀតបើកបញ្ច្រាស់ទិសគ្នានៅទីនោះ ។
បន្ទាប់ពីធ្វើសកម្មភាពឆក់កាបូបបានសម្រេច ពួកវាក៏បានបើកម៉ូតូចាកចេញយ៉ាងលឿន និងហើយពួកវាត្រូវបានជិះដេញពីខាងក្រោយដោយបុរសម្នាក់ ដែលគេជឿថាជាគ្នីគ្នារបស់ពួកវាចាំបិទគូទ ។
ទោះយ៉ាងណា នៅក្នុងវីដេអូពុំបានបង្ហាញម្ចាស់រថយន្តនោះ ចុះស្រែកឆោឡោឡើង ដើម្បីឲ្យគេជួយដេញតាមពួកចោរទាំងនោះទេ និងក៏ពុំដឹងថា ជនរងគ្រោះបានរាយការណ៍ពីហេតុការណ៍នេះប្តឹងទៅប៉ូលីស ឬ យ៉ាងណានោះដែរ ៕ ដោយ៖ ឧត្តម (ប្រភព៖ Worldofbuzz)
