ខេត្តកោះកុង ៖ រដ្ឋបាលខេត្តកោះកុង បានរៀបចំដាក់តាំងនាវាចម្បាំងមួយគ្រឿង ដែលសល់ពីសម័យសង្គ្រាមចន្លោះឆ្នាំ១៩៧០ដល់ ឆ្នាំ១៩៧៥ នៅទីតាំងសួនច្បារកោះកុង ត្រើយខាងកើត ក្បែរគល់ស្ពាន ស្ថិតក្នុងសង្កាត់ ស្មាច់មានជ័យ ក្រុងខេមរភូមិន្ទ។
មន្ត្រីសាលាខេត្តកោះកុង បានឲ្យដឹងថា នាវាចម្បាំង ដែលយកមកដាក់តាំងបង្ហាញជូនបងប្អូន ប្រជាពលរដ្ឋនិងភ្ញៀវទេសចរ ទស្សនាកំសាន្តនៅក្នុងពិធីបុណ្យសមុទ្រ ដែលប្រព្រឹត្តទៅនៅពាក់កណ្តាលខែធ្នូចុងឆ្នាំ២០១៨នេះ គឺជាប្រភេទនាវាចម្បាំង ម៉ាក PCS ផលិតនៅសហរដ្ឋអាមេរិក។
នាវាចម្បាំងនេះ បានសល់ពីសម័យសង្គ្រាម ចន្លោះពីឆ្នាំ១៩៧០ ដល់ទៅឆ្នាំ១៩៧៥ ដែលកន្លងមក ត្រូវបានខូចប្រើប្រាស់លែងកើត រួចក៏ទុកចោល នៅទីតាំងជួសជុលទូកមួយកន្លែង ស្ថិតក្នុងឃុំប៉ាក់ខ្លង ស្រុកមណ្ឌលសីមា។
មន្ត្រីដដែលបានឱ្យដឹងទៀតថា ទីតាំងដាក់តាំងនាវាខាងលើនេះ នឹងមានការតុបតែងលម្អ ដូចជាការ លាបថ្នាំ រចនាម៉ូត ដាំដើមឈើ ដើមផ្កា និងដាក់អំពូលភ្លើងអគ្គីសនីបំភ្លឺជាដើមជាដើម។
ខេត្តកោះកុង នឹងរៀបចំធ្វើជាម្ចាស់ផ្ទះ នៃពីធីបុណ្យសមុទ្រលើកទី៧ ជុំទី២ ចាប់ពីថ្ងៃទី១៤ ដល់ថ្ងៃទី១៦ ខែធ្នូឆ្នាំ២០១៨។
តាមកម្មវិធី ពិធីបុណ្យសមុទ្រឆ្នាំនេះ នឹងមានការអញ្ជើញជាអធិបតីភាព ដ៏ខ្ពង់ខ្ពស់ពីសំណាក់ សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹត្តិបណ្ឌិត ប៊ុន រ៉ានី ហ៊ុន សែន៕ ដោយ ៖ ដែនសីមា