យោងតាមផេកហ្វេសប៊ុក Nokor Video ដែលដកស្រង់ប្រភពពីអ្នកលេងហ្វេសប៊ុក ទាក់ទងរឿងដ៏ហួសចិត្តបំផុតមួយ ដែលគេចោទប្រកាន់ថា ភោជនីយដ្ឋានមួយកន្លែងឈ្មោះ «រំចង់» បានគិតតម្លៃទៅលើមុខម្ហូបពីភ្ញៀវថ្លៃហួសពីការស្មាន ដែលធ្វើឲ្យមនុស្សជាច្រើននាំគ្នាចូលរិះគន់យ៉ាងខ្លាំងតែម្តង ។
បើយោងតាមវិកយប័ត្របង្ហោះ នោះភោជនីយដ្ឋានរងការរិះគន់នោះមានទីតាំងស្ថិតនៅផ្ទះលេខ 72H, ផ្លូវ៦អា សង្កាត់ព្រែកលៀប ខណ្ឌឬស្សីកែវ ។ ក្នុងវិកយប័ត្រទូទាត់លុយនេះផងដែរបានបង្ហាញឲ្យឃើញទឹកប្រាក់សរុបអស់ចំនួន ១០៧០០០ រៀល ដែលក្នុងនោះរួមមាន៖ ទឹកសុទ្ធ១ដប ( ៦០០០ រៀល), បាញ់ឆែវ៤បន្ទះ (១បន្ទះ ១៤០០០រៀល) និងសាច់គោអាំង ១០ ចង្កាក់ (១ចង្កាក់ ៤៥០០រៀល) ។
ប្រសិនបើអ្វីៗទាំងអស់នេះ សុទ្ធតែជាការពិតនោះ យើងពិតជាមានការសោកស្តាយជំនួសជាខ្លាំង ព្រោះថា ការរកស៊ីមិនមែនធ្វើឡើងតែ១ថ្ងៃនោះទេ ហេតុនេះ សូមភោជនីយដ្ឋានខាងលើ ក៏ដូចជាទីកន្លែងដទៃទៀត គួរតែពិចារណាឡើងវិញផង ៕ ដោយ៖ ឧត្តម