អាមេរិកបានប្រកាសកាលពីថ្ងៃចន្ទទី ២៩ តុលាថា នឹងដាក់ពង្រាយទាហានរហូតដល់ចំនួនជាង ៥.២០០ ដើម្បីរារាំងជនអន្តោប្រវេសន៍ និងដើម្បីត្រៀមបង្ការភាពចលាចល ស្របពេលមានការសម្រុកធ្វើដំណើរឆ្លងដែនខុសច្បាប់ ចូលមកក្នុងទឹកដីអាមេរិក។ ក្រៅពីនេះ កងកម្លាំងគយនិងការពារព្រំដែនអាមេរិក ក៏កំពុងតាមដានក្រុមមនុស្សប្រមាណជា ៣.៥០០នាក់ផ្សេងទៀត ដែលកំពុងធ្វើដំណើរតាមជើងភ្នំ នៃភាគខាងត្បូងប្រទេសម៉ិកស៊ិកផងដែរ។មន្ទីរប៉ង់តាហ្គោន ក៏ត្រៀមបញ្ជូនកងរាជអាវុធហត្ថ និងឧទ្ធម្ភាគចក្រចំនួន ៣គ្រឿង បំពាក់ដោយឧបករណ៍ចាប់សញ្ញាបច្ចេកវិទ្យាខ្ពស់ និងមានសមត្ថភាពមើលឃើញពេលយប់ផងដែរ។
ប្រធានាធិបតីអាមេរិក Donald Trump
វិធានការនេះ ធ្វើឲ្យគេគិតថា ជាវិធីសាស្ត្ររបស់លោកប្រធានាធិបតីត្រាំដើម្បីទទួលបានការគាំទ្រពីពលរដ្ឋអាមេរិក ក្នុងការបោះឆ្នោតពាក់កណ្តាលអាណត្តិដែលខិតចូលមកដល់។
នៅមួយរយៈពេលចុងក្រោយនេះ ជនអន្តោប្រវេសន៍រាប់ពាន់នាក់មកពីអាមេរិកកណ្តាលដែលក្នុងនោះរួមមានពីប្រទេសហុងឌូរ៉ាស អេលសាល់វ៉ាឌ័រ ព្រមទាំងក្វាតេម៉ាឡា បាននិងកំពុងនាំគ្នាធ្វើដំណើរជាក្បួន ដើម្បីសម្រុកទាំងខុសច្បាប់ចូលដែនដីអាមេរិក ឆ្លងកាត់តាមម៉ិកស៊ិក ដោយសារតែពួកគេចង់រត់គេចចេញពីអំពើហិង្សានិងអសន្តិសុខដែលមាននៅក្នុងប្រទេសកំណើត។ ហើយបើតាមអង្គការសហប្រជាជាតិ មានមនុស្សប្រហែលជា ៧.០០០នាក់ បាននាំគ្នាចាកចេញពីប្រទេសហុងឌូរ៉ាស កាលពីសប្តាហ៏ទី២ ខែតុលា សំដៅទឹកដីអាមេរិក។
ទាក់ទងនឹងការបញ្ជូនទ័ពដ៏ច្រើនទៅកាន់ព្រំដែនអាមេរិក-ម៉ិកស៊ិក ប្រធានាធិបតីអាមេរិក Donald Trump និយាយថា គឺដើម្បីរឹតបន្តឹងសន្តិសុខតាមខ្សែបន្ទាត់ព្រំដែន។ មួយវិញទៀត ដើម្បីទទួលជនអន្តោប្រវេសន៍ និងដើម្បីកុំឲ្យមានភាពចលាចល។ អាមេរិកក៏បានដំឡើងទីជំរំស្នាក់នៅសម្រាប់ពួកគេផងដែរ។លោកTrump បញ្ជាក់បន្ថែម៕ សូយន
