យន្តហោះប្រយុទ្ធនឹងទម្លាក់គ្រាប់បែកមកពីសមរភូមិភាគខាងត្បូងរបស់កងទ័ពចិន បានដំណើរការធ្វើសមយុទ្ធ ដើម្បីត្រួតពិនិត្យសមត្ថភាពបើកការវាយលុកប្រឆាំងនឹងការជ្រៀតជ្រែកនៅដែនសមុទ្រនេះ។
យន្តហោះចិនក្នុងសមយុទ្ធនៅសមុទ្រចិនខាងត្បូង
សកម្មភាពខាងលើប្រព្រឹត្តទៅក្រោយពីយន្តហោះទម្លាក់គ្រាប់បែកB-52 របស់អាមេរិកបានធ្វើការហោះហើរឆ្លងកាត់សមុទ្រចិនខាងត្បូងនៅសប្តាហ៍នេះ។អ្នកនាំពាក្យក្រសួងការពារជាតិចិននិយាយថា នេះជាការប្រឆាំងតបតយ៉ាងខ្លាំងក្លាចំពោះអំពើញុះញង់របស់យន្តហោះយោធាអាមេរិកនៅសមុទ្រចិនខាងត្បូងហើយក៏នឹងអនុវត្តន៍បណ្តាវិធានការចាំបាច់ទាំងអស់។
រដ្ឋមន្រី្តការពារជាតិអាមេរិក Jim Mattis អះអាងថា បណ្តាយន្តហោះ B-52 នៅសមុទ្រចិនខាងត្បូងគឺជាសកម្មភាព អចិន្រៃយ៍របស់ខ្លួន។
ចំណងទាក់ទងអាមេរិក-ចិន កាន់តែតានតឹងឡើងចំពោះរឿងរ៉ាវជាច្រើន។ ក្នុងពេលដែលសង្គ្រាមពាណិជ្ជកម្មរវាងប្រទេសទាំងពីរមិនទាន់មានសញ្ញាធូរស្រាលផងនោះ អាមេរិកបានដាក់ទណ្ឌកម្មលើអង្គភាពកងទ័ពចិន ព្រោះតែទិញអាវុធពីរុស្ស៊ី។ ជាការឆ្លើយតប ចិនបានលុបចោលជំនួបជាន់ខ្ពស់មួយចំនួនជាមួយអាមេរិក បដិសេធមិនឱ្យនាវាអាមេរិកចូលចតនៅកំពង់ផែហុងកុង និងបញ្ហាថ្មីបំផុតគឺករណីដែនដីតៃវ៉ាន់៕
លីសា
