ភ្នំពេញ ៖ មិនថាតែប្រជាពលរដ្ឋសាមញ្ញនោះទេ សូម្បីតែអ្នករកស៊ី អ្នកធំ អ្នកមានអំណាចមួយចំនួន ក៏បានស្វែងរកការព្យាបាលជំងឺនៅក្រៅប្រទេសផងដែរ ដូចជា ប្រទេសថៃ សិង្ហបុរី បារាំង និងឥណ្ឌាជាដើម។ ប៉ុន្តែករណីអ្នកជំងឺចេញទៅរកការព្យាបាលនៅក្រៅប្រទេសនោះ ត្រូវបានលោក រដ្ឋមន្ត្រីក្រសួងសុខាភិបាល បាននិយាយថា មិនមានពលរដ្ឋកម្ពុជាចេញទៅព្យាបាលជំងឺនៅបរទេសច្រើនទេ ។
លោកម៉ម ប៊ុនហេង រដ្ឋមន្ត្រីក្រសួងសុខាភិបាល បានថ្លែងប្រាប់អ្នកសារព័ត៌មានក្រោយពិធីបញ្ចុះបឋមសិលាសាងសង់អគារវេជ្ជសាស្ត្រនៅមន្ទីរពេទ្យព្រះកុសុមៈ ជាជំនួយរបស់រដ្ឋាភិបាលចិន កាលពីថ្ងៃទី៣០ខែតុលាថា មិនមានពលរដ្ឋកម្ពុជាចេញទៅរកសេវាព្យាបាលជំងឺ ក្រៅប្រទេសច្រើនទេ។
លោកបានតបវិញថា ៖ “ប្អូនឯងដែលទៅព្យាបាលក្រៅប្រទេសអត់? អ្នកថាហ្នឹងដែលទៅអត់? ប៉ុន្ដែអ្នកដែលមើលរាប់លាននាក់ ឬ ១២ទៅ ១៣ លាននាក់ ប្អូនឯងមានទៅសួរគាត់ទាំងអស់អត់? ប្អូនឯងទៅសួរតែម្នាក់ ឬ ២ នាក់ហ្នឹង ម៉េចក៏ដឹងថាទៅច្រើន? ខ្ញុំសូមនិយាយថា កុំគ្រាន់តែឮពាក្យចចាមអារ៉ាម ហើយចង់ពង្រីកបន្ថែម យើងត្រូវចេះមើលហេតុផលវាយល់អត់? ខ្ញុំតែងតែពន្យល់ហេតុផលតាមប្រព័ន្ធផ្សព្វផ្សាយនេះ”។
ឆ្លើយនឹងសំណួររបស់អ្នកកាសែត បុរសអ្នករត់ម៉ូតូឌុបម្នាក់បាននិយាយក្នុងលក្ខខណ្ឌមិនបញ្ចេញឈ្មោះថា “ករណីដែលមានប្រជាពលរដ្ឋខ្មែរ ជាច្រើនចេញទៅព្យាបាលជំងឺនៅក្រៅប្រទេសនោះ ជាពិសេសប្រទេសថៃ និងវៀតណាមនោះ លោកថា ពិតជាមានច្រើនមែន ជាពិសេសសាច់ញាតិរបស់ខ្ញុំ ក៏បានទៅព្យាបាលជំងឺនៅក្រៅប្រទេសផងដែរ ក្រោយការព្យាបាលជំងឺ នៅតាមមន្ទីរពេទ្យក្នុងស្រុកដោយចំណាយលុយ និងពេលវេលាជាច្រើនមក។ មិនថាតែអ្នកក្រ អ្នកតូចនោះ សូម្បីតែអ្នកធំ ក៏ចេញទៅព្យាបាលនៅប្រទេសសិង្ហបុរី និងប្រទេសបារាំងដែរ តាមរយៈការចុះផ្សាយព័ត៌មានលើទំព័រសារព័ត៌មាន កាសែត និងអនឡាញ។
ក្រោយពីអ្នកជំងឺទាំងនោះ បានវិលត្រឡប់មកស្រុកវិញ ហើយអ្នកខ្លះបានជាសះស្បើយ ហើយអ្នកខ្លះក៏ទទួលមរណភាពផងដែរ”៕ ដោយ ៖ រចនា
