រាជធានីភ្នំពេញ ៖ ប្រភពព័ត៌មានមកពីខេត្តកំពត បានឱ្យដឹងថា មន្ទីរសម្រាកព្យាបាល និងសម្ភពកំពតសង់តេ បានបើកបំរើសេវាដោយគ្មានច្បាប់អនុញ្ញាតពីក្រសួងសុខាភិបាល អស់រយៈពេលជាងបីខែមកហើយៗ កំពុងតែដំណើរការយ៉ាងរលូន គឺពុំមាននរណាម្នាក់មករំខានអ្វីឡើយ។
គ្លីនិកលោតឆ័ត្រខាងលើនេះ ស្ថិតនៅ ភូមិ១ឧសភា សង្កាត់កំពង់កណ្តាល ក្រុងកំពត ខេត្តកំពត។
មន្ទីរសម្រាកព្យាបាលនេះគ្រប់គ្រងដោយ លោកវេជ្ជបណ្ឌិត បូ ចាន់ដារ៉ា ជាមន្ត្រីបម្រើការនៅមន្ទីរពេទ្យបង្អែក ខេត្តកំពត ដែលមានឪពុកក្មេកប្រធានមន្ទីរសេដ្ឋកិច្ច និងហិរញ្ញវត្ថុ ខេត្តកំពត រីឯម្ដាយក្មេកក៏ធ្វើជាប្រធានមន្ទីរសង្គមកិច្ចការងារ ខេត្តកំពតនេះដែរ។
គ្លីនិកព្យាបាលជំងឺទូទៅគ្រប់ប្រភេទនីមួយៗ ត្រូវមាន គ្រូពេទ្យ ឱសថការី មានផ្នែកគណនេយ្យ មន្ទីរពិសោធន៍ថតឆ្លះគឺរូបភាពវិជ្ជសាស្ត្រជាដើម។ល។
យោងតាមប្រភពពីមន្ត្រីបម្រើការនៅក្នុងមន្ទីរសុខាភិបាល ខេត្តកំពត បានឱ្យដឹងថា គ្លីនិក របស់ លោក បូ ចាន់ដារ៉ា ដែលមានឈ្មោះថា «មន្ទីរសម្រាកព្យាបាលនិងសម្ភពកំពតសង់តេ» គ្រាន់តែទិញដីសាងសង់គ្លីនិក និងបំពាក់សម្ភារៈបរិក្ខា បានចំណាយថវិកាអស់ជាងមួយលានដុល្លារសហរដ្ឋអាមេរិក កំពុងតែដំណើរ ទោះបីមន្ទីរសម្រាកព្យាបាល និងសម្ភពកំពតសង់តេ បានបើកដំណើរការអត់ទាន់មានច្បាប់ដោយមិនមានសមត្ថកិច្ចជំនាញណាមួយហ៊ានទៅជិតឬក្បែរឡើយ ព្រោះខ្លាចអំណាចគ្រួសារមួយនេះណាស់។ ដូច្នេះក្រសួងសុខាភិបាលស្ថិតក្រោមការគ្រប់គ្រងរបស់ លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបញ្ជូនមន្ត្រីជំនាញ ដែលឯករាជ្យ ចុះពិនិត្យមើលករណីខាងលើនេះឱ្យបានឆាប់ផង។
ប្រភពដដែលបន្តទៀតថា ប្រាក់ទិញដីសាងសង់ និងបំពាក់សម្ភារបរិក្ខាគ្លីនិកនេះ អស់ជាងមួយលានដុល្លារ គឺជាថវិការបស់ឪពុកក្មេក និងម្តាយក្មេក លោក ចាន់ដារ៉ា ដែលបានមកពីអំពើពុករលួយ នៃគម្រោងដេញថ្លៃនានា របស់មន្ទីរជុំវិញ ខេត្តកំពត ស្ថិតនៅក្រោមការគ្រប់គ្រងពី មន្ទីរសេដ្ឋកិច្ច និងហិរញ្ញវត្ថុខេត្ត។ ប្រភពដដែលក៏បានទទូច សុំឱ្យអង្គភាពប្រឆាំងអំពើពុករលួយ របស់លោក ឱម យិនទៀង ជួយចាត់មន្ត្រីឱ្យចុះត្រួតពិនិត្យមើលដំណើរការ មន្ទីរហិរញ្ញវត្ថុ ខេត្តកំពត ផងដែរ។
នៅព្រឹកថ្ងៃទី៣១ ខែតុលា ឆ្នាំ២០១៨ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល ក៏ដូចលោក សុខ ប៉ូ អនុប្រធាននាយកដ្ឋានមន្ទីរពេទ្យ របស់ ក្រសួងសុខាភិបាល បានបញ្ជាក់អំពីផ្លូវច្បាប់ដូចគ្នាថា គ្លីនិកនេះកំពុងតែដំណើរការខុសច្បាប់ គឺមុននឹងបើកឱ្យដំណើរមន្ទីរពេទ្យនេះឡើង ត្រូវតែសុំច្បាប់អនុញ្ញាតពីក្រសួងសុខាភិបាល ជាមុនសិន។ បើសិនមន្ទីរសុខាភិបាលភិបាល ខេត្តកំពត ថា អាចដំណើរការមុនបាននោះ សូម លោកអនុប្រធានមន្ទីរខេត្ត យកលិខិតបទដ្ឋានឬច្បាប់ណាមួយមក បង្ហាញក្រសួងឱ្យបានដឹងផង។ រាល់សេវាឯកជនទាំងអស់ មុននឹងដំណើរការទៅបានត្រូវតែសុំច្បាប់អនុញ្ញាតពី ក្រសួងសុខាភិបាល ជាដាច់ខាត។
លោក កែវ សុផាន់ អនុប្រធាន មន្ទីរសុខាភិបាល ខេត្តកំពត ប្រាប់ឱ្យដឹងនៅព្រឹកថ្ងៃទី៣១ ខែតុលា នេះថា គ្លីនិកខាងលើមិនទាន់មានច្បាប់មែន តែអាចដំណើរការសិនបានដើម្បីឱ្យក្រុមការងារលោកចុះទៅពិនិត្យវាយតម្លៃមើលអំពីលក្ខខណ្ឌច្បាប់ថា តើគ្រប់គ្រាន់ដែរឬទេ ? បើទោះបីជាយ៉ាងណាមន្ទីរសុខាភិបាល ខេត្តកំពត បានទុកឱកាសឱ្យគ្លីនិក«សម្រាកព្យាបាលនិងសម្ភពកំពតសង់តេ»នេះម្តងរួចមកហើយសម្រាប់បំពេញលក្ខខណ្ឌនានាដែលខ្វះខាតក្នុងរយៈមួយខែ។
អនុប្រធានមន្ទីរសុខាភិបាល ខេត្តកំពត បានឱ្យដឹងទៀតថា ក្រសួងសុខាភិបាលជាអ្នកចេញច្បាប់អនុញ្ញាត ជូនសេវាឯកជនស្មុគស្មាញនេះ។ បើសិនជាសេវាឯកជនមិនស្មុគស្មាញគឺវាចូលតាមច្រកចេញចូលតែមួយ ខេត្តកំពត៕ ដោយ ៖ ដែន អយុធ្យា