ខេត្តស្វាយរៀង៖ ផ្ទះបាយមួយខ្នងរួមសម្ភារះមួយចំនួនត្រូវបានអគ្គីភ័យឆាបឆេះម៉ត់គ្មានសល់ប៉ុន្តែមិនបង្កអោយគ្រោះថ្នាក់ដល់មនុស្សនោះទេខណះដែលម្ចាស់រវល់ហើយបានដាក់ឆ្នាំងរំងាស់ស៊ុបនិងរំងាស់ទឹកត្រីចោលបង្កឱ្យមានការភ្ញាក់ផ្អើលដល់ប្រជាពលរដ្ឋនិងសមត្ថកិច្ចចុះជួយអន្តរាគមន៍និងបាញ់ទឹកពន្លត់។ ហេតុការណ៍នេះបានកើតឡើងកាលពីវេលាម៉ោង១៣:០៥នាទីរសៀលថ្ងៃទី៣១ខែតុលាឆ្នាំ២០១៨ស្ថិតក្នុងភូមិ ឃោសាង សង្កាត់ ស្វាយតឿ ក្រុង ស្វាយរៀង ខេត្ត ស្វាយរៀង។
បើយោងតាមសមត្ថកិច្ចបានឲ្យដឹងថា៖ផ្ទះបាយដែលមានត្រូវបានឆាប់ឆេះអស់នោះមានទំហំ៤ម៉×៦ម៉ត្រូវភ្លើងឆាបឆេះសល់តែផេះដែលមានម្ចាស់ឈ្មោះ ប៉ាល់ សារ៉ាន ភេទស្រី អាយុ ៦០ឆ្នាំ រស់នៅភូមិឃុំកើតហេតុខាងលើបានដាក់ឆ្នាំងរំងាស់ស៊ុបនៅក្នុងផ្ទះបាយរួចគាត់រវល់ទៅផ្ទះអ្នកជិតខាងភ្លេចខ្លួនថារំងាស់ស៊ុបនិងទឹកត្រីទល់តែមានផ្សែងហុយចេញពីផ្ទះបាយទើបដឹងថាមានភ្លើងឆេះក៏បាននាំគ្នាដងទឹកជះពន្លត់។
ប្រភពបានបន្តទៀតថា៖ក្រោយពីទទួលបានព័ត៌មានពីពលរដ្ឋថាមានអគ្គីភ័យឆាបឆេះនោះរថយន្តរបស់ស្នងការដ្ឋាននគរបាលខេត្តស្វាយរៀង១គ្រឿងនិងរថយន្តរបស់កម្លាំងកងរាជអាវុធខេត្តស្វាយរៀងមួយគ្រឿងចេញមកដល់កន្លែងកើតហេតុដើម្បីជួយបាញ់ទឹកពន្លត់ទើបធ្វើឲ្យភ្លើងដែលឆាបឆេះរលត់ទាំងស្រុងហើយផ្ទះបាយនិងសម្លារះដែលត្រូវភ្លើងឆាប់នេះគេពុំទាន់ដឹងថាខូចខាតអស់ប៉ុន្មាននោះ។
សូមបញ្ជាក់ផងដែលថា៖កន្លងមកលោក ម៉ែន វិបុល អភិបាលខេត្តស្វាយរៀងធ្លាប់បានធ្វើការអំពាវនាវដល់ប្រជាពលរដ្ឋឲ្យមានការប្រុងប្រយ័ត្នខ្ពស់ចំពោះបញ្ហា ភ្លើងទាន ធូប ភ្លើងចង្ក្រាន និងអគ្គីសនី ដែលបង្កជាអគ្គីភ័យបំផ្លេចបំផ្លាញទ្រព្យសម្បត្តិផ្ទះសំបែងនិងអាយុជីវិតផងដែរ៕ វ៉ៃគោ
