មនុស្សពីងពាងលោក Alain Robert ត្រូវបានអាជ្ញាធរអង់គ្លេស ធ្វើការហាមប្រាមមិនឲ្យឡើងគ្រប់អគារទាំងអស់នៅក្នុងប្រទេសអង់គ្លេស បន្ទាប់ពីគាត់បានធ្វើការឡើងអគារដ៏ខ្ពស់បំផុតនៅក្នុងទីក្រុងឡុង ដោយមិនបានប្រើប្រាស់ខ្សែក្រវ៉ាត់សុវត្ថិភាព ដែលនោះជាការឡើងខុសច្បាប់។
មនុស្សពីងពាងខាងលើ មានវ័យ ៥៦ឆ្នាំ។ គាត់ត្រូវបានប៉ូលីសចាប់ខ្លួន បន្ទាប់ពីធ្វើការឡើងអគារ Heron Tower កម្ពស់ ២០២ម៉ែត្របានសម្រេច។
គាត់បានឡើងដល់កំពូលអគារដ៏ខ្ពស់បំផុតក្នុងទីក្រុងឡុង ក្នុងរយៈពេលត្រឹមតែ ៤៥នាទី ធ្វើឲ្យមនុស្សម្នាដែលប្រមូលផ្តុំគ្នានៅខាងក្រោម ស្រែកហ៊ោរយ៉ាងខ្លាំង ហើយភ្លាមៗនោះ គាត់ក៏បានចូលខ្លួន និងប្រគល់លិខិតឆ្លងដែនគាត់ដល់ប៉ូលិស និងលេខរបស់មេធាវីលោកផងដែរ។
នៅក្នុងសវនាការ គាត់បានបដិសេធថា ទង្វើរបស់គាត់បានធ្វើឲ្យប៉ះពាល់ដល់សាធារណៈ។ ទោះយ៉ាងណា គាត់ត្រូវបានកាត់ទោសឲ្យជាប់គុកអស់រយៈពេល ២០សប្តាហ៍ ទោសព្យួរ ២ឆ្នាំ។
សូមបញ្ជាក់ថា លោក Alain Robert សញ្ជាតិបារាំង ដែលមានរហ័សនាមថាមនុស្សពីងពាង ធ្លាប់បានធ្វើការឡើងអគារខ្ពស់ៗជាច្រើន ដូចជាអគារ Burj Khalifa នៅទីក្រុងឌូបៃ និងអគារ Empire State Building នៅទីក្រុងញូវញ៉ក៕ សុភ័ក្ត្រ
ប្រភព៖ news.sky