ស្ត្រីម្នាក់ដែលបង្កការស្រឡាំងកាំងកាលពីសប្តាហ៍មុន ឈប់រថយន្តចុះស្រាតជុះនោមទាំងកណ្តាលផ្លូវកំពុងធ្វើចរាចរណ៍ នៅក្នុងទីក្រុងបាងកក ត្រូវបានប៉ូលីសរកឃើញអត្តសញ្ញាណហើយ នាងគឺជាភ្ញៀវទេសចរជនជាតិអាមេរិក ។
ប៉ូលីស Thonglor បានកោះហៅស្ត្រីជនជាតិអាមេរិកដែលបង្កការភ្ញាក់ផ្អើលនៅក្នុងឃ្លីបវីដេអូ ឈ្មោះ Donika អាយុ ២៣ ឆ្នាំ ពីកន្លែងស្នាក់នៅរបស់នាងស្ថិតនៅផ្លូវ Rama IV កាលពីយប់ថ្ងៃចន្ទ ។
នាង Donika បានប្រាប់ប៉ូលីសថា នៅយប់ថ្ងៃពុធនោះ នាងបានចេញក្រៅផឹកស៊ី មុនពេលជិះតាក់ស៊ីជាមួយមិត្តភក្តិ២នាក់ទៀត វិលត្រឡប់ទៅកន្លែងស្នាក់នៅរបស់ពួកគេវិញ, នេះបើយោងតាមសេចក្តីរាយការណ៍របស់ Daily News ។
យោងតាមមន្ត្រីប៉ូលីសលោក Sitthisak Nakamat, នាងបានពន្យល់ថា ស្ថានភាពស្រវឹងខណៈពេលធ្វើដំណើរនោះ នាងហាក់ដូចជាពុំអាចគ្រប់គ្រងស្មារតីបាន ពោលគឺពុំដឹងអ្វីទាំងអស់ ហេតុដូច្នេះហើយ នាងក៏បានបើកទ្វារតាក់ស៊ី និងជុះនោមទាំងកណ្តាលផ្លូវប្រសព្វ Asoke តែម្តងទៅ ។
ទោះយ៉ាងណា ស្ត្រីបរទេសរូបនេះ ត្រូវបានប៉ូលីសឃាត់ខ្លួន និងផាកពិន័យនូវទឹកប្រាក់ចំនួន 2,000 បាត (ស្មើនឹង ៦០ ដុល្លារអាមេរិក) ចំពោះទង្វើជុះនោមនៅទីសាធារណៈ និងជាកន្លែងត្រូវបានហាមឃាត់ទៀតផង ៕ ដោយ៖ ឧត្តម (ប្រភព៖ Coconuts)