នេះជាវីដេអូថ្មីមួយដែលបង្ហាញពីទិដ្ឋភាពដ៏មហាស្លុតរន្ធត់ស្ទើរគាំងបេះដូង នៅពេលដែលឧទ្ធម្ភាគចក្រ១គ្រឿងដឹកសេដ្ឋី និងជាម្ចាស់ក្លឹប Leicester City លោក Vichai Srivaddhanaprabha ដែលរួមដំណើរជាមួយមនុស្ស៤នាក់ផ្សេងទៀត បានក្រឡាប់ចាក់ដូចស្លឹកនៅលើលំហអាកាស និងធ្លាក់ឆាបឆេះភ្លាមៗ បន្ទាប់ហោះហើរបានជាង១នាទីប៉ុណ្ណោះ ពីពហុកីឡាដ្ឋាន King Power ក្រោយការប្រកួតបាល់ទាត់ចប់នៅយប់ថ្ងៃអាទិត្យ ។
អ្នកជំនាញការអាកាសចរណ៍ លោក Jim Rowlands ដែលជាអតីតសមាជិកអាកាសយានិក RAF Puma បាននិយាយថា៖ «ពិតជារន្ធត់ចិត្តណាស់ នៅពេលបានឃើញហេតុការណ៍ក្នុងវីដេអូនេះ» ។
លោកបន្តថា៖ «ឧទ្ធម្ភាគចក្រនេះ គឺស្តែងឡើងនូវបញ្ហាជាមួយផ្នែកកន្ទុយរបស់វា ដែលជាសុបិន្តដ៏អាក្រក់បំផុតរបស់ភីឡុតគ្រប់ៗរូប» ។
គួររម្លឹកផងដែរថា បវរកញ្ញាចក្រវាឡថៃលំដាប់លេខ២ នាង Nusara Suknamai អាយុ ៣២ ឆ្នាំ ជាជំនួយការរបស់លោក Srivaddhanaprabha ក៏ស្ថិតក្នុងចំណោមមនុស្ស ៥ នាក់ ដែលបានស្លាប់នៅក្នុងគ្រោះថ្នាក់ឧទ្ធម្ភាគចក្ររបស់ក្លឹប Leicester City នេះផងដែរ ៕ ដោយ៖ ចន្ទី (ប្រភព៖ The Sun)