តាកែវ ៖ ថ្លែងនៅក្នុងពិធីបើកបវេសនកាលឆ្នាំសិក្សាថ្មី ឆ្នាំ២០១៨ -២០១៩ នៅសាលាវិទ្យាល័យជាស៊ីមតាកែវ នាព្រឹកថ្ងៃទី ១ ខែវិច្ឆិកា ឆ្នាំ២០១៨នេះ លោក យស ណាស៊ី អភិបាលរងខេត្តតាកែវ បានលើកឡើងថា បច្ចុប្បន្ននេះនៅក្នុងប្រទេសរបស់យើងចាំបាច់ណាស់ នៅប្រពន្ធបច្ចេកវិទ្យាដែលតម្រូវអោយបណ្តាអង្គការ ស្ថាប័ននានាជាច្រើន ក៏ដូចជាដំណើរការងារប្រចាំថ្ងៃលើកិច្ចការងាររដ្ឋបាល គឺត្រូវបានបំពាក់ទៅដោយប្រព័ន្ធបច្ចេកវិទ្យាទាំងអស់ ដើម្បីសម្រួលឬពន្លឿនលើការងារបម្រើសេវាសារធារណ និងកិច្ចការងារអ្វីផ្សេងៗ ដូច្នេះដើម្បីអោយការសិក្សា ក៏ដូចជាការបង្រៀន របស់លោកគ្រូអ្នកគ្រូទាំងអស់ លោកគ្រូអ្នកគ្រូចាំបាច់ណាស់ត្រូវស្វែងយល់ឲ្យបានច្រើន ព្យាយាមពង្រីកសមត្ថភាពរបស់ខ្លួនបន្ថែមទៀត រកមើលគន្លះនឹងចំណុចល្អៗដែលមានលើបច្ចេកវិទ្យា សម្រាប់យកមកបង្ហាត់បង្ហាញ ឬបង្រៀនដល់សិស្សៗ ដើម្បីអោយពួកគាត់កាន់តែមានភាពងាយស្រួលនៅពេលដែលបានបញ្ចប់ការសិក្សា រួចរកការងារធ្វើ ទៅថ្ងៃខាងមុខ ។
ក្នុងនោះដែរលោក យស ណាស៊ី ក៏បានធ្វើការណែនាំទៅកាន់ក្មួយៗសិស្សានុសិស្ស និងយុវជន យុវនារីទាំងអស់ត្រូវខិតខំរៀនសូត្រអោយបានខ្ចាប់ខ្ជួនព្រមទាំងចូលរួមគ្រប់សកម្មភាពនានាដើម្បីគាំទ្រដំណើរការអភិវឌ្ឍសាលារៀន និងសង្គមជាតិរបស់យើងជាងនេះទៅទៀតក្មួយៗសិស្សានុសិស្សទាំងអស់ត្រូវចងចាំថា បើយើងស្រឡាញ់ខ្លួន យើងស្រឡាញ់គ្រួសាររបស់យើងលោកប៉ា អ្នកម៉ាក់ និងស្រឡាញ់អនាគតរុងរឿង ក្មួយៗត្រូវតែជៀសឆ្ងាយពីគ្រឿងញៀន ឬអំពើអបាយមុខផ្សេងៗនិងអំពើអសកម្មនានា ។
ចុងបញ្ចប់នៃកម្មវិធីបើកបវេសនកាលឆ្នាំថ្មីនេះដែរ ក៏មានការរៀបចំការប្រគល់រង្វាន់លើកទឹកចិត្តដល់សិស្សពូកែ និងសិស្សឆ្នើមផងដែរ ៕ ដោយ ៖ តាកែវ