ភ្នំពេញ ៖ បុរសជាជនជាតិចិនម្នាក់ បានជិះម៉ូតូកង់បីឥណ្ឌាហើយចុះ រត់ចូលទៅក្នុងភោជនីយដ្ឋាន ជីន សៀន យកកាំបិតអារនិងចាក់ខ្លួនឯងក្នុងបំណងសម្លាប់ខ្លួន បណ្តាលឲ្យរងរបួសធ្ងន់ ហើយត្រូវបានសមត្ថកិច្ចហៅរថយន្តសង្គ្រោះបន្ទាន់មន្ទីរពេទ្យកាល់ម៉ែត នៅព្រឹកថ្ងៃទី១ ខែវិច្ឆិកា ឆ្នាំ២០១៨ នៅចំណុចផ្លូវភ្លោះអូរឫស្សី សង្កាត់បឹងព្រលឹត ខណ្ឌ៧មករា។
សមត្ថកិច្ច បានប្រាប់ថា បុរសជាជាតិចិនម្នាក់ ចុះពីលើម៉ូតូកង់បីឥណ្ឌា ដើរមកញាក់មុខញាក់មាត់ដាក់សន្ដិសុខយាមភោជនីយដ្ឋាន ជីន សៀន ចំនួន២ដង រួចហើយក៏រត់ចូលទៅក្នុង យកកាំបិតចិតបន្លែចាក់ពោះ ហើយយកកាំបិតប៉័ងតោ វះពោះបណ្តាលឲ្យរងរបួសធ្ងន់។
ក្រោយពេលកើតហេតុ បុគ្គលិកដែលធ្វើការនៅក្នុងភោជនីយដ្ឋាននោះ បាននាំគ្នារាយការណ៍ទៅសមត្ថកិច្ចមូលដ្ឋាន ឲ្យចុះមកដល់កន្លែងកើតហេតុ និងបានទាក់ទងទៅរថយន្ដសង្គ្រោះបន្ទាន់មន្ទីរពេទ្យកាល់ម៉ែត ដើម្បីមកដឹកយកជនរងគ្រោះខាងលើ។
គេមិនទាន់ស្គាល់អត្តសញ្ញាណបុរសជនជាតិចិនខាងលើនេះ ហើយសមត្ថកិច្ចក៏មិនបានបញ្ជាក់ពីមូលហេតុ ដែលជនជាតិចិនម្នាក់នេះ យកកាំបិតអារខ្លួន ក្នុងបំណងបញ្ចប់ជីវិតនោះទេ៕ ដោយ ៖ បញ្ញាស័ក្តិ
