ភ្នំពេញ ៖ មេឈ្មួញដីដែលសំបូររឿងអាស្រូវលោកស្រីឧកញ៉ា ស៊ុយ សុផាន ប្រធានក្រុមហ៊ុន ផាន អ៊ីមិច បានប្តឹងអ្នកស្រី ភោគ សុភីន សកម្មជនដីធ្លីសហគមន៍បុរីកីឡា ពីបទគំរាមកំហែង ដោយមានបញ្ជាឲ្យបំពេញលក្ខខណ្ឌអ្វីមួយ និងបំផ្លិចបំផ្លាញទ្រព្យសម្បត្តិអ្នកដទៃ។
ចំណែកតុលាការបានចេញដីកាកោះហៅអ្នកស្រី ភោគ សុភីន ឲ្យចូលបំភ្លឺនៅសាលាដំបូងរាជធានីភ្នំពេញ នៅវេលាម៉ោង៨ និង៣០នាទីព្រឹក ថ្ងៃទី១ ខែវិច្ឆិកា ឆ្នាំ២០១៨ ពីដំណើររឿងលោកស្រី ស៊ុយ សុផាន ប្តឹង តាមដីកាកោះ ចេញកាលពីថ្ងៃទី២៥ ខែតុលា ឆ្នាំ២០១៨ ចុះហត្ថលេខាដោយលោក ស៊ឺ វណ្ណនី ព្រះរាជអាជ្ញារងអមសាលាដំបូងរាជធានីភ្នំពេញ។
សូមជម្រាបថា លោកស្រី ស៊ុយ សុផាន ប្រធានក្រុមហ៊ុន ផាន អ៊ីម៉ិច បានប្តឹងអ្នកស្រី ភោគ សុភីន អាយុ៤៥ឆ្នាំ ទៅនាយកដ្ឋាននគរបាលព្រហ្មទណ្ឌនៃក្រសួងមហាផ្ទៃ ហើយត្រូវបានកោះហៅកាលពីថ្ងៃទី៧ ខែមីនា ឆ្នាំ២០១៨។
អង្គការខុមហ្វ្រែល នៅថ្ងៃទី១វិច្ឆិកានេះ បានផ្សាយថា “សាលាដំបូងរាជធានីភ្នំពេញ បានសម្រេចពន្យារពេល ការចូលបំភ្លឺរបស់សកម្មជនដីធ្លី នៅតំបន់បឹងកក់ និងបុរីកីឡា ទៅថ្ងៃក្រោយវិញ បន្ទាប់ពីមានការស្នើសុំពីមេធាវីការពារក្ដី ឲ្យសកម្មជនដីធ្លីទាំង៣នាក់នោះ។ សកម្មជនដីធ្លីសហគមន៍បុរីកីឡា អ្នកស្រី ភោគ សុភីន ត្រូវបានតុលាការរាជធានីភ្នំពេញ កោះហៅឲ្យចូលបំភ្លឺនៅព្រឹកថ្ងៃនេះ ហើយសកម្មជនដីធ្លីតំបន់បឹងកក់ អ្នកស្រី ស៊ា ណារ៉េត និងកញ្ញា អ៊ឹម ស្រីទូច ក៏ត្រូវបានតុលាការកោះហៅ ឲ្យចូលបំភ្លឺនៅព្រឹកថ្ងៃស្អែកទី២វិច្ឆិកានេះផងដែរ”។
សាលាដំបូងរាជធានីភ្នំពេញ នៅថ្ងៃទី១ ខែវិច្ឆិកា នេះបានសម្រេចលើកពេលការចូលបំភ្លឺ របស់សកម្មជនដីធ្លីនៅតំបន់បឹងកក់ និងបុរីកីឡា ទៅថ្ងៃក្រោយវិញ។ សកម្មជនដីធ្លីសហគមន៍បុរីកីឡា អ្នកស្រី ភោគ សុភីន ត្រូវបានតុលាការរាជធានីភ្នំពេញ កោះហៅឲ្យចូលបំភ្លឺនៅព្រឹកថ្ងៃព្រហស្បតិ៍ ទី១វិច្ឆិកានេះ ចំណែកឯសកម្មជនដីធ្លីអតីតតំបន់បឹងកក់ចំនួនពីររូបផ្សេងទៀតគឺ អ្នកស្រី ស៊ា ណារ៉េត និងកញ្ញា អ៊ឹម ស្រីទូច ត្រូវបានតុលាការ កោះហៅឱ្យចូលបំភ្លឺនៅព្រឹកថ្ងៃសុក្រ ទី២វិច្ឆិកា។ ប៉ុន្តែសុទ្ធតែត្រូវបានតុលាការសម្រេចលើកពេលទៅថ្ងៃក្រោយវិញ។
មេធាវីការពារក្ដីឲ្យសកម្មជនដីធ្លីទាំង៣រូបគឺ លោក តឹក ធារ៉ូ បានប្រាប់ថា ការចូលបំភ្លឺនៅព្រឹកថ្ងៃទី១វិច្ឆិកានេះ ត្រូវបានពន្យារពេលទៅថ្ងៃក្រោយវិញ ទៅតាមសំណើរបស់លោក។ លោកមានមូលហេតុដែលលោកសុំពន្យារពេល ដោយសារលោកមិនទាន់បានសិក្សាក្នុងសំណុំរឿងនេះ ឲ្យបានច្បាស់លាស់នៅឡើយ។
សកម្មជនដីធ្លីទាំង៣រូបនេះ ត្រូវបានអ្នកស្រី ស៊ុយ សុផាន ម្ចាស់ក្រុមហ៊ុន ផាន អ៊ីម៉ិច ប្ដឹងដោយចោទថា បានគំរាមកំហែង និងបំផ្លិចបំផ្លាញទ្រព្យសម្បត្តិអ្នកដទៃ ដែលបណ្ដឹងនោះបានកើតឡើងក្រោយពីក្រុមសកម្មជនដីធ្លីទាំងនោះ បាននាំគ្នាតវ៉ានៅមុខគេហដ្ឋានរបស់អ្នកស្រី ស៊ុយ សុផាន កាលពីខែកក្កដាកន្លងមកនេះ។
បន្ទាប់ពីចូលខ្លួនតាមដីកាកោះ របស់តំណាងអយ្យការ លោកស្រី គោក សុភីន បានថ្លែងប្រាប់ក្រុមអ្នកសារព័ត៌មាន នៅក្រៅរបងសាលាដំបូងរាជធានីភ្នំពេញថា តំណាងអយ្យការនៅមិនទាន់បានសាកសួរអ្នកស្រី នៅឡើយទេ ដោយព្រះរាជអាជ្ញាសុំលើកពេលទៅថ្ងៃក្រោយ។
សូមបញ្ជាក់ថា យោងតាមដីការកោះ របស់ តំណាងអយ្យការអមសាលាដំបូងរាជធានីភ្នំពេញ ស៊ី វណ្ណនី បានអញ្ជើញឈ្មោះ ភោគ សុភីន ភេទស្រី អាយុ៤៥ឆ្នាំ ជាជនសង្ស័យ មកកាន់អយ្យការអមសាលាដំបូងរាជធានីភ្នំពេញ នៅថ្ងៃទី១ខែវិច្ឆិកាឆ្នាំ២០១៨ ដើម្បីបំភ្លឺ ពីដំណើររឿងរបស់ឈ្មោះ ស៊ុយ សុផាន ប្តឹងពីបទ គំរាមកំហែងដោយមានបញ្ជាឲ្យបំពេញលក្ខខណ្ឌអ្វីមួយ និងបំផ្លិតបំផ្លាញទ្រព្យសម្បត្តិអ្នកដទៃ៕ ដោយ ៖ រចនា
