ពីកូនអ្នកស្រែខោមិនខោអាវមិនអាវ ប៉ុន្តែ ដោយសារតែមានដុងខាងចម្រៀងពីធម្មជាតិកុមារា ធឿន បុរី កំពុងឆក់យកបេះដូងមហាជនគ្រប់ស្រទាប់ក្មេងចាស់ កោតសរសើរថាមានទឹកដមសម្លេងពិរោះខ្លាំងបំផុត ដែលពុំឃើញមិនមុនមកទេ បន្ទាប់ពីប្អូនប្រុសបានចាប់ផ្តើមទទួលការចាប់អារម្មណ៍ តាមរយៈការបង្ហើរបទចម្រៀងនៅលើបណ្តាញសង្គមហ្វេសប៊ុក ។
ថ្វីត្បិតមានអាយុទើបតែ ១១ ឆ្នាំ ក្តី តែ បុរី ត្រូវបានមហាជនមើលឃើញថា រូបគេមានទឹកដមសម្លេងធ្ងន់ ខ្ពស់ ជាពិសេសចេះប្រើប្រាស់ «អឿន» យ៉ាងល្អបំផុត ដែលប្រៀបដូចជាស្ទៃល៍របស់កំពូលតារាចម្រៀងជើងចាស់ដ៏ល្បីល្បាញដក់ជាប់ក្នុងដួងចិត្តប្រជាជនខ្មែរនៅទូទាំងប្រទេសមួយរូបគឺលោក កែវ សារ៉ាត់ អីចឹងដែរ ។ ពុំត្រឹមតែប៉ុណ្ណឹងទេ បុរី ក៏តែងបង្ហាញកាយវិការ និងសក់ យកស្ទៃល៍របស់លោក កែវ សារ៉ាត់ ទៀតផង ខណៈប្អូនប្រុសតែងតែលើកយកបទចម្រៀងរបស់គាត់មកបកស្រាយ នៅតាមកម្មវិធីផ្សេងៗ ។
ពី១ថ្ងៃទៅ១ថ្ងៃ ឃើញថាទឹកដមសម្លេងរបស់ បុរី មានការវិវត្តន៍កាន់ល្អប្រសើរជាងមុនឆ្ងាយហើយ ។ ជាក់ស្តែង កាលពីពេលថ្មីៗនេះ តារាចម្រៀងវ័យក្មេងល្បីមិនឆ្លងកាត់ការប្រលងរូបនេះ បានបញ្ចេញបទចម្រៀង Cover ថ្មីមួយ មានចំណងជើងថា «កំពង់ចាមកំពង់ចិត្ត» ធ្វើឲ្យមហាជនលាន់មាត់សរសើរមិនដាច់ពីមាត់នោះទេ ៕ ដោយ៖ ឧត្តម
