នៅក្នុងជំនួបជាមួយសហគ្រិនក្នុងស្រុក នាថ្ងៃទី១ ខែវិច្ឆិកា លោកប្រធានាធិបតីចិន បានសន្យាថា នឹងគាំទ្រក្រុមហ៊ុនឯកជន តាមរយៈការយកពន្ធក្នុងតម្លៃទាប និងការផ្តល់មូលនិធិបន្ថែមពីរដ្ឋ។ ទោះជាយ៉ាងណាក៏ដោយ លោកXi Jinping ក៏បានក្រើនរំឭកផងដែរថា សេដ្ឋកិច្ចរបស់ប្រទេសចិននាខណៈនេះ កំពុងតែជួបនឹងភាពរអាក់រអួល ដោយសារតែសហរដ្ឋអាមេរិកដំឡើងពន្ធគយលើមុខទំនិញរបស់ចិន និងដោយសារវិបត្តិបំណុលក្នុងស្រុកកើនឡើង។
ទោះបីជាស្ថានភាពសេដ្ឋកិច្ចជាទូទៅរបស់ប្រទេសចិន នៅមានស្ថិរភាពយ៉ាងណាក្តី ក៏ការរក្សាលំនឹងនៃការអភិវឌ្ឍន៍សេដ្ឋកិច្ចរបស់ចិន កំពុងស្ថិតនៅក្នុងភាពមិនប្រាកដប្រជា ហើយភាពមិនប្រាកដប្រជានេះបានកើនឡើង ដែលជាហេតុធ្វើឲ្យក្រុមហ៊ុនជាច្រើន ដែលកំពុងរកស៊ីនៅចិនកំពុងប្រឈមមុខនឹងបញ្ហាលំបាក។ នេះបើតាមសម្តីរបស់លោកXi Jinping ដែលចុះផ្សាយដោយទីភ្នាក់ងារសារព័ត៌មានចិន ស៊ីនហួរ។
មួយវិញទៀត ដើម្បីគាំទ្រដល់ក្រុមហ៊ុនក្នុងស្រុក មេដឹកនាំចិនក៏បានស្នើសុំឱ្យចៅហ្វាយខេត្តចិន បង្កើននូវប្រាក់សន្សំផ្ទាល់ខ្លួន ដើម្បីទុកជួយឧបត្ថម្ភដល់ក្រុមហ៊ុនដែលកំពុងមានវិបត្តិហិរញ្ញវត្ថុ។ ទន្ទឹមគ្នានេះ លោក Xi ក៏បានគូសបញ្ជាក់ផងដែរអំពីគោលនយោបាយរបស់រដ្ឋាភិបាលចិន ក្នុងការបង្កើតបរិយាកាសប្រកួតប្រជែងពាណិជ្ជកម្មប្រកបដោយយុត្តិធម៌ និងតម្លាភាព ដើម្បីជួយដល់សហគ្រិនទាំងឡាយដែលកំពុងប្រតិបត្តិការក្នុងស្រុកចិន។
ស្របគ្នានេះដែរ ដើម្បីដោះស្រាយបញ្ហាប្រឈមចំពោះសេដ្ឋកិច្ចជាតិនេះ ប្រមុខដឹកនាំចិនគឺលោក Xi Jinping ក៏គ្រោងជួបចរចាជាមួយលោកប្រធានាធិបតីអាមេរិក Donald trump នាចុងខែវិច្ឆិកាខាងមុខនេះ នៅឯកិច្ចប្រជុំក្រុមប្រទេស G20 ដែលនឹងប្រារព្ឋធ្វើនៅក្នុងប្រទេសអាហ្សង់ទីន។
គួររំលឹកថា ដោយសារឱនភាពជញ្ជីងពាណិកម្មក្នុងការដោះដូរទំនិញនិងសេវាកម្មរវាងគ្នា ប្រកាសកាលពីថ្ងៃទី២០ តុលា កន្លងទៅថ្មីៗនេះ រដ្ឋាភិបាលទីក្រុងវ៉ាស៊ីនតោន បានដាក់ពន្ធចំនួន១០ភាគរយ ទៅលើការនាំចូល របស់ចិនមកកាន់អាមេរិកក្នុងតម្លៃទឹកប្រាក់២០០ពាន់លានដុល្លារ។ នយោបាយដំឡើងពន្ធគយរបស់អាមេរិកនេះ បានធ្វើឲ្យទីក្រុងប៉េកាំង ត្រូវជួបឧបសគ្គក្នុងការរក្សាកម្រិតកំណើននៃសេដ្ឋកិច្ចរបស់ខ្លួននាពេលបច្ចុប្បន្ន៕សូយន
,