នៅថ្ងៃទី១ ខែវិច្ឆិកា ប្រធានាធិបតីអាមេរិកDonald Trump បានឱ្យដឹងថា លោកមានការសន្ទនា«យ៉ាងល្អ»តាមទូរស័ព្ទជាមួយប្រធានរដ្ឋចិន Xi Jinping ទាក់ទងដល់ជម្លោះពាណិជ្ជកម្មរវាងមហាអំណាចទាំងពីរនេះ។
លោក Donald Trump បានសរសេរលើ Twitter ថា ទើបមានការប្តូរយោបល់អូសបន្លាយ ហើយល្អណាស់ជាមួយប្រធានរដ្ឋ Xi ។យើងខ្ញុំបាននិយាយដល់ប្រធានបទច្រើន តែពាណិជ្ជកម្មគឺជាបញ្ហាស្នូល។
តាមម្ចាស់សេតវិមាន នោះការចរចាអំពីពាណិជ្ជកម្មកំពុងប្រព្រឹត្តទៅយ៉ាងល្អប្រសើរ ហើយបណ្តាជំនួប«ត្រូវបានរៀបចំផែនការ» នាសន្និសីទកំពូល G20 នៅBuenos Aires (Argentina) អំឡុងចុងខែនេះ។
ស្របពេលជាមួយគ្នានោះ នៅថ្ងៃនេះដែរ ក្នុងសន្និសីទនាក្រុងប៉េកាំង លោក Xi Jinping បានថ្លែងទៅកាន់សហគមន៍អ្នកជំនួញចិនដោយទទួលស្គាល់ថាខឿនសេដ្ឋកិច្ចមានសញ្ញាអស្ថិរភាព។
កាលពីថ្ងៃទី៣១តុលា ការិយាល័យនយោបាយនៃបក្សកុម្មុយនិស្តចិនឯកភាពថា សម្ពាធកំពុងកើនឡើង «អំពីសេដ្ឋកិច្ច» ទន្ទឹមនឹងការប្រែប្រួលយ៉ាងជ្រាលជ្រៅជាច្រើនក្នុងបរិស្ថានខាងក្រៅ ។
នៅថ្ងៃ៣១តុលា ប្រមុខការទូតអាមេរិក Mike Pompeo ប្រកាសថា អាមេរិកកំពុងខំប្រឹងប្រែងលើវិស័យជាច្រើនដើម្បី «បញ្ចុះបញ្ចូលចិន»ឱ្យមានទង្វើជាប្រទេសធម្មតាដូចគេឯងលើវិស័យពាណិជ្ជកម្ម ហើយគោរពច្បាប់អន្តរជាតិ៕លីសា