បុរសជាឪពុកម្នាក់រស់នៅក្នុងប្រទេសចិន បានបង្កឲ្យសាធាណៈជនផ្ទុះកំហឹងយ៉ាងខ្លាំង បន្ទាប់ពីបុរសចិត្តតិរឆ្ឆានរូបនេះ បានព្យាយាមសម្លាប់កូនស្រីទើបកើតរបស់ខ្លួន ដោយបោះទម្លាក់ពីច្រាំងថ្មដ៏ខ្ពស់មួយ ដោយសារតែចង់បានកូនប្រុសជំនួស ។ ប៉ុន្តែ ជីវិតនាងថ្លៃ បាននៅរស់រានមានជីវិតដ៏អស្ចារ្យ ។
យោងតាមប្រព័ន្ធផ្សព្វផ្សាយក្នុងស្រុកមួយ បានឲ្យដឹងថា មជ្ឈមណ្ឌលសុខភាពមួយនៅទីប្រជុំជន Magui បានរាយការណ៍ទៅប៉ូលីសថា ម្នាក់ក្នុងចំណោមទារកទើបកើតជាច្រើននាក់ ដែលស្ថិតក្រោមការថែទាំរបស់ខ្លួន បានបាត់ខ្លួននៅព្រឹកថ្ងៃទី២៦ ខែតុលា ឆ្នាំ២០១៨ ។
ឪពុកទារិកាឈ្មោះ Li ដែលត្រូវបានគេកត់សម្គាល់ជាមួយសកម្មភាពគួរឲ្យសង្ស័យ បានបញ្ចេញនូវអ្វីដែលរូបគាត់បានធ្វើឡើង បន្ទាប់ពីបុរសរូបនេះត្រូវចោទសួរដោយប៉ូលីស ។
Li បានប្រាប់ក្រុមអ្នកស៊ើបអង្កេតថា គាត់បានដាក់កូនស្រីទើបកើតចូលក្នុងថង់មួយ និងព្យាយាមលួចនាំយកនាងចាកចេញពីមន្ទីរពេទ្យ នៅវេលាម៉ោងប្រហែល ១ រំលងអាធ្រាត្រ ។
Li បានសារភាពថា រូបគេបាននាំយកកូនស្រី ទៅខាងក្រៅក្រុង ហើយបោះទម្លាក់ចោលនៅឯច្រាំងថ្មដាច់ស្រយាលមួយ, នេះបើយោងតាមរបាយការណ៍របស់ Shanghaiist ។ អាជ្ញាធរបន្ទាប់មក បានឲ្យ Li នាំពួកគេទៅកាន់តំបន់នោះ ទីកន្លែងដែលរូបគេបានប្រព្រឹត្តទោសកំហុស ។
នៅវេលាម៉ោងប្រហែល ១១ ថ្ងៃ ក្រុមមន្ត្រី អមដំណើរជាមួយអ្នកស្ម័គ្រចិត្តក្នុងតំបន់ បានចាប់ផ្តើមស្វែងរកទារិការងគ្រោះ នៅក្នុងជ្រលងភ្នំ និងវារហោស្ថាននៅពីខាងក្រោមច្រាំងថ្មដ៏ខ្ពស់នោះ ។
ក្នុងរយៈពេល២ម៉ោង ក្នុងការស្វែងរក ក្រុមសង្គ្រោះបានលឺសម្លេងស្រែកយំរបស់ទារក ដែលនាំឲ្យពួកគេបានទៅដល់ទីកន្លែងនាងដែលកំពុងស្ថិតនៅខាងក្រោយគុម្ពោតព្រៃក្រាសមួយ ។
ឥឡូវនេះ ទារិការងគ្រោះ ត្រូវបានគេរាយការណ៍ថា កំពុងមានសុវត្ថិភាព ដោយស្ថិតក្រោមការថែទាំពីម្តាយរបស់នាង ។
Li ដែលត្រូវបានប៉ូលីសចាប់ខ្លួន បានពន្យល់ថា គាត់សង្ឃឹមថានឹងចិញ្ចឹមកូនប្រុសម្នាក់ទៀត ព្រោះគាត់មានកូនស្រី២នាក់ និងកូនប្រុសម្នាក់រួចហើយ ៕ ដោយ៖ ឧត្តម (ប្រភព៖ Nextshark)