ខេត្តព្រះសីហនុ ៖ ថ្មីៗនេះ មានករណីបន្លំជាច្រើន ទៅលើការចេញប័ណ្ណបើកបរអន្តរជាតិ ឬការបញ្ជាក់ប័ណ្ណបើកបរអន្តរជាតិ ដើម្បីអាចប្រើប្រាស់ ឬអាចបើកបររថយន្តបាននៅប្រទេសកម្ពុជា។
ត្រង់ចំណុចនេះ នាយកដ្ឋានដឹកជញ្ជូនផ្លូវគោក អគ្គនាយកដ្ឋានដឹកជញ្ជូនផ្លូវគោក នៃក្រសួងសាធារណការ និងដឹកជញ្ជូនសូមជម្រាបជូនបងប្អូនប្រជាពលរដ្ឋ និងជាពិសេសមន្ត្រីទទួលបន្ទុក សមត្ថកិច្ចអនុវត្តច្បាប់ចរាចរណ៍ផ្លូវគោក ឱ្យបានជ្រាប ដូចខាងក្រោម ៖
១- កម្ពុជាទទួលស្គាល់អនុសញ្ញាអន្តរជាតិស្តីពីប័ណ្ណបើកបរអន្តរជាតិឆ្នាំ១៩៤៩(សុពលភាពប័ណ្ណបើកបរអន្តរជាតិមានរយៈពេល១ឆ្នាំ។ ហើយសាមីខ្លួន ត្រូវយកប័ណ្ណបើកបរជាតិ និងប័ណ្ណបើកបរអន្តរជាតិដើម មកជាមួយ នៅពេលដែលចង់មកបើកបរនៅកម្ពុជា)។
២- កម្ពុជាស្ថិតនៅក្នុងដំណាក់ការស្នើសុំជាស្ថាប័នផ្លូវការក្នុងការមានសិទ្ធិចេញប័ណ្ណបើកបរអន្តរជាតិ(Accession) មិនទាន់បានការអនុម័តនៅឡើយ ( not yet ratify)។ ដូចនេះមិនទាន់មានសិទ្ធិក្នុងការចេញបណ្ណបើកបរអន្តរជាតិទេ។
៣- មិនមានស្ថាប័នរដ្ឋ ឬឯកជនណា មានសិទ្ធិក្នុងការចេញប័ណ្ណបើកបរអន្តរជាតិឱ្យទេ នៅកម្ពុជា។ ហេតុដូចនេះសូមបងប្អូនកុំមានការភាន់ច្រលំ។
៤- រាល់ការចេញប័ណ្ណបើកបរអន្តរជាតិ ឬការបញ្ជាក់ប័ណ្ណបើកបរអន្តរជាតិ គឺស្ថាប័នដែលបានទទួលសិទ្ធិក្នុងការចេញ ឬបញ្ជាក់ គឺសុទ្ធតែមាន កូដសំគាល់ ដែលអាចស្កេនមើលព័ត៌មានបាន (បច្ចុប្បន្នមាន ៨៥ ប្រទេស ហើយចេញឱ្យបានតែចំពោះប្រជាពលរដ្ឋជាជនជាតិរបស់ខ្លួនតែប៉ុណ្ណោះ មិនអាចចេញឱ្យពលរដ្ឋជនជាតិផ្សេងបានទេ)៕ ដោយ ៖ ដែន អយុធ្យា
