សិស្សម្នាក់អាយុ ១៥ឆ្នាំ នៅក្នុងប្រទេសបារាំងបានយកកាំភ្លើងខ្លីខ្យល់ភ្ជង់ក្បាលគ្រូ ដើម្បីគំរាមគ្រូឲ្យដូរអវត្តមានរបស់ខ្លួន ទៅជាមានវត្តមានវិញ។
អំពើដ៏ឆ្កួតលីលា និងមើលងាយដល់គ្រូរបស់ខ្លួននេះ បានកើតឡើងនៅក្នុងវិទ្យាល័យមួយនៅស្ថិតជាយក្រុងនៃទីក្រុងប៉ារីស។
សិស្សអាយុ ១៥ឆ្នាំខាងលើ បានយកកាំភ្លើងភ្ជង់ក្បាលអ្នកគ្រូ បន្ទាប់ពីអ្នកគ្រូនោះបានកត់ត្រាខ្លួនដាក់ថា អវត្តមាន ដោយសារតែគេមករៀនយឺត។ ការយកកាំភ្លើងភ្ជង់ក្បាលគ្រូនេះ គឺដើម្បីបង្ខំឲ្យគ្រូដូរពី អវត្តមាន មក វត្តមានវិញ។
វីដេអូនោះត្រូវបានថតដោយសិស្សនៅក្នុងថ្នាក់ និងបានធ្វើការចែកចាយក្នុងបណ្តាញសង្គមហ្វេសបុក។
សិស្សខាងលើនិយាយថា វាគ្រាន់តែជាការលេងសើចប៉ុណ្ណោះ។ គាត់ពិបាកចិត្តដោយសារតែគ្រូដាក់គាត់ អវត្តមាន បន្ទាប់ពីគាត់មករៀនយឺតពេល។
នៅក្នុងវីដេអូ មានលឺសូរសំឡេងសិស្សនិយាយថា “អ្នកគ្រូ! អ្នកគ្រូ! ដាក់គាត់វត្តមានវិញទៅ” ហើយចំណែកសិស្សដែលគំរាមគ្រូនោះក៏បាននិយាយថា “ដាក់ខ្ញុំមានវត្តមានវិញភ្លាម”។
នៅថ្ងៃបន្ទាប់ អ្នកគ្រូនោះបានធ្វើការចោទប្រកាន់សិស្សគាត់ ចំណែកសិស្សម្នាក់នោះក៏បានចូលខ្លួនទៅកាន់ប៉ុស្តិ៍ប៉ូលីសផងដែរ ហើយគាត់ត្រូវបានចោទប្រកាន់ពីបទអំពើហិង្សាធ្ងន់ធ្ងរ៕ សុភ័ក្ត្រ
ប្រភព៖ Brut