ជាការពិតណាស់ ការចោលសំរាម ឬ កាកសំណល់គ្រប់ប្រភេទពាសវាលពាសកាល ពុំត្រឹមតែធ្វើឲ្យខូចសោភ័ណ្ឌភាពទីក្រុង ឬ ទីប្រជុំជនប៉ុណ្ណោះទេ តែទង្វើគ្មានសណ្ឋាប់ដ៏អាក្រក់នេះ ក៏នឹងធ្វើឲ្យប៉ះពាល់ដល់អនាម័យបរិស្ថាននៃការរស់នៅរបស់ប្រជាពលរដ្ឋ ជាពិសេសវាអាចនាំឲ្យប៉ះពាល់ដល់សុខភាព និងក៏ដូចជាបាត់បង់តម្លៃទេសចរណ៍ផងដែរ ។
ជាក់ស្តែង ការយកសំរាម ជាពិសេសសំបកដូងយ៉ាងច្រើនបែបនេះ មកគរនៅលើខឿនផ្លូវនៃគល់ស្ពានអាកាសស្ទឹងមានជ័យ ដែលជាទីកន្លែងដ៏ស្រស់ស្អាតមួយ សម្រាប់បងប្អូនសាធារណៈជនមកអង្គុយជ្រកម្លប់ ឬ ដើម្បីហាត់ប្រាណជាដើម ឃើញថា វាជារូបភាពដ៏មិនល្អមួយដែលមិនគួរកើតមាននោះទេ ។
ទាក់ទងនឹងបញ្ហាដ៏មិនល្អមើលនេះផងដែរ ថ្មីៗនេះ លោកពូកម្នាក់ដែលជាភ្ញាក់ងារប្រមូលសំរាមប្រចាំសង្កាត់ស្ទឹងមានជ័យ ខណៈមកធ្វើការប្រមូលសំរាមទាំងអស់នោះចេញពីគល់ស្ពាន បានសំណូមពរដល់ប្រជាពលរដ្ឋទាំងអស់មេត្តាឈប់យកសំរាមមកចោលយ៉ាងអនាធិបតេត្យនៅទីកន្លែងស្ពានអាកាសដ៏ស្រស់ស្អាតនេះទៀត ដើម្បីចូលរួមជួយថែរក្សាបរិស្ថានទាំងអស់គ្នា ៕ ដោយ៖ ឧត្តម
