វិទ្យុសកម្មបញ្ចេញពីទូរស័ព្ទចល័ត, ឧបករណ៍បញ្ចេញ/ ទទួល WiFi តើមានបង្កជាមហារីក ឬអត់ គឺជាប្រធានបទជជែកដេញដោល ក្នុងមជ្ឈដ្ឋានអ្នកវិទ្យាសាស្ត្រច្រើនឆ្នាំកន្លងមក ។
ឆ្លើយតបនឹងកាសែត Mirror (អង់គ្លេស) សាស្ត្រាចារ្យ Anthony Miller នៅសកលវិទ្យាល័យតូរ៉ូនតូ, កាណាដា ចាត់ទុកថា វិទ្យុសកម្មអេឡិចត្រូនិក គួរត្រូវបានរៀបស្មើនឹងបារី និងអាមីញ៉ង់ តាមការចែកប្រភេទភ្នាក់ងារបង្កមហារីករបស់ WHO ។
សាស្ត្រាចារ្យ Miller អ្នកវិទ្យាសាស្ត្រ១រូបក្នុងចំណោមអ្នកវិទ្យាសាស្ត្រល្បីឈ្មោះ ដែលបានព្រមានអំពីវិទ្យុសកម្មអេឡិចត្រូនិក ដែលកំពុងមានវត្តមាននៅគ្រប់ទីកន្លែង អាចបង្កគ្រោះមហន្តរាយមហារីកក្នុងអនាគត, ក្នុងនោះកុមារជាក្រុមរងឥទ្ធិពលខ្លាំងក្លាបំផុត ។
ការស្រាវជ្រាវរបស់ស៊ុយអែត រកឃើញថា អ្នកប្រាស្រ័យជាមួយទូរស័ព្ទពី១០ឆ្នាំឡើងទៅមានហានិភ័យកើតដុំសាច់ខួរក្បាលខ្ពស់ជាង ២ ដង នៅខាងក្បាលដែលគេតែងស្តាប់ទូរស័ព្ទ ។ របកគំឃើញនេះនូវត្រូវបានពង្រឹងថែម ដោយការស្រាវជ្រាវទ្រង់ទ្រាយធំ ជាមួយនឹងមនុស្សរាប់ពាន់នាក់នៅច្រើនប្រទេសដោយស្ថាប័នមហារីកជួរមុខពិភពលោក -ស្ថាប័នស្រាវជ្រាវមហារីកចំណុះ WHO (IARC) ។
រឿងដែលធ្វើឲ្យសាស្ត្រាចារ្យ Miller និងអ្នកវិទ្យាសាស្ត្រល្បីឈ្មោះជាច្រើនទៀត បន្ថែមការព្រួយបារម្ភ គឺរាល់ភស្តុតាងបានបង្ហាញថា វិទ្យុសកម្មអេឡិចត្រូនិច «ដ៏ក្រាស់» អាចពាក់ព័ន្ធដល់ជំងឺខ្សោយបេះដូង, ការគ្មានកូនរបស់បុរស , ជំងឺបិទបាំងខ្លួនឯង, ថមថយការចងចាំ, របួសក្រូម៉ូសូម និង DNA រួមនឹងជំងឺជាច្រើនផ្សេងទៀត ៕ លីសា