នេះជាខណៈពេលរន្ធត់បំផុតមួយ ដែលបុរសជាប្តីម្នាក់ បានរួមគំនិតជាមួយក្មួយប្រុសម្នាក់ បាញ់សម្លាប់ប្រពន្ធរបស់ខ្លួនយ៉ាងសាហាវឃោរឃៅ ប្រៀបដូចជាសត្វធាតុអីចឹង ស្ថិតក្នុងទីក្រុង Vicentinópolis ភាគខាងត្បូងរដ្ឋ Goiás ប្រទេសប្រេស៊ីល កាលពីវេលាម៉ោង ៩ ព្រឹកថ្ងៃទី២៧ ខែតុលា ឆ្នាំ២០១៨ ។
តាមរយៈកាមេរ៉ាសន្តិសុខ បានបង្ហាញឲ្យឃើញស្ត្រីម្នាក់ បានចុះចេញពីរថយន្ត និងរត់ឡើងតាមចិញ្ចើមថ្នល់មុខផ្ទះ ប៉ុន្តែ បន្ទាប់មក បុរសម្នាក់ស្ថិតក្នុងសម្លៀកបំពាក់ខោអាវយឺតពណ៌ខ្មៅ ដេញតាមពីក្រោយ ជាមួយកាំភ្លើងនៅនឹងដៃ រួចបាញ់១គ្រាប់ទៅលើនាងបណ្តាលឲ្យដួលផ្កាប់ទៅនឹងដីតែម្តង ។ បន្ទាប់ពីបាញ់បណ្តាលឲ្យនាងដួលហើយ បុរសនោះបានរត់ទៅវិញ ប៉ុន្តែ ប្រហែលគិតថានាងពុំស្លាប់ ក៏បានបកមកវិញ ថែម១គ្រាប់ចំកញ្ចឹងក ។
ទោះយ៉ាងណា ស្ត្រីរងគ្រោះនៅតែនៅមានជីវិត និងបាននិយាយសុំអង្វរបុរសនោះកុំសម្លាប់ខ្លួនអី ។ ប៉ុន្តែ បន្ទាប់មក បុរសវ័យក្មេងម្នាក់ទៀត ក៏បានចូលមកដល់ និងលើកនាងផ្ងារ ធ្វើឲ្យជនដៃដល់បាញ់ថែម១គ្រាប់ទៀតចំក្បាល បណ្តាលឲ្យស្លាប់តែម្តង ។
ឈាមស្រែកស្បែកហៅ តាមរយៈវីដេអូពីកាមេរ៉ាសន្តិសុខ ជនដៃដល់ និងបុរសវ័យក្មេងដែលបានរួមគំនិត ក្នុងអំពើឃាតកម្មដ៏សាហាវព្រៃផ្សៃនេះ ត្រូវបានសមត្ថកិច្ចចាប់ខ្លួន នៅថ្ងៃព្រហស្បត៍ ។ ពួកគេទាំងពីរត្រូវបានស្គាល់ថា គឺជាពូ និងក្មួយនឹងគ្នា ។
ជនដៃដល់ដែលមានឈ្មោះ Ronaldo Cabral Franco អាយុ ៤៣ ឆ្នាំ បានប្រាប់ប៉ូលីសថា រូបគេគឺជាប្តីរបស់ស្ត្រីរងគ្រោះឈ្មោះ Valdiandrea D’arc de Almeida អាយុ ៣៨ ឆ្នាំ ហើយមូលហេតុដែលនាំឲ្យរូបគេឈានដល់សម្រេចចិត្តរួមគំនិតជាមួយក្មួយប្រុសឈ្មោះ Carlos Humberto da Silva Filho អាយុ ១៩ ឆ្នាំ ធ្វើឃាតប្រពន្ធបែបនេះ ដោយសារតែភ្លើងប្រច័ណ្ឌ ៕ ដោយ៖ ឧត្តម (ប្រភព៖ g1.globo)
ទស្សនាវីដេអូស្តែងៗ=>> Video
