ខេត្តព្រះសីហនុ ៖ ប្រជាពលរដ្ឋរស់នៅភូមិ៣ សង្កាត់លេខ៣ ក្រុងព្រះសីហនុ បានព្រួយបារម្ភខ្លាចលំនៅដ្ឋាន របស់ពួកគេ ដែលកំពុងរស់នៅ ត្រូវដួលរលំ ឬបាក់ស្រុត បណ្តាលមកពីការដ្ឋានសំណង់ របស់អ្នកវិនិយោគទុនចិន ជីកគ្រឹះសង់អាគារថ្មីនៅជាប់លំនៅដ្ឋានពួកគាត់កំពុងរស់នៅ។
ផ្តើមពីបញ្ហានេះ ក្រុមប្រជាពលរដ្ឋ បានសំណូមពរឱ្យ រដ្ឋបាលក្រុង-ខេត្តព្រះសីហនុ បញ្ជូនមន្ត្រីចុះពិនិត្យទៅលើ ការរដ្ឋានសំណង់ របស់អ្នកវិនិយោគជនជាតិចិន ដែលជីកកាយគ្រឹះ ដើម្បីសាងសង់អាគារ បាននាំឱ្យប៉ះពាល់ដល់លំនៅដ្ឋាន របស់ពួកគាត់ ប៉ុន្តែម្ចាស់ការដ្ឋាននោះ គេចមិនទទួលខុសត្រូវប្រសុនបើមានការខូចខាតទ្រព្យសម្បត្តិពួកគាត់ទេ។
បញ្ហានេះ ប្រជាពលរដ្ឋមួយចំនួន រស់នៅភូមិ៣ សង្កាត់លេខ១ ក្រុង-ខេត្តព្រះសីហនុ ត្រង់ចំណុចម្តុំសំណង់អាគាត់ទល់មុខ ផ្លូវឡើងទៅវត្តលើ ដែលលំនៅឋានរបស់ពួកគាត់ នៅជាប់ការដ្ឋានសំណង់ របស់អ្នកវិនិយោគទុនចិនមួយកន្លែង បារម្ភខ្លាចបាក់ស្រុត បណ្តាលមកពីការជីកគ្រឹះសង់អាគារ របស់ដ្ឋានសំណង់ខាងលើនេះ។
ក្រុមប្រជាពលរដ្ឋ បានសំណូមពរដល់មន្ត្រីរដ្ឋបាលក្រុង-ខេត្ត ឱ្យជួយមានវិធានការទៅម្ចាស់សំណង់ជនជាតិចិនខាងលើ ឱ្យពួកគេចុះកិច្ចសន្យាជាលាយលក្ខណ៍អក្សរ ឱ្យម្ចាស់ការដ្ឋានសំណង់មួយនោះ ឱ្យទទួលខុសត្រូវ ប្រសិនបើមានផលប៉ះពាល់ ដែលបណ្តាលមកពីការរដ្ឋានសំណង់ របស់អ្នកវិនិយោគទុនចិននេះផង។
ទាក់ទិនបញ្ហានេះ ប្រជាពលរដ្ឋ បានអះអាងថា អាជ្ញាធររដ្ឋបាលក្រុង-ខេត្តព្រះសីហនុ ហាក់សូវមិនរវល់អើពើ ចំពោះកង្វល់ របស់ពួកគាត់ទេ នៅពេលពួកគាត់បានជូនដំណឹង ពីការបារម្ភខ្លាចបាក់ស្រុតផ្ទះ ផ្តើមពីការដ្ឋានសំណង់ជនជាតិចិន ដែលកំពុងជីកគ្រឹះ មានជំរៅជ្រៅ នៅជាប់របងផ្ទះ របស់ពួកគាត់កំពុងរស់នៅក្នុងភូមិ៣ សង្កាត់លេខ១ ដោយអនុគ្រោះ។
និយាយត្អូញត្អែរដល់ចំណុចនេះ ប្រជាពលរដ្ឋរស់នៅភូមិ៣ សង្កាត់លេខ១ ក៏បានសំណូមពរដល់ លោក អ៊ី សុខឡេង អភិបាលក្រុងព្រះសីហនុ និងឯកឧត្តម យន្ត មីន អភិបាលខេត្តព្រះសីហនុ ឱ្យជួយបញ្ជូនមន្ត្រីជំនាញចុះត្រួតពិនិត្យ ឬធ្វើយ៉ាងណាឱ្យក្រុមហ៊ុនការដ្ឋានសំណង់ជនជាតិចិន ដែលកំពុងជីករណ្តៅចាក់គ្រឹះអាគារ ឱ្យធ្វើកិច្ចសន្យាទទួលខុសត្រូវរាល់ការខូចខាត ផ្ទះ ឬលំនៅឋាន របស់ពួកគាត់ ដែលអាចបណ្តាលមកពីការសាងសង់សំណង់ខាងលើនេះ៕ ដោយ ៖ ដែនសីមា