ភ្នំពេញ ៖ បុរសម្នាក់ជិះដួលបោកក្បាលស្លាប់ទាំងព្រលឹម ដោយសារដេញតាមក្រុមចោរ ធ្វើសកម្មភាព ឆក់កាបូប ពីប្ដីប្រពន្ធ២នាក់ កំពុងជិះម៉ូតូឌុបគ្នា បានសម្រេច នៅស្តុបផ្លូវ២៩៤ ភ្លាមនោះប្តីបានព្យាយាមជិះដេញតាម រហូតដល់ផ្លូវ៥១ កែងផ្លូវ៣០២ ត្រូវបានជនសង្ស័យដែលជាអ្នកបិទគូទ ជិះតាមមកធាក់ម៉ូតូឲ្យដួល បណ្ដាលបុរសជាប្ដី ខ្ទាតទៅបោកក្បាលស្លាប់ ចំណែកប្រពន្ធរបួសត្រូវភ្នែក ។
ថ្ងៃណាក៏ឮតែករណីចោរឆក់កាបូប ខ្សែក ឬទូរស័ព្ទដែរ។ អ្នកលក់ផ្កា២នាក់ប្ដីប្រពន្ធ កំពុងជិះម៉ូតូឌុបគ្នា ត្រូវបានក្រុមចោរធ្វើសកម្មភាពឆក់កាបូបស្ពាយពីស្ត្រីជាប្រពន្ធ បានសម្រេច ហើយជិះរត់គេច ភ្លាមនោះបុរសជាប្ដីបានបន្ថែមល្បឿនជិះដេញតាមពីក្រោយដែរ ស្រាប់តែមានបក្ខពួកចោរជាអ្នកបិទគូទ ជិះតាមមក ធាក់ម៉ូតូរបស់ជនរងគ្រោះ បណ្ដាលឲ្យដួលខ្ទាតប្ដីបោកក្បាលស្លាប់ភ្លាម និងប្រពន្ធរបួសចំចិញ្ចើម។ ក្រុមជនសង្ស័យបានបន្ថែមល្បឿនជិះរត់គេចបាត់ស្រមោលអស់។
ហេតុការណ៍នេះ បានកើតឡើងកាលពីវេលាម៉ោងជិត៦ព្រឹកព្រលឹមថ្ងៃទី៣ ខែវិច្ឆិកា ឆ្នាំ២០១៨នេះ នៅចំណុចស្តុបផ្លូវ២៩៤ សង្កាត់បឹងកេងកង១ ខណ្ឌចំការមន ហើយជនរងគ្រោះបានជិះដេញតាមកែងផ្លូវ៣០២ ត្រូវបក្ខពួក(អ្នកបិទគូទ) ជិះតាមធាក់ម៉ូតូឲ្យដួលបោកក្បាលស្លាប់ នៅផ្លូវ៣០២ មុខសាលាអន្តរជាតិខេមប្រីត ស្ថិតក្នុងសង្កាត់បឹងកេងកង១ ខណ្ឌចំការមន រាជធានីភ្នំពេញ។
ស្ត្រីរងគ្រោះ មានមុខរបរលក់ផ្កា បានប្រាប់ថា រូបគាត់និងប្ដី បានចេញពីផ្ទះគោលបំណងទៅយកផ្កាមកលក់ ដោយជិះម៉ូតូមួយគ្រឿង ម៉ាក Dream ពណ៌ខ្មៅ ពាក់ស្លាកលេខភ្នំពេញ 1BF-4859 ធ្វើដំណើរតាមផ្លូវព្រះនរោត្តម ក្នុងទិសដៅពីជើងទៅត្បូង ខណៈមកដល់ចំណុចកែងស្តុបផ្លូវ២៩៤ ស្រាប់តែលេចមុខក្រុមជនសង្ស័យ៤នាក់ ជិះម៉ូតូ២គ្រឿង (មិនចាំម៉ាក) មកអែបពីក្រោយ រួចធ្វើសកម្មភាព ឆក់យកកាបូបលុយ មានប្រាក់ជាង៣០០ដុល្លារ និងលុយខ្មែរមួយចំនួន ដែលគាត់ក្រវ៉ាត់ជាប់នឹងចង្កេះ បានសម្រេច ហើយគាត់ក៏ស្រែកឆោឡោ ចោរៗ ភ្លាមនោះជនសង្ស័យ ក៏បានជិះគេចខ្លួន ឃើញដូចនោះប្តីគាត់បានព្យាយាមជិះដេញតាម រហូតដល់ផ្លូវ៥១ កែងផ្លូវ៣០២ មុខសាលាអន្តរជាតិខេមប្រីត ក៏ត្រូវបានបក្ខពួកជនសង្ស័យ ដែលជាអ្នកបិទគូទ ជិះម៉ូតូតាមមកធាក់ម៉ូតូឲ្យដួល បណ្ដាលឲ្យប្ដីគាត់អូសខ្ទាតទៅបោកក្បាលនឹងផើងផ្កាស្លាប់យ៉ាងអណោចអធ័ម ចំណែកគាត់ រងរបួសត្រូវភ្នែក៕ ដោយ ៖ បញ្ញាស័ក្តិ
