ហេតុការណ៍គួរឱ្យរន្ធត់នេះកើតឡើងនៅប្រជុំជន នីងហួង ខេត្តហ៊ូណាន ប្រទេសចិន ។បងស្រីលី គឺជាអ្នកស្រុកស្រែ ហើយកាលពីឆ្នាំទៅមិញបងប្រុសរបស់គាត់បានរងគ្រោះថ្នាក់ រួចក៏ខ្ចីបុលលុយគេនាំយកទៅព្យាបាលនៅឯទីក្រុង។
អាស្រ័យដោយរបួសធ្ងន់ពេកមិនអាចសង្គ្រោះបាន បងប្រុសរបស់គាត់ក៏ទទួលមរណភាព។សាកសពត្រូវបានបញ្ជូនទៅតម្កល់ទុកក្នុងសាលសព ហើយគាត់ត្រឡប់មកផ្ទះដើម្បីរៀបចំកន្លែងធ្វើបុណ្យសព។យប់ថ្ងៃដដែលនោះ គាត់និងក្រុមគ្រួសារបានមកមន្ទីរពេទ្យដើម្បីទទួលយកសាកសពទៅផ្ទះ។ប៉ុន្តែនៅពេលបើកមុខមើល ស្រាប់តែកែវភ្នែកទាំងពីររបស់បងប្រុសត្រូវគេខ្វេះយកបាត់។ដោយទ្រាំមិនបានចំពោះអំពើព្រៃផ្សៃបែបនេះ ក្រុមគ្រួសារគាត់ក៏សម្រេចចិត្តរាយការណ៍ដល់មេដឹកនាំមន្ទីរពេទ្យ ហើយដាក់ពាក្យបណ្តឹងទៅប៉ូលិសប្រចាំតំបន់។
ភ្លាមៗនោះប៉ូលិសក៏មកនាំយកសាកសពទៅធ្វើកោសលវិច័យ និងបើកការស៊ើបអង្កត។
មកទល់ពេលនេះ ប៉ូលិសចាប់បានជនលើ្មស៤នាក់ហើយ។ បើតាមលទ្ធផលបថម ប៉ូលិសឱ្យដឹងថា នេះគឺជាករណីលួចផ្នែកសរីរាង្គមនុស្ស។ ផ្តើមចេញទង្វើនេះ គឺមានការសមគំនិតគ្នារវាងបុគ្គលិកនៅក្នុងនិងក្រៅមន្ទីរពេទ្យ។ក្នុងចំណោមជនល្មើសទាំង៤នាក់ រួមមានបុគ្គលិកមន្ទីរពេទ្យនិងពួកឈ្មួញជូញដូរសរីរាង្គមនុស្ស។
គេបានដឹងថា មន្ទីរពេទ្យនេះកំពុងចរចាសងជំងឺចិត្តដល់គ្រួសារបងស្រីលី៕លីសា