ខេត្តព្រះសីហនុ ៖ សមត្ថកិច្ចនគរបាល នៃស្នងការដ្ឋានខេត្តព្រះសីហនុ បានឱ្យដឹងថា ជនសង្សយ័ជនជាតិចិនចំនួន៧នាក់ ដែលជាប់ពាក់ព័ន្ធបទល្មើសគ្រឿងញៀនដាច់ដោយឡែកពីគ្នា ត្រូវសមត្ថកិច្ចជំនាញបានបង្ក្រាបបានជាបន្តបន្ទាប់។
លោកឧត្តមសេនីយ៍ត្រី ស៊ុន សុផាត ស្នងការរងទទួលផែន ប្រឆាំងបទល្មើស បានឲ្យដឹងថា កាលពីថ្ងៃទី១ និងទី២ ខែវិច្ឆិកា ឆ្នាំ២០១៨ នគរបាលប្រឆាំងគ្រឿងញៀនខេត្តព្រះសីហនុ សហការជាមួយកម្លាំងអធិការដ្ឋាននគរបាលក្រុងព្រះសីហនុ បានចុះបង្ក្រាបបទល្មើសគ្រឿងញៀន បានចំនួន៦ករណី ដោយឃាត់ខ្លួនជនសង្ស័យជនជាតិចិនចំនួន៧នាក់ និងដកហូតបានថ្នាំញៀនជាច្រើនកញ្ចប់។
សមត្ថកិច្ចបង្ហាញទីតាំង ដែលជនសង្ស័យបានប្រព្រិត្តបទល្មើសរួមមាន៖
*ករណីទី១នៅវេលាម៉ោង៣ជិតភ្លឺ ថ្ងៃទី១ ខែវិច្ឆិកា ឆ្នាំ២០១៨ ចាប់ខ្លួនជនជាតិចិនម្នាក់ នៅមុខផ្សារលេីក្រុងព្រះសីហនុ ឈ្មោះ Wu Yin Chang អាយុ៣០ឆ្នាំ មុខរបរ ចុងភៅ ដកហូតបាន ថ្នាំញៀនចំនួន៣ កញ្ចប់។
*ករណីទី២ នៅថ្ងៃទី១ ខែវិច្ឆិកាឆ្នាំ២០១៨ វេលាម៉ោង៤ និង១០នាទី ស្ថិតនៅ ភូមិ៤ សង្កាត់លេខ៤ ម្តុំតោ២ ចាប់ខ្លួនជនសង្ស័យម្នាក់ឈ្មោះ Fan Yong ជនជាតិចិន អាយុ៣០ឆ្នាំ មុខរបរមិនពិតប្រាកដ ដកហូតបានថ្នាំញៀនចំនួន ២កញ្ចប់ ជញ្ចីងថ្លឹងថ្នាំ ១ និង ទូស័ព្ទ ២គ្រឿង។
*ករណីទី៣ ថ្ងៃទី១ ខែវិច្ឆិកាឆ្នាំ២០១៨ ម៉ោង១៩ និង១៥ នាទីស្ថិតនៅ ក្រុម២ ភូមិ៤ សង្កាត់លេខ៤ ក្រុងព្រះសីហនុ ឃាត់ខ្លួនជនសង្ស័យបានចំនួន២នាក់ ទី១ឈ្មោះ Li QUi Zhi ជនជាតិ ចិន អាយុ២៦ឆ្នាំ មុខរបរមិនពិតប្រាកដ ដកហូតបានថ្នាំញៀន៩កញ្ចប់ និង ថ្នាំគ្រាប់ WY ១ កញ្ចប់ (៥គ្រាប់) ទូរស័ព្ទ ១គ្រឿង និងទី២ឈ្មោះ Xia zhuo ជនជាតិចិន អាយុ២០ឆ្នាំ មុខរបរមិនពិតប្រាកដ ចាប់បានថ្នាំញៀន ២កញ្ចប់តូច ទូរស័ព្ទ២គ្រឿង និងរថយន្ត ១គ្រឿង។
*ករណីទី៤ ថ្ងៃទី១ ខែវិច្ឆិកា ឆ្នាំ២០១៨ ម៉ោង ១៩និង ៥៥នាទីស្ថិតនៅ ក្រុម៩ ភូមិ១ សង្កាត់លេខ៣ ក្រុងព្រះសីហនុ ឃាត់ខ្លួន ជនសង្ស័យម្នាក់ទៀត ឈ្មោះ Aa Dong ជនជាតិចិន អាយុ២៨ ឆ្នាំ មុខរបរ មិនពិតប្រាកដ ចាប់យកបានថ្នាំញៀន ១ កញ្ចប់តូច និងថ្នាំគ្រាប់ WY ១ គ្រាប់។
*ករណីទី៥ ថ្ងៃទី១ ខែវិច្ឆិកាឆ្នាំ២០១៨ ម៉ោង ២១ និង៣៥នាទីស្ថិតនៅ ក្រុម៩ ភូមិ១ សង្កាត់លេខ៣ ឃាត់ខ្លួនជនសង្ស័យម្នាក់ ឈ្មោះ Lei Lin ជនជាតិចិន អាយុ៣០ឆ្នាំ មុខរបរមិនពិតប្រាកដដកហូតបានថ្នាំញៀន ២កញ្ចប់ ។
*ករណីទី៦ ថ្ងៃទី ២ខែវិច្ឆិកាឆ្នាំ២០១៨ វេលាម៉ោង១និង២០នាទី ស្ថិតនៅ ក្រុម១២ ភូមិ២ សង្កាត់លេខ២ ឃាត់ខ្លួនជនសង្ស័យម្នាក់ ឈ្មោះ Yiang Lin Fei ជនជាតិចិន អាយុ២៨ ឆ្នាំ មុខរបរ មិនពិតប្រាកដ ចាប់យកបានថ្នាំញៀន ៦ កញ្ចប់។
លោក ស៊ុន សុផាត បន្តថា ជនសង្ស័យជនជាតិចិនបទល្មើសគ្រឿងញៀនទាំង៧នាក់ ត្រូវសមត្ថកិច្ចបានកសាងសំណុំរឿង បញ្ជូនទៅកាន់សាលាដំបូងខេត្តព្រះសីហនុ ដើម្បីបន្តនីតិវិធីតាមច្បាប់៕ ដោយ ៖ ដែន សីមា
