ភ្នំពេញ ៖ លោក គង់ គាំ អតីតប្រធានគណបក្សសមរង្ស៊ី បានបញ្ជាក់ ប្រសិនបើមានការអនុគ្រោះពន្ធ EBA ពីប្រទេសកម្ពុជាមែននោះ ក៏មិនមែនអ្វីខុសនោះដែរ ដោយសារតែផ្ដល់ប្រព័ន្ធអនុគ្រោះពន្ធនេះ សម្រាប់តែប្រទេសមិនទាន់សេដ្ឋកិច្ច រីកចម្រើន តែប៉ុណ្ណោះ ហើយកម្ពុជាបច្ចុប្បន្នកម្ពុជា កំពុងតែមានសេដ្ឋកិច្ចកើនឡើង។
អតីតមេដឹកនាំគណបក្សប្រឆាំងមួយនេះ បានថ្លែងថា អំពីបញ្ហាដកការអនុគ្រោះពន្ធអី ពីសហភាពអឺរ៉ុបនេះ ក៏យើងប្រាកដហើយថា វាមានមតិជាតិ និងអន្ដរជាតិ ដូច្នេះខ្ញុំមើលទៅមិនដូច អ្នកចង់បំពុល ឬថាក៏ចង់បំភ័យដល់ជាតិ ដល់កម្មករ គួរឲ្យព្រួយបារម្ភខ្លាំងនោះទេ ព្រោះថាប្រទេសយើង នៅតែគេវាយតម្លៃថានឹងមានកំណើតសេដ្ឋកិច្ចជាធម្មតាតទៅទៀត ដូច្នេះបើសិនជាសេដ្ឋកិច្ចមានកំណើន ហើយជាការអនុគ្រោះពន្ធនេះ សម្រាប់តែប្រទេសដែលទន់ខ្សោយនោះទេ បើសិនជាយើងចេះតែរីកចម្រើនគេ លែងអនុគ្រោះពន្ធវាជារឿងធម្មតា។
អ្នកនាំពាក្យគណបក្សប្រជាជនកម្ពុជា លោក សុខ ឥសាន បានថ្លែងថា សេដ្ឋកិច្ចជាតិកំពុងមានសន្ទុះ ហើយក្រុមធុរជនបរទេសរាប់រយក្រុមហ៊ុននឹងបន្តរកស៊ីនៅកម្ពុជា ។ ប្រទេសក្នុងសហគមន៍បានបង្ហាញជំហរខុសគ្នាចំពោះកម្ពុជា ដូច្នេះកុំឲ្យបារម្ភពេក ពីករណីដកប្រព័ន្ធអនុគ្រោះទំនិញកម្ពុជា(EBA) ព្រោះមិនមានអ្វីជាការបារម្ភ ដូចមជ្ឈដ្ឋានមួយចំនួន ពិសេសក្រុមប្រឆាំងលើកឡើងឡើយ។
លោក សុខ ឥសាន បានថ្លែងនៅថ្ងៃទី៤ វិច្ឆិកាថា មហាជនទូទៅមានការងឿងឆ្ងល់យ៉ាងខ្លាំង ចំពោះការលើកឡើងរបស់លោក គង់ គាំ ដែលជាអតីតមន្ត្រីជាន់ខ្ពស់របស់គណបក្សប្រជាជនកម្ពុជា បានផ្តាច់ខ្លួនមករួមរស់ជាមួយអតីតគណបក្សប្រឆាំង កាលពីពេលកន្លងទៅ អស់រយៈពេលរាប់សិបឆ្នាំ ការមន្ទិលសង្ស័យនេះ នៅតែមានក្នុងអារម្មណ៍របស់មហាជនទូទៅដដែល ប៉ុន្តែទើបតែពេលនេះ ភាពមន្ទិលសង្ស័យ ហាក់កាន់តែច្បាស់ឡើងៗ បន្តិចម្តងៗ ដោយសារកូនប្រុសពៅ របស់លោក គង់ គាំគឺលោក គង់ ម៉ូនីកា បានបង្កើតគណបក្សឆន្ទៈខ្មែរ ដើម្បីចូលរួមប្រកួតប្រជែង ក្នុងការបោះឆ្នោតនីតិកាលទី៦ ។
លោកបានបន្តថា ការដែលលោកគង់ គាំ រិះគន់ទណ្ឌិតសម រង្ស៊ី ពីបញ្ហាបំភិតបំភ័យរឿង ដកប្រព័ន្ធអនុគ្រោះទំនិញកម្ពុជា គឺចង់បង្ហាញទណ្ឌិតសម រង្ស៊ី ឲ្យឃើញថា អញមិនពេញចិត្តឯងទេ និងធុញទ្រាន់ណាស់លោកប្រធាន ។
លោក សុខ ឥសាន បញ្ជាក់ថា “ចំណុចទាងអស់ខាងលើនេះ គឺជាចំណុចដែលមហាជនទូទៅ មានការសង្ស័យ លោក គង់ គាំអាចជារនុកក្នុង ឬអាចជា CIA របស់គណបក្សប្រជាជនកម្ពុជា ដែលចូលទៅនៅក្នុងជំរុំ របស់អតីតបក្សប្រឆាំងយូរមកហើយ ។ បើយ៉ាងដូច្នេះមែន បានសេចក្តីថា ទណ្ឌិតម រង្ស៊ី នៅខ្ចីណាស់ ស្គាល់គណបក្សជនកម្ពុជា មិនច្បាស់ ហើយចង់មកប្រឡងជាមួយផង?”។
សូមបញ្ជាក់ថា កម្ពុជាទទួលបានប្រព័ន្ធអនុគ្រោះពន្ធនេះ កាលពីឆ្នាំ២០១២ ហើយក្រោមប្រព័ន្ធអនុគ្រោះពន្ធនេះ កម្ពុជាបានរួចផុតពីកាតព្វកិច្ចពន្ធជិត ៧រយលានដុល្លារក្នុងមួយឆ្នាំៗ ចំពោះទំនិញនាំចេញទៅទីផ្សារអឺរ៉ុប។ តួលេខពាណិជ្ជកម្មរបស់សហភាពអឺរ៉ុប និងរាជរដ្ឋាភិបាលកម្ពុជាបង្ហាញថា ក្រោមប្រព័ន្ធអនុគ្រោះពន្ធនេះ ទំនិញកម្ពុជានាំចូលទៅទីផ្សារអឺរ៉ុប មានទឹកប្រាក់ដល់ទៅជាង ៦ពាន់លានដុល្លារក្នុងឆ្នាំ២០១៧ ដែលភាគច្រើននៃទំនិញទាំងនោះ គឺជាផលិតផលវាយនភណ្ឌ សម្លៀកបំពាក់ និងស្បែកជើង ព្រមទាំងផលិតផលកសិកម្មជាដើម។
នៅថ្ងៃទី៤ ខែវិច្ឆិកា ឆ្នាំ២០១៨នេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងថា ការលើកឡើងរបស់លោក សុខ ឥសាន ដែលថា លោក គង់ គាំ ជា CIA របស់គណបក្សប្រជាជនកម្ពុជា មិនត្រឹមត្រូវទេ។
សម្តេចតេជោ ហ៊ុន សែន បានបញ្ជាក់ថា ការថ្លែងលោក គង់ គាំ គឺចេញឆន្ទៈរបស់លោកពិត មិនពាក់ព័ន្ធ គណបក្សប្រជាជនកម្ពុជា។សម្តេចតេជោ ហ៊ុន សែន បានបញ្ជាក់បន្ថែមថា លោក គង់ គាំ ជាមនុស្សចេះដឹងម្នាក់ ការលើកឡើងរបស់លោក គឺចេញពីឆន្ទៈពិតរបស់លោក។ លោក គង់ គាំ បានចាកចេញពីគណបក្សប្រជាជនកម្ពុជា ជាផ្លូវការ ដោយមានលិខិតត្រឹមត្រូវ។
លោក គង់ គាំ បានលើកឡើងថា អ្នកដែលបារម្ភរឿងអឺរ៉ុបដកប្រព័ន្ធ អនុគ្រោះពន្ធ EBA ពីកម្ពុជានោះ ជាក្រុមបំពុលសង្គម និងបំភិតបំភ័យដល់កម្មករ ព្រោះថាសេដ្ឋកិច្ចកម្ពុជា កំពុងមានសន្ទុះកើនឡើង ហើយធុរកិច្ចជនបរទេស នឹងបន្ដរកស៊ីនៅកម្ពុជា ហើយប្រទេសក្នុងសហគមន៍អឺរ៉ុប ក៏បានបង្ហាញជំហរខុសៗគ្នាចំពោះកម្ពុជា។ ក្រៅពីថ្លែងអំពី EBA លោកបានលើកឡើងថា ការបោះឆ្នោតគឺបានធ្វើឡើងយ៉ាងពិតប្រាកដ មិនក្លែងក្លាយដូចក្រុមប្រឆាំងចោទនោះឡើយ។
ចំណែកបណ្តាញសង្គមហ្វេសប៊ុក ដែលមាននិន្នាការគាំទ្របក្សប្រឆាំង បានខំមិនថា “តា គង់ គាំ បច្ចុប្បន្ន ខុសពីតា គង់ គាំ ពីមុន ឥឡូវតា គង់ គាំ ចេញមុខនិយាយជួយ ហ៊ុន សែន ដូច្នេះ ហ៊ុនសែន ត្រូវតែការពារតា គង់ គាំ វិញ”។
ចំណែកលោកម៊ុត ចន្ថា នាយខុទ្ទកាល័យលោកកឹម សុខា អតីតប្រធានគណបក្សសង្គ្រោះជាតិ បានសរសេរលើផេកហ្វេសប៊ុក កាលពីថ្ងៃទី៣ខែវិច្ឆិកាថា គួររកឲ្យឃើញប្រភពផ្សែង និងអ្នកបង្កាត់ភ្លើងបង្កជាផ្សែង ទើបពន្លត់បាន។
ប៉ុន្មានថ្ងៃនេះ សង្កេតឃើញបក្សមួយចំនួនសុំណាត់ជួបឯកអគ្គរដ្ឋទូតសហភាពអឺរ៉ុប្រចាំកម្ពុជា ដើម្បីអ្វីដែលហៅថា ជាការស្វែងយល់អំពីគម្រោងដកប្រព័ន្ធអនុគ្រោះពាណិជ្ជកម្ម នៅក្រោមគ្រោងការណ៍ “អ្វីៗទាំងអស់ លើកលែងតែសព្វាវុធ” ឬ “EBA”។ គួរតែយល់ឲ្យបានច្បាស់ពី ឬសគល់នៃបញ្ហាកើតចេញពីណា ឬផ្សែងហុយចេញពីប្រភពណា ទាក់ទិននឹងដំណើរការអនុវត្តនីតិវិធី ដើម្បីឈានទៅរកការដកប្រព័ន្ធអនុគ្រោះពាណិជ្ជកម្មនេះ។ លក្ខខណ្ឌដែលជាគុណតម្លៃរបស់សហភាពអឺរ៉ុប ក្នុងការផ្តល់ EBA ដល់ប្រទេសដែលអភិវឌ្ឍន៍តិចបំផុត ឬ LDC គឺត្រូវគោរពតាមអនុសញ្ញា របស់អង្គការសហប្រជាជាតិ និងអង្គការពលកម្មអន្តរជាតិ ស្តីពីសិទ្ធិមនុស្ស និងសិទ្ធិការងារ ចំនួន ១៥អនុសញ្ញា។ បើសិនជារដ្ឋទទួលបាន EBA រួចហើយ ខកខានមិនគោរពតាមគុណតម្លៃទាំងនេះ នោះសហភាពអឺរ៉ុបនឹងត្រូវដកហូតយកវិញ។ តើអ្នកណាជាអ្នកទទួលខុសត្រូវអនុវត្ត ប្រតិបត្តិ និងគោរពតាមអនុសញ្ញាទាំង ១៥ ដែលជាគុណតម្លៃរបស់សហភាពអឺរ៉ុប? រដ្ឋាភិបាលមានកាតព្វកិច្ចអនុវត្ត ប្រតិបត្តិ និងគោរពតាមអនុសញ្ញាទាំង ១៥ ដើម្បីជាថ្នូរនិងការទទួលបាននូវប្រព័ន្ធអនុគ្រោះពាណិជ្ជកម្ម EBA។ ដូច្នេះ រដ្ឋាភិបាលត្រូវទទួលខុសត្រូវចំពោះម្ចាស់ EBA ក្នុងការថែរក្សាឲ្យបាននូវ EBA ឬ ការធ្វើឲ្យ EBA ត្រូវបានគេដកហូតយកវិញ។ ចំណុចនេះមិនសូវជាខុសគ្នាប៉ុន្មាន ជាមួយលក្ខខណ្ឌនៃការខ្ចីប្រាក់ពីធនាគារ ឬគ្រឹះស្ថានម៉ីក្រូហិរញ្ញវត្ថុឡើយ ព្រោះបើសិនជាយើងសន្យា គោរពលក្ខខណ្ឌរបស់ម្ចាស់កម្ចី ឬម្ចាស់បំណុល ដូចជា ដាក់តម្កល់វត្ថុធានា និងបង់អត្រាកាប្រាក់ទៀងទាត់តាមការកំណត់ ទើបគេយល់ព្រមឲ្យខ្ចីប្រាក់ ហើយបើសិនជាយើងខកខានបង់កាប្រាក់ ខាងធនាគារនឹងពិន័យ ឬរឹបអូសយកវត្ថុតម្កល់ ដើម្បីលក់ឡៃឡុងជម្រះបំណុល។ បើសិនជាដូច្នេះ តើយើងត្រូវបន្ទោសធនាគារថាគ្មានមេត្តា ឬមកពីយើងជាកូនបំណុលមិនបានគោរពតាមលក្ខខណ្ឌរបស់ធនាគារ? រីឯរឿង EBA ក៏មិនខុសគ្នាប៉ុន្មានជាមួយលក្ខខណ្ឌរបស់ធនាគារទេ ប៉ុន្តែខុសគ្នាបន្តិចត្រង់ថា EBA ផ្តល់ចំណេញដល់សេដ្ឋកិច្ចជាតិ ៧រយលានដុល្លារ/ឆ្នាំ ការងារសម្រាប់យុវជន-យុវតីខ្មែរជាង ៧សែននាក់ និងអ្នកទទួលផលប្រយោជន៍ពីកម្មករ-កម្មការនីប្រមាណជា ៣លាននាក់។ យើងសង្ឃឹងថា គេគួររកឲ្យឃើញប្រភពផ្សែង និងអ្នកបង្កាត់ភ្លើងបង្កជាផ្សែង ទើបពន្លត់បាន ហើយពន្លត់ឲ្យទាន់ពេល!
តើរដ្ឋាភិបាលនឹងរកថវិកាមកពីប្រភពណាបង្រប់ថវិកាជាតិជាងពាក់កណ្តាល និងប្រាក់ចំណូលប្រចាំខែរបស់កម្មករ? ប្រព័ន្ធអនុគ្រោះពាណិជ្ជកម្ម EBA របស់សហភាពអឺរ៉ុប ផ្តល់ប្រាក់ចំណេញដល់កម្ពុជា $៧០០លាន។ EBA ផ្តល់ការងារដល់កម្មករ-កម្មការិនី ៧០០.០០០នាក់។ មនុស្សប្រមាណជា ០៣លាននាក់ ទទួលផលប្រយោជន៍ពីកម្មករ-កម្មការិនី។ កម្ពុជាទទួលជំនួយអភិវឌ្ឍន៍ពីសហគមន៍អន្តរជាតិ យ៉ាងតិច $៤៥០លាន/ឆ្នាំ។
សរុបៈ $៧០០លាន + $៤៥០លាន = $១ពាន់ និង $១៥០លាន។ រដ្ឋាភិបាលគ្រោងស្នើសុំសភាអនុម័ត ថវិកាប្រចាំឆ្នាំ២០១៩ ចំនួន $២.០០០លាន។ ដូច្នេះទាំងប្រាក់ចំណេញពី EBA និងជំនួយអភិវឌ្ឍន៍ លើសពីពាក់កណ្តាលថវិកាជាតិប្រចាំឆ្នាំ។ តើប្រាក់ចំណូលកម្មករ-កម្មការិនីខ្មែរជាង ៧សែននាក់ ដែលគិតតាមប្រាក់ឈ្នួលថេរប្រចាំខែ $182 ស្មើនឹង $127.400.000/ខែ ដោយមិនទាន់រាប់បញ្ចូលប្រាក់ ធ្វើការលើសម៉ោង និងប្រាក់ឧត្ថម្ភផ្សេងៗនៅឡើយទេ។
នេះគ្រាន់តែជួយគិតលេងៗ ប៉ុន្តែរឿងពិតយ៉ាងណាមិនហ៊ានហារស្តីទេ ខ្លាចគេចោទ៕ ដោយ៖រចនា
